மாறிய காலம்: கருணாநிதி நல்லடக்கத்திற்கு மெரினாவில் இடமில்லை! அதிமுக ஆபீஸ்வர எடப்பாடியால் முடியவில்லை

Updated: Monday, July 11, 2022, 16:54 [IST]

Subscribe to Oneindia Tamil

சென்னை: அதிமுக மோதல் விவகாரத்தில் இத்தனை நாட்களாக ஆளும் திமுக அரசு மௌனம் காத்து வந்தது. இவ்வளவு அமைதியாக இருந்த திமுக அரசு முதல்முறையாக அதிமுக அலுவலகத்திற்கு சீல் வைக்க உத்தரவிட்டுள்ளது. அதிமுக அலுவலகத்திற்கு சீல் வைத்ததன் மூலம் திமுக இந்த விவகாரத்தில் முதல்முறையாக தலையிட்டுள்ளது.

அதிமுகவின் இடைக்கால பொதுச்செயலாளராக எடப்பாடி பழனிசாமி தேர்வு செய்யப்பட்டுள்ளார். அதிமுகவில் பொதுக்குழுவில் எடப்பாடி இடைக்கால பொதுச்செயலாளர் ஆனார். ஆனால் பெயருக்கு பின் பொதுச்செயலாளர் என்ற பதவியுடன் எடப்பாடி பழனிசாமி அதிமுக அலுவலகத்திற்கு செல்ல முடியாத நிலை ஏற்பட்டுள்ளது.

அதிமுக அலுவலகம் சென்று தொண்டர்களை சந்திக்க முடியாத நிலை எடப்பாடிக்கு ஏற்பட்டுள்ளது. அதிமுக அலுவலகத்திற்கே மொத்தமாக தற்போது சீல் வைக்கப்பட்டுள்ளது.

பொதுக்குழு

அதிமுக பொதுக்குழு ஒரு பக்கம் நடக்கும் நிலையில் இன்னொரு பக்கம் ஓ பன்னீர்செல்வம் அதிமுக தலைமை அலுவலகத்தை இன்று கைப்பற்றினார். ஓ பன்னீர்செல்வம் வருவார் என்பதை அறிந்து இன்று காலையே எடப்பாடி பழனிசாமி தனது ஆதரவாளர்களை அங்கே நிறுத்தி இருந்தார். இதனால் எடப்பாடி - ஓ பன்னீர்செல்வம் ஆதரவாளர்கள் இடையே அங்கு மோதல் ஏற்பட்டது. இதனால் கல் வீச்சு, கை கலப்பு என்று கடுமையான மோதல் ஏற்பட்டது.

காயம்

ரத்த காயம் ஏற்படும் அளவிற்கு நிர்வாகிகள் மோதிக்கொண்டனர். இதையடுத்து அங்கு போலீசார் அதிக அளவில் குவிக்கப்பட்டனர். மோதல்களுக்கு இடையே அதிமுக அலுவலக கதவுகளை உடைத்து ஓபிஎஸ் தனது ஆதரவாளர்களுடன் உள்ளே சென்றார். இதற்கு இடையில் ஓ பன்னீர்செல்வத்தை கட்சியில் இருந்து நீக்குவதாக வானகரத்தில் அதிமுக பொதுக்குழு அறிவித்தது. ஓ பன்னீர்செல்வம் மற்றும் அவரது ஆதரவாளர்கள் ஆகியோரை மொத்தமாக அடிப்படை உறுப்பினர் பொறுப்பில் இருந்து நீக்குவதாக எடப்பாடி பழனிசாமியும் அறிவித்தார்.

