அண்ணாமலைக்கு டெல்லி வைக்கப் போகும் ஆப்பு? ஜிகே வாசனிடம் எடப்பாடி கொடுத்த அதிர்ச்சி புகார் பட்டியல்!

சென்னை: அண்ணா திமுக பொதுச்செயலாளர் எடப்பாடி பழனிசாமியை திடீரென தமிழ் மாநில காங்கிரஸ் தலைவர் ஜிகே வாசன் சந்தித்ததே டெல்லி பாஜக தலைமையின் உத்தரவுதான் என்கின்றன அரசியல் வட்டாரங்கள்.

தமிழ்நாட்டில் திமுக தலைமையிலான கூட்டணிக்கு எதிராக அதிமுக, பாஜக இணைந்து நின்றிருந்தன. ஆனால் அண்ணா திமுகவை இடைவிடாமல் தமிழ்நாடு பாஜக தலைவர் அண்ணாமலை சீண்டிக் கொண்டே இருந்தார். இதுதான் வாய்ப்பு என பாஜகவுடனான கூட்டணியையே அண்ணா திமுக முறித்துக் கொண்டது.

பாஜகவுடனான கூட்டணியை அதிமுக முறித்தது நாடகம்தான் என இப்போதும் திமுக அணி சொல்லி வருகிறது. ஆனால் முடிந்தது முடிந்ததுதான்..பாஜகவுடன் கூட்டணியே கிடையாது என்கிறார் அதிமுக பொதுச்செயலாளர் எடப்பாடி பழனிசாமி. இதனால் திமுகவுக்கு எதிரான அணி என்பது சிதறிப் போயுள்ளது. தற்போது அதிமுக அணியில் இணைவதா? பாஜக பக்கம் போவதா? என்பதில் பாமக, தேமுதிக, தமாகா, புதிய தமிழகம் உள்ளிட்ட கட்சிகள் திணறிக் கொண்டே இருக்கின்றன.

இந்த பின்னணியில்தான் திடீரென எடப்பாடி பழனிசாமியை ஜிகே வாசன் சந்தித்து பேசினார். அதிமுக தலைமையிலான கூட்டணிக்கு எந்த ஒரு கட்சியுமே வரவில்லையே என்கிற விமர்சனங்கள் எழுந்த நிலையில் ஜிகே வாசனின் இந்த சந்திப்பு, அதிமுகவுடனான கூட்டணிக்குதான் என கூறப்பட்டு வருகிறது. ஆனால் தமாகா வட்டாரங்களோ, ஜிகே வாசனை அனுப்பியதே டெல்லி பாஜக தலைமைதான். தமிழ்நாடு தொடர்பான புலனாய்வுத் துறை அறிக்கைகளும் கருத்து கணிப்புகளும் திமுக கூட்டணிக்குதான் வெற்றி வாய்ப்பு என்பதை உறுதி செய்கின்றன. இதனை தடுக்க தற்போதைய ஒரே வழி மீண்டும் திமுகவுக்கு எதிரான அனைத்து கட்சிகளும் பாஜக தலைமையிலான தேசிய ஜனநாயகக் கூட்டணியில் இணைவதுதான் என நினைக்கிறதாம் டெல்லி. இதனால்தான் ஜிகே வாசனை எடப்பாடி பழனிசாமியை சந்தித்து வெள்ளோட்டம் விட்டு பார்த்ததாம் டெல்லி தலைமை என்கின்றன.

ஜிகே வாசனுடனான சந்திப்பில் எடப்பாடி பழனிசாமியும் எந்த ஒரு உறுதியையுமே தரவில்லையாம். பாஜகவுடனான கூட்டணியை முறிக்க என்ன காரணம் என ஒரு பட்டியலையே வாசித்தாராம் எடப்பாடியார். அதில் அண்ணாமலையின் பல்வேறு செயல்பாடுகள், சட்டசபை தேர்தலில் பாஜகவின் அண்ணாமலையே முதல்வர் வேட்பாளர் என அறிவிக்க அண்ணா திமுகவினரையே மிரட்டிக் கொண்டிருந்தது உள்ளிட்ட விவகாரங்கள் அடங்கி இருந்ததாம். இதனை அப்படியே டெல்லிக்கு பாஸ் செய்து விட்டார் எங்கள் தலைவர் என்கின்றன தமாகா வட்டாரங்கள்.

English summary

Here the details of TMC Chief GK Vasan meet with AIADMK General Secretary Edappadi Palaniswami.