லேண்ட் ரோவர் டிஃபென்டரால் எழுந்த சர்ச்சை! Toyota Vellfire-க்கு மாறிய விஜய்! "ஆதவ்விற்கு" ஃபுல்ஸ்டாப்

Updated: Saturday, May 16, 2026, 10:58 [IST]

Subscribe to Oneindia Tamil

சென்னை: அமைச்சர் ஆதவ் அர்ஜுனாவின் நிறுவனத்திற்கு சொந்தமான காரை பயன்படுத்திய முதல்வர் விஜய்க்கு விமர்சனங்கள் எழுந்த நிலையில் நேற்று முதல் தனது சொந்த காரிலேயே அவர் தலைமைச் செயலகத்திற்கு சென்று வருகிறார்.

தமிழக வெற்றிக் கழகத்தின் தலைவரான விஜய், நடந்து முடிந்த சட்டசபைத் தேர்தலில் களம் கண்டு, பெரும் வெற்றி பெற்று கடந்த மே 10ஆம் தேதி தமிழகத்தின் புதிய முதல்வராகப் பொறுப்பேற்றுக் கொண்டார்.

ஆட்சிப் பொறுப்பேற்றது முதல் அவரது ஒவ்வொரு நகர்வும் உன்னிப்பாகக் கவனிக்கப்பட்டு வரும் நிலையில், அவர் பயன்படுத்திய வாகனங்கள் பெரும் விவாதத்தை கிளப்பின.

சர்ச்சையின் பின்னணி என்ன?

தேர்தல் முடிவுகள் வெளியாகி, தான் வெற்றி பெற்றதை அறிவித்த அந்த முக்கிய நாளில், முதல்வர் விஜய் தனது கட்சியின் முக்கிய நிர்வாகியும், தற்போதைய அமைச்சருமான ஆதவ் என்பவருக்குச் சொந்தமான 'லேண்ட் ரோவர் டிபெண்டர்' (Land Rover Defender) ரக காரைப் பயன்படுத்தினார்.

அடுத்தடுத்த நாட்கள்: அதன் பிறகு, பாதுகாப்பு மற்றும் சொகுசு வசதிகள் நிறைந்த 'டொயோட்டா லேண்ட் க்ரூஸர்' (Toyota Land Cruiser) காரை முதல்வர் பயன்படுத்தத் தொடங்கினார்.

எழுந்த விமர்சனங்கள்

அமைச்சர் ஆதவின் நிறுவனத்திற்குச் சொந்தமான காரையே முதல்வர் விஜய் தொடர்ந்து பயன்படுத்தி வந்தார். ஒரு மாநிலத்தின் முதல்வர், தனியார் நிறுவனத்தின் பெயரிலும், தனது அமைச்சரவை சகாவின் நிறுவனப் பெயரிலும் இருக்கும் வாகனங்களை அரசு முறைப் பயணங்களுக்கும், தனது சொந்தப் பயன்பாட்டிற்கும் பயன்படுத்துவது 'ஆதாய முரண்பாடு' (Conflict of Interest) மற்றும் விதிமீறல் என்று எதிர்க்கட்சிகளும், அரசியல் விமர்சகர்களும் சமூக வலைத்தளங்களில் கடுமையான விமர்சனங்களை முன்வைத்தனர்.

முதல்வர் எடுத்த அதிரடி முடிவு

இந்தத் தொடர் விமர்சனங்களுக்கு முற்றுப்புள்ளி வைக்கும் விதமாக, முதல்வர் விஜய் நேற்று முதல் அரசு மற்றும் சொந்தப் பயன்பாடுகளுக்குத் தனது சொந்த காரைப் பயன்படுத்தத் தொடங்கியுள்ளார்.

சொந்த வாகனத்தின் விவரம்: அவர் தற்போது பயன்படுத்தத் தொடங்கியுள்ள கார் 'டொயோட்டா வெல்பயர்' (Toyota Vellfire) ரகத்தைச் சேர்ந்ததாகும். அல்ட்ரா-சொகுசு (Ultra-luxury) ரக எம்பிவி (MPV) காரான இதன் தற்போதைய சந்தை மதிப்பு சுமார் ₹1.50 கோடி ஆகும்.

அரசியல் ரீதியாக எழும் தேவையற்ற விமர்சனங்களைத் தவிர்க்கவும், வெளிப்படைத்தன்மையை நிலைநாட்டவும் முதல்வர் விஜய் இந்த உடனடி முடிவை எடுத்துள்ளதாகத் தவெக தரப்பு வட்டாரங்கள் தெரிவிக்கின்றன. இதன் மூலம் தனக்கு எதிராக எழுந்த முதல் பெரிய காரசாரமான விமர்சனத்திற்கு அவர் முற்றுப்புள்ளி வைத்துள்ளார்.