யதார்த்தமான படம்.. ஐஸ்வர்யா ராஜேஷின் “ஃபர்ஹானா” முஸ்லிம்களுக்கு எதிரானது அல்ல - எஸ்டிபிஐ சர்டிபிகேட்

சென்னை: ஐஸ்வர்யா ராஜேஷ் நடித்துள்ள ஃபர்ஹானா திரைப்படத்தில் இஸ்லாமியர்களுக்கு எதிரான காட்சிகளோ, வசனங்களோ இல்லை என்று எஸ்டிபிஐ கட்சி தெரிவித்து உள்ளது.

இதுகுறித்து எஸ்டிபிஐ கட்சி வெளியிட்டு இருக்கும் அறிவிப்பில் தெரிவிக்கப்பட்டு இருப்பதாவது, "ஃபர்ஹானா திரைப்படம் சிறுபான்மை சமூக மக்களுக்கு எதிராக உள்ளது என்ற சர்ச்சை எழுந்த நிலையில் அத்திரைப்படத்தின் இயக்குனர் திரு.நெல்சன் அவர்கள் அழைப்பில் அரசியல் கட்சிகள், அமைப்புகளின் தலைவர்கள் பங்குபெற்ற சிறப்பு காட்சி (Preview Show) திரையிடல் சென்னையில் நடைபெற்றது.

இதில் எஸ்டிபிஐ கட்சியின் சார்பில் மாநில பொதுச் செயலாளர் அச.உமர் பாரூக், மாநில செயலாளர் ஏ.கே.கரீம், சென்னை வடக்கு மண்டல தலைவர் முஹம்மது ரஷீத், தென் சென்னை வடக்கு மாவட்ட தலைவர் முஹம்மது சலீம் ஆகியோர் கலந்து கொண்டனர். திரைப்படத்தின் இறுதியில் மாநில பொதுச் செயலாளர் அ.ச.உமர் பாரூக் அவர்கள், " ஃபர்ஹானா திரைபடத்தில் எவ்வித சர்ச்சை காட்சிகளோ அவதூறுகளோ இல்லை.

எளிய பின்னணியை கொண்ட ஒரு பெண்ணின் வாழ்வியலை மிக யதார்த்தமாக மட்டுமே காட்சிபடுத்தபட்டு உள்ளது எனவும் தெரிவித்தார். மேலும் சமூக பொறுப்பு உணர்வோடு வீண் சர்ச்சைகளை தவிர்க்கும் வகையில் முன்கூட்டியே திரையிட்டு சர்ச்சைகளுக்கு முற்றுப்புள்ளி வைத்த இயக்குனர் திரு.நெல்சன் அவர்களுக்கு நன்றியை தெரிவித்துக் கொண்டார்." என்று குறிப்பிட்டு இருந்தார்.

இதற்கு முன்பாக இப்படத்துக்கு எதிராக சில அமைப்புகள் கண்டனம் தெரிவித்த நிலையில், அந்த படத்தை தயாரித்த ட்ரீம் வாரியர் பிக்சர்ஸின் நிறுவனர்களில் ஒருவரான எஸ்.ஆர்.பிரபு இதுகுறித்த அறிக்கையை வெளியிட்டு இருந்தார். அதில், "எங்கள் ட்ரீம் வாரியர் பிக்சர்ஸ் திரைப்படத் தயாரிப்பு நிறுவனம், கைதி, அருவி, தீரன் அதிகாரம் ஒன்று, ஜோக்கர் ஆகிய வெற்றிப்படங்களை தயாரித்து வெளியிட்டுள்ளது. அந்த வரிசையில் தற்போது ஃபர்ஹானா திரைப்படத்தை வரும் மே 12ஆம் தேதி அன்று, ரசிகர்கள் பார்வைக்கு திரையரங்குகளில் வெளியிட உள்ளது.

