சென்னையில் இன்று முதல் 42 புறநகர் மின்சார ரயில்கள் இயக்கம்.. அரசு ஊழியர்கள் பயணிக்கலாம்

சென்னை: அத்தியாவசிய அரசு பணிகளுக்கு செல்ல இன்று முதல் 42 புறநகர் மின்சார ரயில்கள் சென்னையில் இயக்கப்படுகிறது.

அத்தியாவசிய அரசு பணியாளர்களுக்கு மட்டுமே அனுமதி அளிக்கப்பட்டுள்ளது. பொதுமக்கள் பயணம் செய்ய அனுமதி கிடையாது, அடையாள அட்டை இல்லாமல் வந்தால் அரசு ஊழியராக இருந்தாலும் அனுமதி கிடையாது என்று அறிவிக்கப்பட்டுள்ளது.

ஊரடங்கில் பல்வேறு தளர்வுகளை அறிவித்த அரசு 50 சதவீதம் பணியாளர்களுடன் அரசு மற்றும் தனியார் நிறுவனங்கள் இயங்கலாம் என்று அறிவித்தது. இதையடுத்து ரயில்வே ஊழியர்கள் மற்றும் அத்தியாவசிய அரசு பணிகளில் ஈடுபடுபவர்களின் வசதிக்காக மின்சார ரயில்கள் இயக்கப்பட்டது.

அதன்படி சென்ட்ரலில் இருந்து காலை 5.30 மணி முதல் 9.30 மணி வரை அரக்கோணத்திற்கும் அதைப்போன்று மறுமார்க்கமாக அரக்கோணத்தில் இருந்து சென்ட்ரல் ரயில் நிலையத்துக்கும், அதைப்போன்று சென்னை கடற்கரையில் இருந்து செங்கல்பட்டு- கடற்கரைக்கும் இரண்டு வழிதடங்களில் 30க்கும் மேற்பட்ட மின்சார ரயில்கள் இயக்கப்பட்டு வருகிறது..

இந்நிலையில் அண்மையில் ஊரடங்கில் மேலும் பல தளர்வுகள் அறிவிக்கப்பட்டது. இதன்படி அனைத்து அலுவலகங்களும் 100 சதவீதம் பணியாளர்களுடன் இயக்கலாம் என்று அறிவிக்கப்பட்டுள்ளது. இதனால் மின்சார ரயில்களில் மக்கள் கூட்டம் அலை மோதியது. இதையடுத்து கூடுதல் மின்சார ரயில்களை இயக்க ரயில்வே நிர்வாகம் முடிவு செய்துள்ளது. அதன்படி இன்று முதல் கூடுதலாக 12 புறநகர் மின்சார ரயில்கள் இயக்கப்படுகிறது. இந்த ரயில் இன்று காலை 5.30 மணிக்கு சென்னை கடற்கரையில் இருந்து புறப்பட்டு செங்கல்பட்டுக்கு சென்றடையும். அதைப்போன்று செங்கல்பட்டில் இருந்து ஒரு ரயில் கடற்கரைக்கு வந்தடையும்.

இந்த சிறப்பு ரயில்களில் அத்தியாவசிய பணிகளில் ஈடுபடும் அரசு ஊழியர்கள், ரயில்வே பணியாளர்கள் மட்டும் பயணிக்கலாம். ஆனால் கட்டாயம் அடையாள அட்டை வைத்திருக்க வேண்டும். அப்படி வந்தால் மட்டுமே டிக்கெட் வழங்கப்படும். அடையாள அட்டை இல்லாதவர்கள், பொதுமக்களுக்கு அனுமதியில்லை.

ஏற்கனவே 30க்கும் மேற்பட்ட புறநகர் ரயில்கள் இயக்கப்பட்ட நிலையில் இன்று கூடுதலாக 12 ரயில்கள் இயக்கப்படுகிறது. இதையடுத்து அனைத்து வழித்தடங்களில் சேர்த்து இன்று 42க்கும் மேற்பட்ட புறநகர் மின்சார ரயில்கள் இயக்கப்படுகிறது. பொதுமக்களுக்கு எப்போது புறநகர் ரயில்கள் இயக்கப்படும் என்பது குறித்து அரசு இதுவரை அறிவிப்பு வெளியிடவில்லை.

English summary

42 suburban electric trains operating in Chennai: Government employees can travel but people not allowed to travel this train.