இனி பைப்பை திறந்தால்.. LPG கேஸ் வரும்.. சிலிண்டர் எல்லாம் தேவையே இல்லை.. சென்னையில் செம திட்டம்

Updated: Tuesday, July 1, 2025, 10:40 [IST]

Subscribe to Oneindia Tamil

சென்னை: சென்னையில் வீடுகளுக்கு குழாய் மூலம் சமையல் எரிவாயு விநியோகம் செய்யும் திட்டத்திற்கு மாநகராட்சி அனுமதி அளித்துள்ளது. முதற்கட்டமாக 8 இடங்களில் இந்த திட்டம் செயல்படுத்தப்பட உள்ளது. தமிழ்நாடு தொழில் வளர்ச்சிக் கழகம் (TIDCO) 27 இடங்களில் இந்த திட்டத்தை செயல்படுத்த அனுமதி கோரியிருந்த நிலையில், தற்போது 8 இடங்களுக்கு அனுமதி கிடைத்துள்ளது.

குழாய் மூலம் கேஸ் - விரைவில் சென்னையில்

தமிழகத்தில் குழாய் மூலம் வீடுகளுக்கே எரிவாயு வழங்கும் திட்டம் விரைவில் அறிமுகப்படுத்தப்பட உள்ளது. சென்னையில் முதற்கட்டமாக இந்த திட்டம் செயல்படுத்தப்படவுள்ள நிலையில், அதற்கான இறுதிக்கட்ட பணிகள் தீவிரமாக நடைபெற்று வருகின்றன. இன்னும் சில வாரங்களில் இதுகுறித்த முக்கிய அறிவிப்புகள் வெளியாகும் என எதிர்பார்க்கப்படுகிறது. வீடுகளில் சமையல் அறைகளில் குழாய் மூலம் எரிவாயு இணைப்பு பெறும் வசதி வெகுவிரைவில் சென்னையில் சாத்தியமாக உள்ளது.

பதிவு செய்த குடியிருப்புகள்

சென்னையில் உள்ள குடியிருப்புகளில் இதற்கான முன்பதிவு (Registration) தொடங்கியுள்ளது. இதுவரை 30,000க்கும் மேற்பட்ட குடியிருப்புகள் தலா ₹ 576 செலுத்தி PNG எனப்படும் குழாய் எரிவாயு இணைப்புக்கு பதிவு செய்துள்ளன. இந்த ஆண்டு இறுதிக்குள் சென்னையில் இந்த திட்டம் நடைமுறைக்கு வரும் என எதிர்பார்க்கப்படுகிறது. இதற்கான கட்டமைப்பு வசதிகளை ஏற்படுத்தும் பணிகள் தற்போது தீவிரமாக நடைபெற்று வருகின்றன.

சென்னையில் வீடுகளுக்கு PNG எனப்படும் பைப்லைன் மூலம் இயற்கை எரிவாயு வழங்குவதற்கு தமிழக அரசு தீவிர முயற்சிகள் மேற்கொண்டு வருகிறது. எண்ணூரில் உள்ள சிஎன்ஜி (CNG) எனப்படும் சுருக்கப்பட்ட இயற்கை எரிவாயு முனையத்தில் இருந்து பைப்லைன்கள் அமைப்பதற்கான அனுமதிகளை ஏற்கனவே சாலைப் போக்குவரத்துத் துறையிடம் இருந்து பெற்றுள்ளனர்.

சென்னையில் பிஎன்ஜி (PNG) சேவையின் முதல் வாடிக்கையாளர்களாக திருமங்கலம் அருகே உள்ள ஒரு பெரிய அடுக்குமாடி குடியிருப்பு இருக்கும் என தகவல்கள் தெரிவிக்கின்றன. சிஎன்ஜி திட்டத்தை செயல்படுத்துவதை மேற்பார்வையிட தொழில் துறை உதவிகளை வழங்கி வருகிறது. மேலும், ஒரு நோடல் ஏஜென்சியும் நியமிக்கப்பட்டுள்ளதாக தமிழ்நாடு அரசு வட்டாரங்கள் தெரிவிக்கின்றன.

