தமிழக அரசுடன் மோத வேண்டும் என்ற எண்ணம் இருந்தால்... அதை ஆளுநர் கைவிட வேண்டும் -முத்தரசன்

Published: Sunday, October 31, 2021, 16:20 [IST]

Subscribe to Oneindia Tamil

சென்னை: தமிழக அரசுடன் மோத வேண்டும் என்ற எண்ணம் இருந்தால், அதை ஆளுநர் உடனடியாக கைவிட வேண்டும் என இந்திய கம்யூனிஸ்ட் கட்சியின் மாநிலச் செயலாளர் முத்தரசன் வலியுறுத்தியுள்ளார்.

தேசியக் கல்விக் கொள்கை விவகாரத்தில் எதிர்மறையான போக்கை ஆளுநர் கடைபிடிப்பதாக அவர் குற்றஞ்சாட்டியுள்ளார்.

இது தொடர்பாக மேலும் அவர் கூறியிருப்பதாவது;

எதிர்மறை நடவடிக்கை

''தமிழ்நாட்டின் புதிய ஆளுநராகப் பொறுப்பேற்றுள்ள ஆர்.என்.ரவி நேற்று பல்கலைக்கழகத் துணைவேந்தர்களின் கலந்தாலோசனைக் கூட்டம் நடத்தியுள்ளார். வேந்தர், துணை வேந்தர்களை அழைத்துப் பேசுவது வழக்கமான ஒன்று, எனினும் தமிழ்நாடு ஒருமுகமாக நின்று, எதிர்ப்புத் தெரிவிக்கும் தேசியக் கல்விக் கொள்கையைப் படிப்படியாக அமல்படுத்த வேண்டும் என அறிவுறுத்தியிருப்பது எதிர்மறைப் போக்காகும்.''

தமிழகத்தின் தனித்துவம்

''இது மக்கள் தேர்ந்தெடுத்த அரசின் கொள்கை வகுக்கும் செயல்பாட்டில் குறுக்கிடுவதாகும். தமிழ்நாட்டின் தனித்துவத்தைக் கருத்தில் கொண்டு புதிய கல்விக் கொள்கை உருவாக்கப்படும் என முதல்வர் மக்களுக்கு உறுதியளித்துள்ள நிலையில், மக்கள் உணர்வுக்கு எதிராக ஆளுநர் தேசியக் கல்விக் கொள்கையைக் குறுக்கு வழியில் அமல்படுத்த முயற்சிப்பது அமைதியை பாதிக்கும் செயலாகும்.''

இந்திய கம்யூ.

''ஆளுநர் மாளிகைக்கு மாநில அரசுடன் மோதல் போக்கைக் கடைப்பிடிக்கும் எண்ணம் இருந்தால் அது உடனடியாகக் கைவிடப்பட வேண்டும் என வலியுறுத்துகிறோம். தமிழ்நாடு அரசின் உயர் கல்வித் துறையுடன் இசைவாகச் செல்லும் இணக்கமான வழிமுறையை ஆளுநர் பின்பற்ற வேண்டும் என இந்தியக் கம்யூனிஸ்ட் கட்சியின் தமிழ்நாடு மாநிலச் செயற்குழு கேட்டுக் கொள்கிறது.''

அறிக்கை

தமிழகத்தில் செயல்படுத்தப்படும் திட்டங்கள் குறித்து தனக்கு விளக்க வேண்டும் என ஆளுநர் ரவி தலைமைச் செயலாளர் இறையன்புக்கு கடந்த வாரம் கடிதம் எழுதியிருந்தார். இதையடுத்து அந்த கடித்தத்தின் அடிப்படையில், ஒவ்வொரு துறைச் செயலாளர்களுக்கும் திட்டங்களின் விவரங்களை தயாராக வைத்துக்கொள்ளுமாறு தலைமைச் செயலாளர் இறையன்பு கடிதம் எழுதினார். இது அரசியல் சர்ச்சையாகிய பிறகு தலைமைச் செயலாளர் விளக்கம் அளித்தார். இந்நிலையில் நேற்று உயர்க்கல்வித்துறை அதிகாரிகள் மற்றும் துணை வேந்தர்களை அழைத்து ஆலோசனைக் கூட்டம் நடத்தியிருக்கிறார் ஆளுநர். இதற்கும் இப்போது எதிர்ப்புகள் கிளம்பியுள்ளன.

Published On October 31, 2021