டிராகனின் வெள்ளி வேட்டை.. சீனாவைச் சுழற்றியடிக்கும் சில்வர் ஜுரம்.. வெள்ளி இனி குட்டித்தங்கம்.. ஏன்?

Updated: Sunday, March 22, 2026, 10:21 [IST]

Subscribe to Oneindia Tamil

சென்னை: ஷென்சென் நகரின் ஷுய்பேய் (Shuibei) மார்க்கெட்டில் இப்போது காலடி எடுத்து வைத்தால், மஞ்சள் நிறத்தை விட வெள்ளை நிறத்தின் ஜொலிப்புதான் கண்ணைப் பறிக்கிறது. "தங்கம் வாங்கப் போனோம்... விலையைப் பார்த்துட்டு வெள்ளி பாரை வாங்கிட்டு வரோம்" என்பதுதான் அங்கிருக்கும் சாமானிய மக்களின் தாரக மந்திரமாக இருக்கிறது.

எட்டு ஆண்டு சாதனை:

2026-ன் தொடக்கமே சீனாவுக்கு ஒரு 'சில்வர் ஜூபிலி' கொண்டாட்டமாகத்தான் அமைந்திருக்கிறது. கடந்த எட்டு ஆண்டுகளில் இல்லாத அளவுக்கு, இந்த ஆண்டின் முதல் இரண்டு மாதங்களில் மட்டும் சுமார் 790 டன் வெள்ளியை சீனா இறக்குமதி செய்துள்ளது. பிப்ரவரி மாதத்தில் மட்டும் 470 டன்! இது அந்த மாதத்திற்கான வரலாற்றுச் சாதனை என்கிறது சீன சுங்கத் துறை.

ஏன் இந்தத் திடீர் பசி?

இதற்குப் பின்னால் இரண்டு முக்கிய காரணங்கள் ஒளிந்திருக்கின்றன:

சோலார் மிரட்டல்: உலகின் சோலார் தகடு உற்பத்தியில் சீனா ஒரு ஜாம்பவான். ஏப்ரல் 1 முதல் ஏற்றுமதி வரிச் சலுகைகள் நீக்கப்பட உள்ளதால், அதற்கு முன்பே உற்பத்தியைப் பெருக்க சோலார் நிறுவனங்கள் வெள்ளியை அள்ளிக் குவித்து வருகின்றன.

பதிலீடு முதலீடு: ஒரு பக்கம் தங்கம் விலை விண்ணைத் தொட்டு (சுமார் 5,000 டாலர்) நிற்க, மறுபக்கம் ஒரு அவுன்ஸ் வெள்ளி 70 டாலர் என்ற அளவில் கிடைக்கிறது. "தங்கம் கைக்கெட்டாத உயரத்தில் இருப்பதால், மக்கள் வெள்ளியை நோக்கித் திரும்பியுள்ளனர்" என்கிறார் சந்தை ஆய்வாளர் சாங் ஜியாங்ஜென்.

பங்குச்சந்தை அதிரடி:

ஆண்டின் தொடக்கத்தில் வெள்ளி விலை ஒரே அடியாக 70% உயர்ந்து, பின்னர் ஜனவரி இறுதியில் சரிந்தது. இந்த ஏற்ற இறக்கங்கள் ஒருபுறம் இருந்தாலும், லண்டன் மற்றும் நியூயார்க் சந்தைகளில் வெள்ளி இருப்பு குறைந்து வருவது உலகளாவிய முதலீட்டாளர்களைக் கவலையில் ஆழ்த்தியுள்ளது.

"சீனாவில் தொழில்துறை மற்றும் முதலீடு என இரண்டு பக்கமும் தேவை அதிகரித்துள்ளது. பிசிகல் சில்வர் (Physical Silver) வாங்குவதில் மக்கள் காட்டும் ஆர்வம் ஆச்சரியமாக இருக்கிறது," என்கிறார் ஸ்விஸ் ரிஃபைனரி நிறுவனமான வால்காம்பியின் சி.ஓ.ஓ சிமோன் நோப்லோக்.

லாப வேட்டை:

இந்தச் சூழலைச் சாதகமாக்கிக் கொள்ளும் வியாபாரிகள், ஹாங்காங் வழியாக வெள்ளியைச் சீனாவிற்குள் கடத்தி வருகின்றனர். லண்டன் சந்தையை விட சீனாவில் விலை அதிகமாக இருப்பதால், ஒரு அவுன்ஸிற்கு 8 டாலர் வரை கூடுதல் லாபம் (Premium) கிடைப்பதே இதற்குப் பின்னணியில் இருக்கும் ரகசியம்.

தற்போது ஷென்சென் சந்தையில் வெள்ளி இருப்பு 300 டன்களாக உயர்ந்திருக்கிறது. தற்காலிகமாகத் தேவை சற்று குறைந்திருப்பது போல் தோன்றினாலும், "விலை மீண்டும் ஒருமுறை உயரத் தொடங்கினால் போதும், மக்கள் மீண்டும் வெள்ளியை அள்ளப் படையெடுப்பார்கள்" என்கிறார்கள் சந்தை வல்லுநர்கள்.

சீனாவின் இந்த அசுரத்தனமான வெள்ளி இறக்குமதி மற்றும் சர்வதேச சந்தையில் நிலவும் தட்டுப்பாடு காரணமாக, இந்தியாவிலும் வெள்ளியின் விலை வரும் மாதங்களில் கணிசமாக உயரக்கூடும். பொதுவாகவே தங்கம் விலை எட்டாத உயரத்திற்குச் செல்லும்போது, நடுத்தர வர்க்கத்தினர் 'ஏழைகளின் தங்கம்' என்று அழைக்கப்படும் வெள்ளியில் முதலீடு செய்ய ஆர்வம் காட்டுவார்கள்.

தற்போதைய உலகளாவிய சூழல் இந்த நிலையை மேலும் வலுப்படுத்துகிறது. குறிப்பாக, இந்தியாவின் ஜவுளி மற்றும் மின்னணுத் துறைகளில் வெள்ளியின் பயன்பாடு அதிகம் என்பதால், இறக்குமதி செலவு அதிகரித்து ஆபரணங்கள் மற்றும் வெள்ளிப் பொருட்களின் விலை சாமானியர்களின் பட்ஜெட்டைப் பதம் பார்க்க வாய்ப்புள்ளது.

ஆக, டிராகன் தேசத்தின் வெள்ளி வேட்டை இப்போதைக்கு முடிவதாகத் தெரியவில்லை!