மாறி மாறி நீக்கம்

இதற்கு பதிலடியாக இன்னொரு பக்கம் ஓ பன்னீர்செல்வமும் எடப்பாடி பழனிசாமியை நீக்குவதாக அறிவித்தார். இதனால் அதிமுக அலுவலகம் யாருக்கு சொந்தம் என்ற கேள்வி எழுந்தது. எடப்பாடி - ஓபிஎஸ் ஆதரவாளர்கள் இடையே இதனால் ராயப்பேட்டையில் மோதல் வெடித்தது. இந்த மோதல் காரணமாக அதிமுக அலுவலகத்திற்கு வெளியே பரபரப்பான சூழ்நிலை நிலவியது. அங்கு போலீசார் அதிக எண்ணிக்கையில் குவிக்கப்பட்டனர்.

சீல்

இதனால் இன்று மாலை அதிமுக அலுவலகத்திற்கு எடப்பாடி பழனிச்சாமி வரும் பட்சத்தில் இரண்டு தரப்பிற்கும் பெரிய அளவில் வன்முறை வெடிக்கும் அபாயம் ஏற்பட்டது. இந்த நிலையில் மோதலை தடுக்கும் விதமாக, சட்ட ஒழுங்கு கருதி அங்கு போலீஸ் குவிக்கப்பட்டது,. அதோடு வருவாய் துறை அதிகாரிகள் மூலம் அதிமுக அலுவலகம் சீல் வைக்கப்பட்டுள்ளது. உள்ளே இருந்த ஓபிஎஸ் அவரது ஆதரவாளர்கள் வெளியேற்றப்பட்டு மொத்தமாக அதிமுக அலுவலகம் சீல் வைக்கப்பட்டது.

எடப்பாடி

ஓபிஎஸ் - இபிஎஸ் ஆதரவாளர்கள் மோதலை தவிர்க்கும் வகையில் தற்போது அதிமுக அலுவலகத்திற்கு சீல் வைக்கப்பட்டுள்ளது. அதிமுக யாருக்கும் சொந்தம் என்ற கேள்வி எழுந்துள்ள நிலையில் அலுவலகத்திற்கு பூட்டு போடப்பட்டது. அதிமுகவின் இடைக்கால பொதுச்செயலாளராக எடப்பாடி பழனிசாமி வந்ததும் அதிமுக தலைமையகத்திற்கு போக விரும்பி இருப்பார். பொதுச்செயலாளராக அலுவலகம் செல்லும் திட்டத்தில் அவர் இருந்திருப்பார்.

சீல்

ஆனால் அதிமுக அலுவலகத்திற்கு எடப்பாடி போக முடியாத வகையில் அதற்கு சீல் வைக்க உத்தரவிட்டுள்ளது முதல்வர் ஸ்டாலின் அரசு. இதனால் எடப்பாடி பொதுச்செயலாளராக இன்று அதிமுக அலுவலகம் செல்ல முடியாத நிலையில் ஏற்பட்டுள்ளது. 2018 ஆகஸ்ட் 7ம் தேதி முன்னாள் முதல்வர் கருணாநிதி மறைந்த போது அப்போது கருணாநிதி உடலை அடக்கம் செய்ய மெரினாவில் இடம் மறுத்தார் முதல்வர் எடப்பாடி பழனிச்சாமி. ஸ்டாலின் இரண்டு முறை போய் கேட்டும் எடப்பாடி அனுமதி கொடுக்கவில்லை.

செல்ல முடியாது

நேரடியாக கேட்டு, கடிதம் அனுப்பியும் கூட எடப்பாடி பழனிசாமி மெரினாவில் இடம் மறுத்தார். இதையடுத்து ஸ்டாலின் அன்று இரவே அவசர வழக்கு தொடுத்தார். வழக்கிலும் ஆளும் அதிமுக தரப்பு கடும் வாதங்களை வைத்தது. ஆனால் சட்ட போராட்டம் மூலம் வென்று கருணாநிதி உடலை ஸ்டாலின் மெரினாவில் அடக்கம் செய்தார். இந்த நிலையில்தான் தற்போது எடப்பாடி அதிமுக அலுவலகம் போக முடியாமல் சீல் வைக்க உத்தரவிட்டுள்ளது முதல்வர் ஸ்டாலின் அரசு.