தமிழக சட்டசபை தேர்தல்: திமுக 109; அதிமுக 101; இழுபறி 24.. இது ரங்கராஜ் பாண்டேவின் எக்ஸிட் போல்

சென்னை: தமிழக சட்டசபை தேர்தலில் திமுக 109 இடங்களிலும் அதிமுக 101 இடங்களில் வெல்லும் வாய்ப்புகள் உள்ளதாகவும் 24 தொகுதிகள் இழுபறியாக இருப்பதாகவும் பத்திரிகையாளர் ரங்கராஜ் பாண்டேவின் சாணக்யா யூ டியூப் சேனல் எக்ஸிட் போல் முடிவுகள் தெரிவிக்கின்றன.

தமிழகம், புதுவை, கேரளா, மேற்கு வங்கம் மற்றும் அஸ்ஸாம் மாநில சட்டசபை தேர்தல் வாக்குப் பதிவுகள் முழுமையாக நிறைவடைந்தன. இதனையடுத்து நேற்று இரவு தேர்தலுக்குப் பிந்தைய கருத்து கணிப்பு முடிவுகள் வெளியிடப்பட்டன.

தமிழகத்தைப் பொறுத்தவரையில் இதுவரை வெளியான கருத்து கணிப்புகள் அனைத்திலும் திமுக அணி, ஆட்சி அமைக்க தேவையான பெரும்பான்மை (118) இடங்களைப் பெறும்; அதிகபட்சமாக 195 இடங்களை திமுக கூட்டணி கைப்பற்றும் என தெரிவித்துள்ளன. அதிமுக கூட்டணிக்கு 40 தொகுதிகள் முதல் அதிகபட்சமாக 70 தொகுதிகள் வரை கிடைக்கலாம் எனவும் எக்ஸிட் போல் முடிவுகள் தெரிவித்திருந்தன.

பாண்டேவின் எக்ஸிட் போல்

இதேபோல் பத்திரிகையாளர் ரங்கராஜ் பாண்டே நடத்தி வரும் சாணக்யா யூ டியூப் சேனல் சார்பாகவும் எக்ஸிட் போல் முடிவுகள் வெளியிடப்பட்டன. ஒவ்வொரு தொகுதி வாரியாக யார் வெற்றி பெற வாய்ப்பு உள்ளது என்பதில் தொடங்கி எந்த கட்சிக்கு எத்தனை இடங்கள்? முதல்வராக யாருக்கு ஆதரவு என்பது உள்ளிட்டவை இந்த எக்ஸிட் போல் முடிவுகளில் இடம்பெற்றிருந்தன.

திமுகவுக்கு 109 இடங்கள்

இதன்படி திமுக 109 இடங்களையும் அதிமுக 101 இடங்களையும் கைப்பற்றுமாம். 24 தொகுதிகளில் இழுபறி நிலைமை இருக்கிறது என்கிறது சாணக்யாவின் எக்ஸிட் போல். தேர்தலுக்கு முந்தைய கருத்து கணிப்பில் திமுகவுக்கு 110; அதிமுகவுக்கு 95 இடங்கள் கிடைக்கும்; 29 இடங்கள் இழுபறியாக இருக்கும் என சாணக்யா தெரிவித்திருந்தது.

எடப்பாடி பழனிசாமிக்கு ஆதரவு

யார் முதலமைச்சராக வரவேண்டும் என்று நினைக்கிறீர்கள்? என்ற கேள்விக்கு எடப்பாடி பழனிசாமிக்கு 46.09% பேரும் மு.க. ஸ்டாலினுக்கு 44.45% பேரும் ஆதரவு தெரிவித்துள்ளனராம். மற்றவர்களுக்கு 9.46% ஆதரவு இருப்பதாக கூறுகிறது பாண்டேவின் சாணக்யா யூ டியூப் சேனல் கணிப்பு.

திமுகவுக்கு ஆதரவு

அதேநேரத்தில் எந்த கட்சி வெற்றி பெறும் என்று நினைக்கிறீர்கள்? என்ற கேள்விக்கு திமுக கூட்டணி வெல்லும் என 49.59% பேரும் அதிமுக கூட்டணி வெற்றி பெறும் என 44.26% பேரும் கருத்து தெரிவித்துள்ளனராம். இதுவரை வெளியான கருத்து கணிப்புகளில் திமுகவுக்கு தனிப்பெரும்பான்மை கூட கிடைக்காது என்பதை பூடகமாக சொல்லுகிறது ரங்கராஜ் பாண்டேவின் சாணக்யா யூ டியூப் சேனல் என்பது குறிப்பிடத்தக்கது.

English summary

Rangaraj Pandey's Chanakya's Exit Poll Predicts DMK will get only 109 seats.