UGC-NET- "நெட்"தேர்வை திடீரென ரத்து செய்த மத்திய அரசு... எதற்காக இந்த தேர்வு? யார் எல்லாம் எழுதியது?
சென்னை: மத்திய அரசு தேர்வு முகமை நடத்திய "நெட்" - UGC-NET தேர்வுகள் நேற்று நடைபெற்றது. ஆனால் நெட் தேர்வில் முறைகேடுகள் நடந்திருக்கலாம் என சைபர் கிரைம் தரப்பில் தெரிவிக்கப்பட்டதால் நேற்று நடைபெற்ற நெட் தேர்வு ரத்து செய்யப்படுவதாகவும் சிபிஐ விசாரணைக்கு பரிந்துரைத்திருப்பதாகவும் மத்திய அரசு தெரிவித்துள்ளது.
இளங்கலை மருத்துவ படிப்புகளுக்கான நீட் நுழைவுத் தேர்வில் நடைபெற்ற முறைகேடுகள் பெரும் அதிர்ச்சியை ஏற்படுத்தியுள்ளன. இது தொடர்பாக பலரும் கைது செய்யப்பட்டு வருகின்றனர். நீட் நுழைவுத் தேர்வு முறைகேடுகள் விவகாரத்தில் உச்சநீதிமன்றமும் தலையிட்டுள்ளது. இது தொடர்பான வழக்கு ஜூலை 8-ந் தேதி விசாரணைக்கு வருகிறது.
இந்த நிலையில் இன்று இரவு மத்திய அரசு திடீரென நேற்று நடைபெற்ற நெட் தேர்வுகளை ரத்து செய்வதாக அறிவித்துள்ளது பெரும் பரபரப்பை ஏற்படுத்தி உள்ளது. முறைகேடுகள் அம்பலமானதால் நீட் நுழைவுத் தேர்வை ரத்து செய்து மறு தேர்வு நடத்த வேண்டும்; நீட் தேர்வு முறையையே கைவிட வேண்டும் என குரல்களும் போராட்டங்களும் வலுத்து வரும் நிலையில் நெட் தேர்வு நடைபெற்ற மறுநாளே ரத்து செய்யப்பட்டுள்ளது விவாதத்துக்குள்ளாகி இருக்கிறது. சரி அது என்ன "நெட்" தேர்வு?
நாடு முழுவதும் கல்லூரிகளில் உதவிப் பேராசிரியராக (Asst. Prof) பணிபுரிவதற்கு NET அல்லது SET ஆகிய தேர்வுகளில் ஒன்றில் தேர்ச்சி பெற்றிருத்தல் அவசியம். நெட் தேர்வு எழுதி பாஸ் செய்தால் இளநிலை ஆராய்ச்சி நிதியுதவி- Junion Research Fellow மூலமாக மாத நிதி உதவி பெற்று முனைவர் பட்டம் பெறலாம். இதற்காகவும் நெட் தேர்வு எழுதப்படுகிறது.
PG படித்தவர்கள் - முதுகலை, முது அறிவியல், முது வணிகவியல் அதாவது MA, MSc, MCom ஆகியவற்றில் ஏதேனும் ஒன்றில் பட்டம் பெற்றிருந்தால் நெட் தேர்வு எழுதலாம். இந்த படிப்புகளில் இறுதியாண்டு படிப்பவர்களும் கூட நெட் தேர்வு எழுதலாம். தேர்வு முடிவுகள் வெளியாகாமல் இருந்தாலும் தேர்வு முடிவுகளுக்காக காத்திருப்போரும் கூட நெட் தேர்வு எழுதலாம்.
நெட் தேர்வானது கலைப் பாடங்கள், மொழிப் பாடங்கள், சமூக அறிவியல், கணினி அறிவியல் பயன்பாடு, மின்னணு அறிவியல் உள்ளிட்ட பாடங்களில் எழுதலாம்.
நடப்பாண்டில் நாடு முழுவதும் மொத்தம் 11 லட்சம் பேர் நெட் தேர்வு எழுதினர். வழக்கமாக கணிணி மூலமாக நெட் தேர்வு நடத்தப்படும். ஆனால் இம்முறை OMR சீட் மூலம் நெட் தேர்வு நடத்தப்பட்டது குறிப்பிடத்தக்கது.
Click it and Unblock the Notifications
Sign in with Google