தமிழக பாஜகவில் ஏகப்பட்ட துணைத் தலைவர்கள்.. அப்ப குஷ்புவுக்கு தேசிய பதவி? ஆனால் கிடைக்கவிடுவாங்களா?
சென்னை: தமிழக பாரதிய ஜனதா கட்சியில் வந்து இணைவோருக்கு எல்லாம் துணைத் தலைவர் பதவி வழங்கப்பட்டு வரும் நிலையில் இன்று கட்சியில் சேர்ந்த நடிகை குஷ்புவுக்கு தேசிய அளவிலான பதவி ஒன்று வழங்கப்படுமா? என கேள்வி எழுந்துள்ளது.
தமிழக பாஜகவில் பதவிகளுக்கு ஒரு பார்மேட் வைத்திருக்கிறார். எந்த கட்சியில் இருந்து எத்தனை சீனியர்கள், பிரபலங்கள் வந்தாலும் அவர்களுக்கு முதலில் மாநில துணைத் தலைவர் பதவி வழங்கப்பட்டுவிடும். 2-ம் நிலை நிர்வாகிகள், பிரமுகர்களின் மவுஸைப் பொறுத்து அடுத்த கட்டமாக பதவிகள் வழங்கப்படும்.
வேண்டா வெறுப்பு.. முதல் நாளே பாஜக கொடுத்த ஷாக்.. அழையா வீட்டுக்கு விருந்தாளியாக போன குஷ்பு?
தேசிய பதவி இல்லை
பாஜகவில் நீண்டகாலமாக இருந்து வரும் சீனியர்கள் ஒருசிலருக்கு தேசிய அளவிலான பதவிகளை டெல்லி மேலிடம் வழங்கும். ஆனால் இந்த முறை தேசிய அளவிலான பதவி எதுவும் தமிழக பாஜக தலைவர்கள் ஒருவருக்கு கூட வழங்கவில்லை. தேசிய செயலாளர் பதவியில் இருந்த ஹெச். ராஜா அந்த பொறுப்பில் இருந்து விடுவிக்கப்பட்டுவிட்டார்.
பாஜகவில் குஷ்பு
இந்தியாவிலேயே அனேகமாக பாஜகவின் தேசிய பதவிக்கு தகுதி பெறாத ஒரே மாநில நிர்வாகிகள் தமிழ்நாட்டைச் சேர்ந்தவர்களாகத்தான் இருப்பார்கள். இந்த களேபரங்களுக்கு மத்தியில்தான் டெல்லியில் பாஜக பொதுச்செயலர் சிடி ரவி முன்னிலையில் நடிகை குஷ்பு அந்த கட்சியில் இணைந்தார். பாஜக தேசிய தலைவர் ஜேபி நட்டா முன்னிலையில்தான் குஷ்பு இணைவார் என கூறப்பட்டது. ஆனால் குஷ்பு வருகையை டெல்லி பாஜக மேலிடமே விரும்பவில்லையோ என்னவோ இப்படி ஒரு நிகழ்வு நடந்துவிட்டது.
குஷ்புவுக்கு என்ன பதவி?
சரி இது முடிந்த கதையாகிவிட்டது. காங்கிரஸ் கட்சியில் தேசிய செய்தித் தொடர்பாளராக இருந்தவர் குஷ்பு. இந்த பதவியை ராஜினாமா செய்துவிட்டு அல்லது டிஸ்மிஸ் செய்யப்பட்ட நிலையில் பாஜகவில் ஐக்கியமானார் குஷ்பு. இதனால் பாரதிய ஜனதா கட்சியில் குஷ்புவுக்கு என்ன பதவி கிடைக்கும்? என்பதும் விவாதங்களில் ஒன்று. பத்தோடு பதினொன்றாக இருந்துவிடுங்கள் என தமிழக பாஜக துணைத் தலைவர் பதவியை கொடுத்து ஓரம்கட்டி வைக்கவும் வாய்ப்பிருக்கிறது.
தேசிய பதவி கிடைக்குமா? கிடைக்கவிடுவார்களா?
தேசிய கட்சியில் தேசிய அளவில் பதவியில் இருந்தவர் என்பதால் பாஜகவிலும் தேசிய அளவிலான செய்தித் தொடர்பாளர் போன்ற ஒரு பதவியை கொடுக்கவும் வாய்ப்பிருக்கிறது. ஆனால் ஏற்கனவே இருக்கும் தமிழக பாஜக சீனியர்கள் ஒருத்தருக்கு கூட தேசிய பதவி தராமல் இன்று வந்த நடிகை குஷ்புவுக்கு அப்படி ஒரு பதவியை கிடைக்கவிடுவார்களா? என்கிற கேள்வியும் எழுகிறது. குஷ்புவுக்கு கிடைக்கப் போகும் பதவியை வைத்து புதிய கோஷ்டி அத்தியாயம் பாஜகவில் உதயமாகப் போகிறது என்பது மட்டும் தெளிவாக தெரிகிறது.