"செம ஹேப்பி!" செஸ் ஒலிம்பியாட் 2022..நாட்டுப்புற கலைஞர்களுடன் குத்தாட்டம் போட்ட வெளிநாட்டு வீரர்கள்

Published: Thursday, July 28, 2022, 18:16 [IST]

Subscribe to Oneindia Tamil

சென்னை: செஸ் ஒலிம்பியாட் போட்டிகள் இன்று தொடங்கும் நிலையில், இதில் பல நாடுகளைச் சேர்ந்த வெளிநாட்டு வீரர்கள் உற்சாகமாகக் கலந்து கொண்டு உள்ளனர்.

தொடக்க விழா

இதற்கான தொடக்க விழா சென்னையில் உள்ள நேரு உள் விளையாட்டு அரங்கில் நடைபெறுகிறது. பிரதமர் நரேந்திர மோடி, தமிழக முதல்வர் ஸ்டாலின் உள்ளிட்டோர் இதில் கலந்து கொள்கின்றனர். பிரதமரின் சென்னை வருகையை முன்னிட்டு பலத்த போலீஸ் பாதுகாப்பு போடப்பட்டு உள்ளது. நகர் முழுவதும் சுமார் 22 ஆயிரம் போலீசார் பாதுகாப்புப் பணிகளில் ஈடுபட்டு உள்ளனர்.

பாராட்டு

செஸ் ஒலிம்பியாட் தொடரில் பல்வேறு நாடுகளைச் சேர்ந்த வீரர்கள் கலந்து கொள்கின்றனர். அவர்களை வரவேற்கத் தமிழக அரசு சார்பில் பல்வேறு ஏற்பாடுகள் செய்யப்பட்டு உள்ளன. சென்னை வந்த வெளிநாட்டு வீரர்கள் அனைவரும் போட்டிக்கான ஏற்பாடுகள் மிகச் சிறப்பாகச் செய்யப்பட்டு உள்ளதாகப் பாராட்டி வருகின்றனர். போட்டி ஏற்பாடுகள் குறித்து அவர்கள் ட்விட்டர் பக்கங்களில் பாராட்டி வருகின்றனர்.

நாட்டுப்புற கலைஞர்கள்

இதனிடையே தொடக்க விழாவை முன்னிட்டு பல்வேறு நாடுகளைச் சேர்ந்த வீரர்கள் நேரு உள்விளையாட்டு அரங்கிற்கு வந்துள்ளனர். அவர்களை வரவேற்கத் தமிழக அரசு சார்பில் பாரம்பரிய நாட்டுப்புற கலைஞரின் நடன நிகழ்ச்சிகள் ஏற்பாடு செய்யப்பட்டு இருந்தன. மயிலாட்டம், ஒயிலாட்டம் உள்ளிட்ட பாரம்பரிய நடனக் கலைஞர்கள் செஸ் வீரர்களை உற்சாகமாக வரவேற்றனர்.

குத்தாட்டம்

நாட்டுப்புற கலைஞரின் நடனத்தைக் கண்டு உற்சாகம் அடைந்த செஸ் வீரர்கள், அவர்களுடன் சேர்ந்து குத்தாட்டம் போட்டனர். வெளிநாட்டு வீரர்கள், வீராங்கனைகள் என பலரும் நாட்டுப்புற கலைஞர்களுடன் இணைந்து நடனம் ஆடினர். இது தொடர்பான வீடியோக்கள் இணையத்தில் வேகமாகப் பரவி வருகிறது. இன்று தொடங்கும் செஸ் ஒலிம்பியாட் போட்டிகள் வரும் ஆகஸ்ட் 10ஆம் தேதி வரை நடைபெறும் நிலையில், போட்டிகள் அனைத்தும் நேரடியாகவும் ஒளிபரப்பப்பட உள்ளது குறிப்பிடத்தக்கது.

Published On July 28, 2022