தமிழகத்தில் திமுக ஆட்சியே தொடரும்! சீமானுக்கு பெருத்த ஏமாற்றம்! மின்னம்பலம் சர்வே

சென்னை: தமிழகத்தில் திமுக ஆட்சியே தொடரும் என்றும் நாம் தமிழர் கட்சிக்கு ஒரு இடம் கூட கிடைக்காது என்றும் மின்னம்பலம் கருத்துக் கணிப்புகளை வெளியிட்டுள்ளது.

தமிழகத்தில் சட்டசபை தேர்தல் கடந்த 23 ஆம் தேதி நடைபெற்றது. இந்த தேர்தலில் தமிழகத்தில் 85 சதவீதம் வாக்குகள் பதிவாகின. இது சதவீதம் அளவில் உயர்ந்திருந்தாலும் கடந்த காலங்களை வாக்களித்தவர்களின் எண்ணிக்கையை பொருத்தமட்டில் பெரிய அளவில் வாக்குப் பதிவில் புரட்சி நடக்கவில்லை என்றே நிபுணர்கள் சொல்கிறார்கள்.

பொதுவாக தேர்தல் முடிந்ததுமே தேர்தலுக்கு பிந்தைய கருத்துக் கணிப்புகள் வெளியாகும். ஆனால் இந்த முறை மேற்கு வங்கத்தின் 2ஆம் கட்ட தேர்தல் இன்று (ஏப்.29) முடிவடைந்ததால் எக்சிட் போல்களை வெளியிட தேர்தல் ஆணையம் தடை விதித்திருந்தது.

தற்போது மேற்கு வங்க தேர்தல் நடந்து முடிந்த நிலையில் தமிழகம், புதுவை, அஸ்ஸாம், கேரளா, மேற்கு வங்கம் ஆகிய 5 மாநிலங்களுக்கான எக்சிட் போல் வெளியாகியுள்ளது.

தமிழகத்தில் மொத்தம் 234 சட்டசபை தொகுதிகள் உள்ளன. இந்த தேர்தலில் தனி பெரும்பான்மைக்கு 118 இடங்கள் தேவை. கடந்த 2021 ஆம் ஆண்டு நடந்த சட்டசபை தேர்தலில் திமுக 133 தொகுதிகளில் வென்று தனிப்பெரும்பான்மை பலத்தை பெற்றது. அது போல் அதிமுக 66 இடங்களிலும், காங்கிரஸ் கட்சி 18 இடங்களிலும் பாமக 5 இடங்களிலும், பாஜக 4 இடங்களிலும், விசிக 4 இடங்களிலும், கம்யூனிஸ்ட், மார்க்சிஸ்ட் கட்சிகள் தலா 2 இடங்களிலும் வென்றன.

இன்றைய தினம் மின்னம்பலம் கருத்துக் கணிப்புகளை வெளியிட்டுள்ளது. இந்த வாக்குப் பதிவுக்கு பின் ஒவ்வொரு சட்டசபை தொகுதியிலும் 200 பேர் வீதம் 234 தொகுதிகளிலும் 46,800 பேரிடம் யாருக்கு வாக்களித்தீர்கள்? என கேட்கப்பட்டது.

அதில் திமுக கூட்டணி 155 இடங்களில் வென்று ஆட்சியை தக்க வைத்துக் கொள்ளும். அதிமுக கூட்டணி 72 இடங்களிலும் தவெக 5 இடங்களிலும் வெல்லும் என கணிக்கப்பட்டுள்ளது.

நாம் தமிழர் கட்சிக்கு ஒரு தொகுதி கூட வெல்லாது என கணிக்கப்பட்டுள்ளது. புதிதாக கட்சி தொடங்கிய விஜய் கூட ஒற்றை இலக்கம், இரட்டை இலக்கத்தில் இடங்களை பிடிக்கும் என கணித்துள்ள நிலையில் 10 ஆண்டுகளுக்கு மேலாக கட்சி நடத்தி வரும் சீமான், இதுவரை ஒரு தேர்தலில் கூட வெல்லவில்லை. எனினும் வாக்கு சதவீதத்தின் அடிப்படையில் அந்த கட்சிக்கு தேர்தல் ஆணையம் அங்கீகாரம் கொடுத்துள்ளது.

English summary

Minnambalam’s latest opinion poll predicts that DMK will continue in power in Tamil Nadu, while Naam Tamilar Katchi (NTK) may not secure even a single seat in the 2026 Assembly elections, indicating a tough battle for the party.