தமிழக அரசின் அன்புக் கரங்கள் திட்டம்! பெற்றோர் இல்லாத குழந்தைகளுக்கு நாளை முதல் மாதம் ரூ 2000!

Updated: Sunday, September 14, 2025, 13:03 [IST]

Subscribe to Oneindia Tamil

சென்னை: பெற்றோர் இல்லாத குழந்தைகளுக்கு மாதந்தோறும் ரூ 2 ஆயிரம் உதவித்தொகை வழங்கும் அன்புக் கரங்கள் திட்டத்தை முதல்வர் ஸ்டாலின் நாளை தொடங்கி வைக்கிறார். இந்த திட்டம் சமூகநலத் துறை சார்பில் செயல்படும். உதவித் தொகையுடன் கல்விச் செலவையும் அரசே ஏற்கிறது.

இந்தத் திட்டம் தமிழ்நாட்டில் சமூகப் பாதுகாப்புத் திட்டத்தின் ஒரு பகுதியாக, பெற்றோர் அல்லது பாதுகாவலர் இல்லாத குழந்தைகளின் எதிர்காலத்தைப் பாதுகாக்க ஏற்படுத்தப்பட்டது. இது தமிழக அரசால் நிர்வகிக்கப்பட்டு, குழந்தைகளின் நலன் சார்ந்த பல்வேறு அம்சங்களைக் கவனிக்கிறது.

மாதாந்திர உதவித்தொகை

இத்திட்டத்தின் கீழ், தகுதியான குழந்தைகளுக்கு மாதந்தோறும் ரூ.2,000 வங்கிக் கணக்கில் நேரடியாக வரவு வைக்கப்படுகிறது.

கால அளவு: இந்த உதவித்தொகை, அந்தக் குழந்தை 18 வயதை அடையும் வரை தொடர்ந்து வழங்கப்படும். இது அந்தக் குழந்தையின் உணவு, கல்வி மற்றும் பிற அத்தியாவசியத் தேவைகளுக்கு உதவுகிறது.

யாரெல்லாம் விண்ணப்பிக்கலாம்?

பெற்றோரை இழந்த குழந்தைகள்

பெற்றோரில் ஒருவர் இறந்து, மற்றொருவர் குழந்தையைப் பராமரிக்க முடியாத நிலையிலிருக்கும் குழந்தைகள். உதாரணமாக, தாய் இறந்து, தந்தை உடல்நலக்குறைவு அல்லது மனநலம் பாதிக்கப்பட்டவராக இருந்தால், அக்குழந்தை இத்திட்டத்திற்குத் தகுதியுடையது.

கைவிடப்பட்ட குழந்தைகள்: குடும்பத்தினரால் கைவிடப்பட்ட மற்றும் சட்டரீதியான பாதுகாவலர் இல்லாத குழந்தைகள்.

பெற்றோரில் ஒருவர் சிறையில் இருக்கும் நிலை

பெற்றோரில் ஒருவர் இறந்து மற்றொருவர் மாற்றுத்திறனாளியாக இருக்கும் நிலை.

விண்ணப்பிக்கும் முறை

சமூகநலத் துறை: விண்ணப்பங்களை மாவட்ட சமூகநலத் துறையின் கீழ் உள்ள மாவட்ட குழந்தைகள் பாதுகாப்பு அலுவலகத்தில் சமர்ப்பிக்கலாம்.

ஆவணங்கள்

பெற்றோரின் இறப்புச் சான்றிதழ், குழந்தையின் பிறப்புச் சான்றிதழ், ஆதார் அட்டை, மற்றும் தற்போதைய குடும்ப நிலை குறித்த சான்றிதழ்கள், குழந்தையின் வங்கிக் கணக்கு புத்தக நகல், வயது சான்றிதழ்

இந்த ஆவணங்களுடன் "உங்களுடன் ஸ்டாலின்" முகாம் அல்லது மாவட்ட குழந்தைகள் பாதுகாப்பு அலுவலரைத் தொடர்பு கொண்டு இந்தத் திட்டத்தின் பலனைப் பெறலாம்.

விண்ணப்ப நடைமுறை: விண்ணப்பம் சமர்ப்பிக்கப்பட்ட பிறகு, அதிகாரிகள் குடும்பச் சூழல் மற்றும் குழந்தையின் நிலை குறித்து ஆய்வு செய்வார்கள். அதன் பிறகு, தகுதியுடையவர்களுக்கு உதவித்தொகை உடனடியாகத் தொடங்கப்படும்.

திட்டத்தின் முக்கிய நோக்கம்:

குழந்தைகளின் எதிர்காலம்: கைவிடப்பட்ட அல்லது ஆதரவற்ற குழந்தைகளின் கல்வி தடைபடாமல் இருப்பதை உறுதிசெய்வது.

சமூகப் பாதுகாப்பு: இந்தக் குழந்தைகள் சமூகத்தில் ஒதுக்கப்படாமல், மற்ற குழந்தைகளைப் போல வளரவும், படிக்கவும் இத்திட்டம் ஒரு வலுவான ஆதரவு அமைப்பை வழங்குகிறது.

தற்சார்பு வாழ்க்கை: 18 வயதுக்குப் பிறகு, அவர்கள் தங்களுக்கு ஒரு நல்ல எதிர்காலத்தை அமைத்துக் கொள்ள இந்த நிதி உதவி ஒரு அடித்தளமாக அமைகிறது.

இந்த அன்புக் கரங்கள் திட்டம் நாளை முதல் தொடங்கப்படுகிறது. முதல்வர் ஸ்டாலின் தொடங்கி வைக்கிறார். இதற்காக சமூகநலத் துறை மூலம் மாநிலம் முழுவதும் 3 லட்சம் விண்ணப்பங்கள் அனுப்பப்பட்டுள்ளன. மாதம் ரூ 2000 உதவித் தொகையுடன் குழந்தைகளின் அனைத்து விதமான கல்விச் செல்வுகளையும் ஏற்க உள்ளதாக அரசு அறிவித்துள்ளது.

பெண்களுக்கு கலைஞர் உரிமைத் தொகை மூலம் மாதம் ரூ 1000, புதுமைப் பெண், தமிழ்ப்புதல்வன் திட்டத்திற்கு தலா ரூ 1000 வழங்கி வரும் நிலையில் அன்புக் கரங்கள் திட்டம் தொடங்கப்படுகிறது.