வணிக பயன்பாட்டு சமையல் எரிவாயு சிலிண்டர் விலை ரூ30 குறைவு- சென்னையில் ரூ1930-க்கு விற்பனை!
சென்னை: வணிக பயன்பாட்டு சமையல் எரிவாயு சிலிண்டர் விலை ரூ30 அதிரடியாகக் குறைக்கப்பட்டுள்ளது. இதனையடுத்து சென்னையில் வணிக பயன்பாட்டு சமையல் எரிவாயு சிலிண்டர் ரூ1930-க்கு விற்பனை செய்யப்படுகிறது.
சர்வதேச கச்சா எண்ணெய் விலை நிலவரத்தின் அடிப்படையில் நமது நாட்டில் வீட்டு பயன்பாடு, வணிகப் பயன்பாடு சமையல் எரிவாயு சிலிண்டர்கள்- கேஸ் சிலிண்டர் விலையில் ஏற்றம் இறக்கம் இருந்து வருகிறது.
கடந்த மாதம் நமது நாடு முழுவதும் வணிக பயன்பாட்டு சமையல் எரிவாயு சிலிண்டர் விலை ரூ19 அதிரடியாக உயர்த்தப்பட்டது. இதனால் ஹோட்டல்களில் உணவுப் பொருட்கள் விலை உயரும் அச்சம் ஏற்பட்டது. மேலும் வணிக பயன்பாட்டு சமையல் எரிவாயு சிலிண்டர் ரூ,1,795, மும்பையில் ரூ.1749, சென்னையில் ரூ.1,960, கொல்கத்தாவில் ரூ.1,911 என விற்பனை செய்யப்பட்டு வந்தது.
தற்போது லோக்சபா தேர்தலுக்கான பிரசாரம் நடைபெற்று வருகிறது. இந்த நிலையில் திடீரென வணிகப் பயன்பாட்டு சமையல் எரிவாயு சிலிண்டர் விலை ரூ30 குறைக்கப்பட்டுள்ளது. இது பொதுமக்களுக்கு மகிழ்ச்சியான செய்திதான்.
இதனைத் தொடர்ந்து வணிக பயன்பாட்டு சமையல் எரிவாயு சிலிண்டர் ரூ,1,765, மும்பையில் ரூ.1719, சென்னையில் ரூ.1,930 என விற்பனை செய்யப்பட்டு வருகிறது. இது இன்று முதல் நடைமுறைக்கு வந்தது.
Click it and Unblock the Notifications
Sign in with Google