குடியரசுத் தலைவர் தேர்தல் 2022: முதல்வர் ஸ்டாலினை சந்திக்கிறார் திரௌபதி முர்மு! என்ன செய்ய போகிறார்?

Published: Tuesday, June 28, 2022, 10:33 [IST]

Subscribe to Oneindia Tamil

சென்னை: தேசிய ஜனநாயக கூட்டணியின் குடியரசுத் தலைவர் வேட்பாளர் திரௌபதி முர்மு அனைத்து கட்சித் தலைவர்களையும் சந்தித்து ஆதரவு திரட்ட முடிவு செய்துள்ளார். இந்த நிலையில் அவரை முதல்வர் ஸ்டாலின் சந்திப்பாரா என்ற கேள்வி எழுந்துள்ளது.

குடியரசுத் தலைவராக உள்ள ராம்நாத் கோவிந்தின் பதவிக்காலம் இந்த மாதத்துடன் முடிவடைகிறது. இதையடுத்து ஜூலை 18 ஆம் தேதி குடியரசுத் தலைவர் தேர்தல் நடைபெறுகிறது.

இந்த தேர்தலில் பாஜக சார்பில் யார் வேட்பாளராக நிறுத்தப்படுவார் என்ற எதிர்பார்ப்பு இருந்தது. தமிழிசை சவுந்திரராஜன், வெங்கைய நாயுடு உள்ளிட்டோர் மற்ற கட்சிகளுடன் இணக்கமான போக்கை கொண்டுள்ளார்கள்.

வேட்பாளர்

இதனால் அவர்களில் ஒருவரை வேட்பாளராக நிறுத்தினால் எதிர்க்கட்சிகள் ஆதரவு தர கூடும் என பாஜக கருதுவாக தகவலறிந்த வட்டாரங்கள் தெரிவித்தன. ஆனால் பாஜகவோ பழங்குடியினத்தை சேர்ந்த திரௌபதி முர்முவுக்கு வாய்ப்பை கொடுத்தது. கடந்த முறை தாழ்த்தப்பட்ட வகுப்பை சேர்ந்த ராம்நாத் கோவிந்துக்கு வாய்ப்பு கொடுக்கப்பட்டிருந்தது.

ஒய் எஸ் ஆர் காங்கிரஸ்

திரௌபதி முர்முவுக்கு ஒய் எஸ் ஆர் காங்கிரஸ், பாமக தமாக, பகுஜன் சமாஜ், ஜார்க்கண்ட் முக்தி மோர்ச்சா, பிஜு ஜனதா தளம் உள்ளிட்ட கட்சிகள் ஆதரவு தெரிவித்துள்ளன. அது போல் பாஜகவுக்கு எதிராக காங்கிரஸ் உள்ளிட்ட கட்சிகள் இணைந்து யஷ்வந்த் சின்ஹாவை நிறுத்தியுள்ளனர்.

யஷ்வந்த் சின்ஹா

யஷ்வந்த் சின்ஹா பாஜகவில் இருந்தவர். பிரதமர் மோடி மற்றும் அமைச்சர் அமித்ஷாவால் ஓரங்கட்டப்பட்டவர்களில் யஷ்வந்தும் ஒருவர். இவர் பிரதமர் மோடிக்கு போன் போட்டு தனக்கு ஆதரவு தருமாறு கேட்டுக் கொண்டுள்ளார். இவருக்கு திமுகவும் ஆதரவு கொடுத்துள்ளது.

ஜூலை 1 ஆம் தேதி

இந்த நிலையில் ஜூலை 1 ஆம் தேதி முதல் நாடு முழுவதும் பயணம் செய்து தனக்கு ஆதரவு கோர முர்மு திட்டமிட்டுள்ளார். அதற்கான ஏற்பாடுகளை மத்திய அமைச்சர் கஜேந்திர சிங் ஷெகாவத் தலைமையிலான 14 பேர் கொண்ட குழு செய்து வருகிறது. எதிர்க்கட்சித் தலைவர்களையும் சந்தித்து ஆதரவு திட்ட முர்மு திட்டமிட்டுள்ளார்.

முதல்வர் ஸ்டாலின்

ஜூலை முதல் வாரத்தில் சென்னை வர திட்டமிட்டுள்ள முர்மு, திமுக தலைவரும் தமிழக முதல்வருமான ஸ்டாலினை சந்தித்து ஆதரவு அளிக்குமாறு கோரவுள்ளதாக பாஜகவினர் தெரிவித்துள்ளனர். சமூகநீதி என்கிறீர்களே திரௌபதி முர்முவுக்கு ஆதரவு தாருங்கள் என தமிழக பாஜக மூத்த தலைவர்கள் முதல்வர் ஸ்டாலினை விமர்சித்திருந்தனர். இந்த நிலையில் பாஜக எதிர்ப்பில் உறுதியாக இருக்கும் திமுக, யஷ்வந்த் சின்ஹாவுக்கு ஆதரவு என கூறிவிட்ட நிலையில் முர்முவை முதல்வர் ஸ்டாலின் சந்திப்பாரா இல்லை மரியாதை நிமித்தமாக சந்தித்து தனது நிலைப்பாட்டை எடுத்துரைப்பாரா என்பது போக போகத் தான் தெரியும்.

Published On June 28, 2022