கோடநாடு வழக்கு.. சிபிசிஐடி போலீசாரிடம் சொன்னது என்ன? கனகராஜ் சகோதரர் தனபால் பரபர பேட்டி

சென்னை: கோட நாடு கொலை கொள்ளை வழக்கில் குற்றம் சாட்டப்பட்ட மறைந்த கார் டிரைவர் கனகராஜ்ஜின் சகோதரர் தனபாலிடம் சிபிசிஐடி போலீசார் இன்று விசாரணை மேற்கொண்டனர்.

மறைந்த முன்னாள் முதல்வர் ஜெ. ஜெயலலிதாவுக்கு சொந்தமான கோடநாடு எஸ்டேட்டில் கடந்த 2017-ஆம் ஆண்டு ஏப்ரல் 23ஆம் தேதி கொலை, கொள்ளைச் சம்பவம் நடைபெற்றது. மேலும் அங்கிருந்த முக்கிய ஆவணங்களும், பொருட்களும் கொள்ளையடிக்கப்பட்டன. இதுமட்டுமின்றி அப்போது பணியில் இருந்த காவலாளி ஓம் பகதூர் கொலை செய்யப்பட்டார். மேலும் கார் ஓட்டுநர் கனகராஜ் சாலை விபத்தில் மர்மமான முறையில் மரணம் அடைந்தார்.

இதேபோல் கோடநாடு எஸ்டேட்டில் சிசிடிவி கேமராவை கண்காணித்து வந்த ஆபரேட்டர் தினேஷ்குமார் தூக்கிட்டு தற்கொலை செய்துகொண்டார். இப்படி கோடநாடு வழக்கோடு சம்பந்தப்பட்டவர்களில் அடுத்தடுத்து மர்ம மரணங்கள் நிகழ்ந்தது பரபரப்பை ஏற்படுத்தியது. கோடநாடு கொலை கொள்ளை குறித்து நீலகிரி மாவட்ட நீதிமன்றத்தில் கடந்த 6 ஆண்டுகளாக விசாரணை நடைபெற்று வருகிறது.

இந்த நிலையில், கோடநாடு கொலை கொள்ளை வழக்கில் சில ஆவணங்களை அழித்ததாக கனகராஜின் அண்ணன் தனபால் கடந்த ஆண்டு கைது செய்யப்பட்டு சிறையில் அடைக்கப்பட்டார். தொடர்ந்து ஜாமீனில் வெளி வந்த தனபால், அண்மையில் சேலத்தில் செய்தியாளர்களுக்கு பேட்டியளித்தார். அப்போது "என்னை சந்தித்தபோது கனகராஜ் 5 பெரிய பைகளை வைத்திருந்தார்.

எடப்பாடி பழனிசாமி கூறியதன் பேரில்தான் 5 பைகளை எடுத்து வந்ததாக கனகராஜ் என்னிடம் தெரிவித்தார்" என பரபரப்பு குற்றச்சாட்டை முன்வைத்தார். மேலும் கோடநாடு வழக்கில் எடப்பாடியை விசாரிக்க வேண்டும் என்றும் கூறினார். இது பெரும் பரபரப்பை ஏற்படுத்தியது. கோடநாடு வழக்கில் ஏற்கனவே 11-வது குற்றவாளியாக சேர்க்கப்பட்டு இருக்கும் தனபால் முன்வைத்த இந்த குற்றச்சாட்டு பெரும் பரபரப்பை ஏற்படுத்தியது.

இந்த நிலையில் தான், தனபாலிடம் மீண்டும் விசாரிக்க அனுமதிக்க வேண்டும் என்று உதகை நீதிமன்றத்தில் சிபிசிஐடி சார்பில் மனு தாக்கல் செய்யப்பட்டது. இதற்கு உதகை நீதிமன்றமும் அனுமதி வழங்கியது. இதன்படி, சிபிசிஐடி போலீசார், தனபாலுக்கு சம்மன் அனுப்பி இன்று விசாரணை மேற்கொண்டனர். கோவை காந்திபுரத்தில் உள்ள சிபிசிஐடி அலுவலகத்தில் சுமார் 8 மணி நேரம் தனபாலிடம் விசாரணை நடைபெற்றது.

இந்த விசாரணைக்கு ஆஜராகிவிட்டு வெளியே வந்த தனபால் செய்தியாளர்களுக்கு அளித்த பேட்டியில் கூறியதாவது:- கோடநாடு வழக்கு தொடர்பாக சிபிசிஐடி காவல்துறையினர் நடத்திய விசரணை நிறைவாக இருந்தது. வாக்கு மூலம் எழுத்துப்பூர்வமாகவும் வீடியோவாகவும் பதிவு செய்யப்பட்டது. சந்தேகப்படும் நபர்களின் பெயர் பட்டியலை சிபிசிஐடியிடம் வழங்கியுள்ளேன்" என்றார்.

English summary

The CBCID police today interrogated the late car driver Kanagaraj's brother Dhanapal, accused in the Koda Nadu murder-robbery case.