12 சீட் கேட்கலாம் பிகிலு 12 வேட்பாளர் யாரு இருக்கா? காங்கிரஸை ஓடஓட விரட்டும் ஸ்டாலின், அகிலேஷ்!

சென்னை: லோக்சபா தேர்தலில் தமிழ்நாட்டில் டபுள் டிஜிட் சீட் கேட்கும் காங்கிரஸ் கட்சியிடம் வெல்லும் வாய்ப்புள்ள வேட்பாளர்கள் யார் என திமுக தலைமை கேட்பதால் காங்கிரஸ் கட்சியால் எதுவும் பேசமுடியவில்லையாம். உத்தரப்பிரதேசத்திலும் திமுக தலைமையை போலவே சமாஜ்வாதி கட்சியும் காங்கிரஸிடம் வேட்பாளர் பட்டியல் கேட்பதால் காங்கிரஸ் மேலிடம் கனத்த மவுனம் காக்கிறதாம்.

லோக்சபா தேர்தலில் பாஜகவை வீழ்த்த 'இந்தியா' கூட்டணியை எதிர்க்கட்சிகள் உருவாக்கி உள்ளன. "இந்தியா" கூட்டணியில் பிரதான எதிர்க்கட்சிகள் இடம்பெற்றுள்ளன. நாடு தழுவிய அளவில் பாஜகவுக்கு எதிரான பொதுவேட்பாளர்களை நிறுத்துவது தொடர்பாக "இந்தியா" கூட்டணி விவாதித்து வருகிறது.

அத்துடன் ஒவ்வொரு மாநிலத்திலும் வெல்லும் வாய்ப்புள்ள இடங்களை மட்டுமே கூட்டணி கட்சிகள் கேட்டுப் பெற்றுக் கொள்ள வேண்டும் என்பதும் "இந்தியா" கூட்டணிக்குள் உருவாகி இருக்கும் புரிதலாகவும் கூறப்படுகிறது.

ஸ்டாலின் போட்ட போடு: தமிழ்நாட்டில் கடந்த லோக்சபா தேர்தலில் 10 இடங்களில் போட்டியிட்ட காங்கிரஸ் 8 தொகுதிகளில் வென்றது. இந்த முறை தமிழ்நாட்டில் எப்படியாவது டபுள் டிஜிட் தொகுதிகளை ஆகக் குறைந்தது அதே 10 தொகுதிகளையாவது பெற வேண்டும் என்பதில் தமிழ்நாடு காங்கிரஸ் முட்டி மோதுகிறது என்பதை ஏற்கனவே நாம் குறிப்பிட்டிருந்தோம். ஆனால் தமிழ்நாட்டில் "இந்தியா" கூட்டணிக்கு தலைமை வகிக்கும் திமுகவோ, ஏற்கனவே வெற்றி பெற்ற 8 இடங்களில் தற்போது உறுதியாக வெல்லும் வாய்ப்புள்ள 4 அல்லது 5 தொகுதிகளைத்தான் தர முடியும் என்கிறதாம் இது தொடர்பாக சோனியா காந்தியிடமும் முறையிட்டுள்ளதாம் தமிழ்நாடு காங்கிரஸ் தரப்பு.

அகிலேஷ் அதிரடி: இதேபோல உத்தரப்பிரதேசத்தில் சமாஜ்வாதி கட்சித் தலைவர் அகிலேஷ் யாதவும் காங்கிரஸை கதிகலங்க வைத்துள்ளாராம். உத்தரப்பிரதேச மாநிலத்தில் மொத்தம் 80 லோக்சபா தொகுதிகள் உள்ளன. இம்மாநிலத்தில் சமாஜ்வாதி கட்சிதான் "இந்தியா" கூட்டணியில் பெரிய கட்சி. இப்போது தொகுதி பங்கீடு குறித்த பேச்சுவார்த்தையை காங்கிரஸ் நடத்துகிறது. சமாஜ்வாதி கட்சித் தலைவர் அகிலேஷ் யாதவ், எங்களிடம் காங்கிரஸ் கட்சி இத்தனை தொகுதி எல்லாம் கேட்க முடியாது; நாங்கள் கொடுக்கிற தொகுதியை வாங்கிக் கொள்ள வேண்டும்; ஏனெனில் வெற்றி வாய்ப்பு உறுதி செய்கிற தொகுதியைத்தான் தருவோம். அது சிங்கிள் டிஜிட்டாக இருந்தாலும் என கறாராக கூறியிருந்தார்.

அகிலேஷும் அதே நிபந்தனை: ஆனாலும் காங்கிரஸ் ரொம்பவே பிகு செய்து கொண்டு 12 சீட் வரை கேட்கிறது. இதனால் கடுப்பாகிப் போன அகிலேஷ் யாதவ், 12 சீட் தருகிறோம்.. 12 தொகுதிகளிலும் போட்டியிட்டு உறுதியாக வெல்லும் வேட்பாளர்கள் யார் என்கிற பட்டியலை எங்க கொஞ்சம் கொடுங்க என நிபந்தனை விதித்திருக்கிறார். இதனால் காங்கிரஸ் கட்சி கையை பிசைந்து கொண்டிருக்கிறது. தமிழ்நாட்டில் திமுக கொடுத்த அதிர்ச்சியில் இருந்து மீளாமல் இருப்பதால் அகிலேஷ் யாதவின் நிபந்தனைகள் குறித்து வழக்கம் போல கனத்த மவுனம் காக்கிறதாம். அந்தோ பரிதாபம்தான்!

English summary

Media Reports sadi that the DMK, SP asked Congress to name seats it wants to contest in Lok Sabha Election 2024.