பாதைகள் அமைப்பதில் சவால்கள்

சென்னையிலும், திருவள்ளூரிலும் சுமார் 666 கி.மீ தூரத்துக்கு தனியார் நிறுவனம் மூலம் குழாய் பதிக்கும் பாதைகள் அமைக்கப்பட உள்ளன. சென்னை நகரச் சாலைகளின் கீழ் தண்ணீர், கழிவுநீர், மின்சாரம், இணையம், தொலைபேசி இணைப்புகள் போன்ற முக்கிய பாதைகள் ஏற்கனவே இருப்பதால், இந்தப் பணிகள் சவாலானதாக இருக்கும் என தெரிவிக்கப்பட்டுள்ளது.

அடுத்த நான்கு ஆண்டுகளில், சென்னை மற்றும் திருவள்ளூரில் சுமார் 33 லட்சம் வாடிக்கையாளர்களுக்கு PNG இணைப்புகள் வழங்கப்படும் என எதிர்பார்க்கப்படுகிறது. மணலி வழியாக ஜவஹர்லால் சாலை சென்று, மாதவரம், கத்திப்பாரா அடைந்து பின்னர் மீனம்பாக்கம் வரை மெயின் லைன் செல்லும். குடியிருப்பு பகுதிகளில் கிளை வழிகள் வழியாக இதற்கான சாலைகள் அமைக்கப்படும்.

எளிதான பயன்பாடு மற்றும் கட்டண அமைப்பு

PNG இணைப்புகள், LPG ரெகுலேட்டட் இணைப்புகளில் கொடுக்கப்பட்டதைப் போலவே இருக்கும். மின்சாரம் போல வீடுகளில் ரெகுலேட்டரை திருகினால் எரிவாயு கிடைக்கும். இதற்கு மீட்டர் பொருத்தப்பட்டு, அதன் அடிப்படையில் கட்டணம் வசூலிக்கப்படும். இந்த சேவையில் சிலிண்டர் இணைப்பு இருக்காது. ஆரம்ப முன்பதிவு கட்டணம் வசூலித்த பிறகு, நிறுவனம் 90 நாட்களுக்குள் PNG இணைப்புகளை வழங்கும்.

PNG அடுப்புகளுக்கு பெரிய முனைகளுடன் கூடிய பர்னர்கள் தேவைப்படும். தற்போது நுகர்வோர் PNG இணக்கமான அடுப்புகளுக்கு மாற பெட்ரோலியம் பாதுகாப்பு ஆராய்ச்சி சங்கம் அறிவுறுத்தி உள்ளது. தற்போது உள்ள சிறிய அடுப்புகள் இதற்குப் பொருந்தாது.

சிஎன்ஜி விற்பனை நிலையங்கள்

ஏற்கனவே சென்னை மற்றும் திருவள்ளூரில் அமைக்கப்பட்டுள்ள 222 சிஎன்ஜி விற்பனை நிலையங்களில் 70 செயல்படத் தொடங்கி உள்ளன. இதன் மூலம் தினமும் சுமார் 6800 வாகனங்களுக்கு சுமார் 10000 கிலோ சிஎன்ஜி சப்ளை செய்யப்படுகிறது. இதற்கான பைப்லைன் அமைக்கும் பணி தொடங்கும் போது, அதிகமான குடியிருப்பாளர்கள் பதிவு செய்வார்கள் என குடியிருப்போர் நலச் சங்கங்கள் நம்பிக்கை தெரிவித்துள்ளன.

சென்னையில் குழாய் மூலம் வீடுகளுக்கு எரிவாயு வழங்கும் திட்டம் விரைவில் பயன்பாட்டுக்கு வர உள்ளதால், சிலிண்டர் விநியோகத்தை சார்ந்திருக்கும் நிலை மாறும் என எதிர்பார்க்கப்படுகிறது. இது சென்னை மற்றும் புறநகர் பகுதிகளில் வசிக்கும் லட்சக்கணக்கான மக்களுக்கு பயனுள்ளதாக இருக்கும்.