டெல்லி பிளான் கேன்சல்.. சென்னைக்கு செல்லும் அண்ணாமலை.. பாதயாத்திரைக்கு 2 நாட்கள் ரெஸ்ட்!
சென்னை: பாஜக மாநில தலைவர் அண்ணாமலை, ஜேபி நட்டா அழைப்பின் பேரில் டெல்லி செல்ல உள்ளதாக கூறப்பட்ட நிலையில், அவர் டெல்லி செல்லவில்லை என தகவல்கள் வெளியாகியுள்ளன. அடுத்த 2 நாட்களுக்கு அண்ணாமலை சென்னையில் இருப்பார் என பாஜக வட்டார தகவல்கள் தெரிவிக்கின்றன.
பாஜக மாநில தலைவர் அண்ணாமலை ‛என் மண், என் மக்கள்' என்ற பெயரில் பாதயாத்திரை நடத்தி வருகிறார். கடந்த ஜூலை 28ஆம் தேதி ராமேஸ்வரத்தில் அவர் பாதயாத்திரையை தொடங்கினார். இந்த பாதயாத்திரையை மத்திய உள்துறை அமைச்சர் அமித்ஷா தொடங்கி வைத்தார். மதுரை மாவட்டத்தில் தற்போது யாத்திரை நடக்கும் நிலையில் இன்று டெல்லி புறப்பட்டு செல்ல உள்ளதாக தகவல் வெளியானது.
அடுத்த ஆண்டு நடக்கும் நாடாளுமன்ற தேர்தலில் அதிக இடங்களில் வெல்லும் முனைப்பில் பாஜக மாநில தலைவர் அண்ணாமலை பாதயாத்திரையை மேற்கொண்டு வருகிறார். அடுத்த ஆண்டு வரை இந்த பாதயாத்திரை தொடரும் நிலையில், இடையிடையே மற்ற பணிகளிலும், கட்சி தொடர்பான ஆலோசனைக் கூட்டங்களிலும் பங்கேற்பார் அண்ணாமலை.
இத்தகைய சூழலில் தான் பாஜக மாநில தலைவர் அண்ணாமலை இன்று திடீரென டெல்லி செல்ல உள்ளதாக தகவல்கள் வெளியாகின. பாஜக தேசிய தலைவர் ஜேபி நட்டாவின் அழைப்பின் பேரில் அண்ணாமலை டெல்லி செல்ல உள்ளதாக கூறப்பட்டது. மதுரையில் பாதயாத்திரை நடத்தி வரும் நிலையில், அதை முடித்துக்கொண்டு டெல்லி கிளம்புவதாக கூறப்பட்டது.
பாதயாத்திரை தொடங்கிய பிறகு அண்ணாமலை அளித்த பேட்டியில், "நாங்கள் ஓ பன்னீர் செல்வத்தை ஒதுக்கி வைக்கவில்லை. அனைவரையும் அரவணைத்து செல்கிறோம்" என்றார். ஓ பன்னீர் செல்வம் பற்றி அண்ணாமலை பேசியது அதிமுகவுக்கு கடும் கோபத்தை ஏற்படுத்தியது. தமிழ்நாட்டில் அதிமுக கூட்டணியில் பாஜக உள்ள நிலையில் அண்ணாமலையின் இந்த பேச்சை அதிமுக தலைவர்கள் ரசிக்கவில்லை.
இதையடுத்து முன்னாள் அமைச்சர் செல்லூர் ராஜு அண்ணாமலையை விமர்சனம் செய்தார். அண்ணாமலை அரசியலில் ஒரு கத்துக்குட்டி. அவர் இன்னும் வளர வேண்டும் என தெரிவித்தார். இதற்கு பாஜக தலைவர்கள் செல்லூர் ராஜூவை விமர்சனம் செய்தனர். இதனால் அதிமுக பாஜக இடையே மோதல் போக்கு ஏற்பட்டது. இந்த பின்னணியில் தான் அண்ணாமலை டெல்லிக்கு அழைக்கப்பட்டுள்ளதாக கூறப்பட்டது.
இந்நிலையில், அண்ணாமலை டெல்லி செல்லவில்லை எனத் தகவல்கள் வெளியாகியுள்ளன. மதுரையில் பாதயாத்திரையை முடித்துக்கொண்டு சென்னை செல்கிறார் அண்ணாமலை. அடுத்த 2 நாட்களுக்கு அண்ணாமலை சென்னையில் இருப்பார் என பாஜக வட்டார தகவல்கள் தெரிவிக்கின்றன.
Click it and Unblock the Notifications
Sign in with Google