தொடர்ந்து மக்களை மகிழ்விக்கக்கூடிய, சிந்திக்கத் தூண்டும் சிறப்பான படங்களை தயாரித்து வெளியிட்டு வரும் எங்கள் நிறுவனம் மிகுந்த சமுக பொறுப்புகளை கொண்டே என்றும் செயல்பட்டு வருகிறது. மதநல்லிணக்கம், சமூக ஒற்றுமை, அன்பு ஆகிய உணர்வுகளுக்கு முக்கியத்துவம் வழங்கும் திரைப்படங்களை தயாரித்து வெளியிட்டு வரும் எங்களுக்கு, அரசால் முறையாக தணிக்கைச் செய்யப்பட்டு வெளியாக உள்ள ஃபர்ஹானா திரைப்படம் குறித்து ஒரு சிலர் உருவாக்கும் சர்ச்சைகள் வேதனையைத் தருகிறது.

ஃபர்ஹானா திரைப்படம் எந்த மதத்திற்கும் உணர்வுகளுக்கும் எதிரானது அல்ல. நல்ல திரைப்படங்களை வழங்கவேண்டும் என்பது மட்டுமே எங்கள் நோக்கமே தவிர, ஒருநாளும் எந்த மத உணர்வுகளுக்கும், நம்பிக்கைகளுக்கும் எதிராகவோ, புண்படுத்தும் விதமாகவோ செயல்படுவது அல்ல. மேலும் மனித குலத்திற்கு எதிரான ஒரு செயலை என்றும் எங்கள் கதைகளில் நாங்கள் அனுமதிப்பதில்லை, விரும்புவதுமில்லை.

இதை எங்களின் ஃபர்ஹானா திரைப்படம் குறித்து அறியாமல் சர்ச்சைகளை உருவாக்கி வரும் சகோதர, சகோதரிகள் புரிந்து கொள்ள வேண்டும் என்று நினைக்கிறோம். நம்முடைய தமிழ்நாடு மத நல்லிணக்கத்திற்கு சொர்க்க பூமி. கலைப் படைப்புகளை மிகவும் மதிக்கும் மண். தணிக்கை செய்யப்பட்ட ஒரு திரைப்படத்தை புரிதல் குழப்பத்தினால் அதன் வெளியீட்டுக்கு முன்பே எதிர்ப்பதும், சர்ச்சைகளுக்கு ஆளாக்குவதும் முறையானதல்ல.

அது அவ்வாறு எதிர்பவர்களையே சரியான புரிதலற்றவர்களாகவே காட்டும். பல நூறு பேரின் கடுமையான உழைப்பில் தான் ஒரு திரைப்படம் வெளியாகிறது. நோக்கத்தில் பழுதில்லா ஒரு திரைப்படத்தை தமிழ் ரசிகர்கள் ஆதரிப்பார்கள் என்று நம்புகிறோம். இந்தியா போலவே, குறிப்பிட்ட சில வெளிநாடுகளிலும், மத உணர்வுகள் புண்படுவது போன்ற காட்சிகள் ஒரு திரைப்படத்தில் இருந்தால், அந்தப் படம் தணிக்கையைத் தாண்டுவது மிகக் கடினம்.

குறிப்பாக மலேசியா, சிங்கப்பூர், ஓமன், பக்ரைன், ஐக்கிய அரபு நாடுகள், ஆகிய நாடுகளின் தணிக்கை விதிகள் கடுமையானதாக இருக்கும். ஆனால் மேற்குறிப்பிடப்பட்டுள்ள அந்த நாடுகளிலேயே ஃபர்ஹானா திரைப்படம், எந்தவித சிக்கலும் இன்றி தணிக்கை செய்யப்பட்டு வெளியீடுக்குத் தயாராகிவிட்டது.

இதுவே ஃபர்ஹானா எந்த விதமான சர்ச்சையையும் உள்ளடக்காத படம் என்பதை தெளிவுபடுத்துகிறது. எனவே ஃபர்ஹானா திரைப்படம் குறித்து புரிந்து கொள்ளாத நண்பர்கள் இந்த விளக்கத்தை நல்லமுறையில் ஏற்று, தோழமையுடன் ஒத்துழைப்பை வழங்கிடப் பணிவன்புடன் கோருகிறோம்." என்று தெரிவித்து உள்ளார்.

English summary

The SDPI party has stated that there are no anti-Muslim scenes or dialogues in the movie Farhana starring Aishwarya Rajesh.