யாரும் Half Boil சாப்பிடாதீங்க.. மா.சுப்பிரமணியன் கொடுத்த முக்கிய வார்னிங்!

Updated: Tuesday, February 10, 2026, 13:14 [IST]

Subscribe to Oneindia Tamil

சென்னை: தமிழ்நாட்டில் பறவை காய்ச்சல் வேகமாக பரவி பரும் சூழலில், பொதுமக்கள் யாரும் ஹாஃப் பாயில் சாப்பிட வேண்டாம் என்று அமைச்சர் மா.சுப்பிரமணியன் கேட்டுக் கொண்டுள்ளார். அதேபோல் கோழிக்கறியை நன்கு வேக வைத்து சாப்பிடுவது அவசியம் என்று கூறியுள்ள மா.சுப்பிரமணியன், திடீரென உயிரிழக்கும் கோழிகளின் இறைச்சியை சாப்பிட வேண்டாம் என்றும் கேட்டுக் கொண்டுள்ளார்.

அண்மையில் சென்னை மற்றும் அதனைச் சுற்றியுள்ள பகுதிகளில் கடந்த சில வாரங்களாகவே 1,500க்கும் மேற்பட்ட காகங்கள் உயிரிழந்தன. இவற்றின் மாதிரிகள் ஆய்வு செய்யப்பட்ட போது, பறவை காய்ச்சல் இருப்பது உறுதி செய்யப்பட்டது. இதன்பின் தமிழ்நாடு முழுவதும் உள்ள கோழிப் பண்ணைகளில் பறவை காய்ச்சல் தடுக்கு நடவடிக்கை முடுக்கிவிடப்பட்டன.

தமிழ்நாடு கால்நடை பராமரிப்பு துறை சார்பாக முழு கண்காணிப்பை மேம்படுத்தவும், பாதுகாப்பு பணிகளை செய்யவும் அறிவுறுத்தப்பட்டது. அதற்கேற்ப பல்வேறு கோழிப்பண்ணைகளில் ஆய்வு மேற்கொள்ளப்பட்டன. இருப்பினும் ஏராளமானோருக்கு திடீரென காய்ச்சல், சலி, இருமல் உள்ளிட்ட பாதிப்பு ஏற்பட்டது. இதனால் பறவை காய்ச்சல் பரவி வருவதாக பேசப்பட்டது.

இந்த நிலையில் சென்னையில் அமைச்சர் மா.சுப்பிரமணியன் செய்தியாளர்களை சந்தித்து பேசுகையில், பறவை காய்ச்சல் தொடர்பாக அனைத்து மாநில அரசுகளுக்கும் மத்திய அரசு நோட்டீஸ் வழங்கி இருந்தது. அந்த தகவல் கிடைத்தவுடன் காகங்கள் உள்ளிட்ட பறவை இனங்கள் திடீரென உயிரிழந்தால், உடனடியாக ஆழமான குழி தோண்டி புதைக்க வேண்டும் என்று பொது சுகாதாரத்துறை தரப்பில் அறிவுறுத்தப்பட்டது.

தமிழ்நாட்டை பொறுத்தவரை பறவை காய்ச்சல் கட்டுக்குள் உள்ளது. மனிதர்களில் யாருக்கும் இதுவரை பாதிப்பு கண்டறியப்படவில்லை. அதேபோல் பொதுமக்கள் கொஞ்சம் முன்னெச்சரிக்கையுடன் இருக்க வேண்டும். ஏனென்றால் ஹாஃப் பாயில் போன்ற உணவுகளை சில நாட்களுக்கு தவிர்ப்பது நல்லது. அதேபோல் கோழி இறைச்சியை நன்றாக வேக வைத்து சாப்பிட வேண்டும் என்று கேட்டுக் கொள்கிறேன்.

திடீரென உயிரிழக்கும் கோழிகளை சாப்பிட வேண்டாம்.. ஒவ்வொரு மாவட்டத்திலும் மாவட்ட நிர்வாகம் தரப்பில் பொதுமக்களுக்கு விழிப்புணர்வு ஏற்படுத்தப்பட்டு வருகிறது என்று தெரிவித்துள்ளார். இதனால் முட்டை, கோழிக் கறி, உணவகங்களில் சிக்கன் தொடர்பான உணவு உள்ளிட்டவற்றை தவிர்ப்பதே நல்லது. குறிப்பாக குழந்தைகளுக்கு இப்படியான உணவை கொடுக்காமல் இருப்பது சரியான விஷயமாக பார்க்கப்படுகிறது.