ஜனநாயகன் ரிலீஸ் தாமதம்.. நான் முன்னதாகவே கணித்திருந்தேன்.. முதல்முறையாக வாய் திறந்த விஜய்!

சென்னை: ஜனநாயகன் திரைப்படம் பொங்கலுக்கு திட்டமிட்டபடி ரிலீஸ் ஆகாதது கவலை அளிப்பதாக தவெக தலைவர் விஜய் தெரிவித்துள்ளார். தயாரிப்பாளருக்காக வருத்தப்படுவதாக கூறிய விஜய், என்னுடைய அரசியலுக்காக படங்கள் குறி வைக்கப்படலாம் என்று தயாராக இருந்ததாகவும் தெரிவித்துள்ளார்.

நடிகரும், தவெக தலைவருமான விஜய் நடித்துள்ள ஜனநாயகன் திரைப்படம் தணிக்கை சான்றிதழ் வழங்கப்படாததால் இதுவரை வெளியிடப்படவில்லை. ஜனவரி 9ஆம் தேதி ரிலீஸ் என்று அறிவிக்கப்பட்டு, தணிக்கை சான்றிதழுக்காக டிசம்பர் 20ஆம் தேதி தட்கல் முறையில் விண்ணப்பிக்கப்பட்டுள்ளது. முதற்கட்டமாக டிசம்பர் 22ஆம் தேதி யு/ஏ சான்றிதழ் வழங்குவதாக வாய்மொழியாக கூறியுள்ளனர்.

ஆனால் படத்தை பார்த்த 5 பேர் கொண்ட குழுவில் இடம்பெற்ற ஒருவர் புகார் அளித்ததன் காரணமாக தணிக்கை சான்றிதழ் வழங்கப்படவில்லை. இதனால் ரிவைசிங் கமிட்டிக்கு படத்தை பார்க்க அனுப்ப முடிவு செய்யப்பட்டது. சென்சார் சான்றிதழ் தாமதமாவதால், ஜனநாயகன் படக்குழு நீதிமன்றம் சென்றது. இதன்பின் சென்சாரி வாரியம் இன்னும் படத்தையே பார்க்கவில்லை.

நீதிமன்ற தீர்ப்புக்கு பின்னரே படத்தை பார்த்து சென்சார் சான்றிதழ் தொடர்பாக முடிவு எடுக்கப்படும் என்று தெரிகிறது. இதனிடையே ஜனநாயகன் படக்குழு வழக்கை வாபஸ் பெற்றுக் கொள்ள முடிவு எடுத்துள்ளதாகவும் தகவல் வெளியாகி இருக்கிறது. ஜனநாயகன் படத்திற்கு சென்சார் சான்றிதழ் வழங்காததை கண்டித்து ராகுல் காந்தி, முதல்வர் ஸ்டாலின், காங்கிரஸ் எம்பிக்கள் குரல் கொடுத்தனர்.

இதற்கு விஜய் ஒரு நன்றி கூட தெரிவிக்கவில்லை. அதேபோல் தவெக செயல் வீரர்கள் கூட்டத்திலும் கூட விஜய் ஜனநாயகன் தொடர்பாக பேசவில்லை. இது விஜய் ரசிகர்களிடையே அதிருப்தியை ஏற்படுத்தியுள்ளது. ஏனென்றால் விஜய்யை நம்பி ஜனநாயகன் படத்தை ரூ.500 கோடிக்கு எடுத்த தயாரிப்பாளர் நீதிமன்றத்தில் போராடி வருகிறார். அவருக்கு ஆதரவாக கூட விஜய் ஒரு வார்த்தை பேசவில்லை.

இந்த நிலையில் என்டிடிவி தொலைக்காட்சிக்கு அளித்த பேட்டியில் விஜய் ஜனநாயகன் தொடர்பாக பேசியுள்ளார். அதில் விஜய் பேசுகையில், ஜனநாயகன் படம் திட்டமிட்டபடி ரிலீஸ் ஆகவில்லை. தயாரிப்பாளருக்காக வருத்தப்படுகிறேன். ஆனால் இப்படி நடக்கும் என்று எதிர்பார்த்திருந்தேன். என்னுடைய அரசியலுக்காக என் படங்கள் குறி வைக்கப்படலாம் என்றும் கணித்திருந்தேன்.

அதற்கான மனதளவில் தயாராகவே இருந்தேன் என்று தெரிவித்துள்ளார். மேலும் ஷாரூக் கான் தான் என்னுடைய ரோல் மாடல் என்றும் கூறியுள்ளார். விஜய் தொடக்க காலம் முதலே தன்னை ரஜினி ரசிகராக அடையாளப்படுத்தி வந்திருக்கிறார். இளைய தளபதி பட்டமே ரஜினி படத்தில் இருந்து எடுத்துக் கொண்டதுதான். திடீரென ஷாரூக் கானை ரோல் மாடல் என்று கூறி இருப்பதும் பேசுபொருளாகி இருக்கிறது.

English summary

Jana Nayagan: TVK leader Vijay has expressed his disappointment that the film 'Jananaayagan' did not release as planned for Pongal. Stating that he feels sorry for the producer, Vijay also mentioned that he was prepared for the possibility of his films being targeted because of his political activities.