இந்த 2 நிபந்தனைகளுக்கு ஒத்துவந்தால் தான் கூட்டணி.. மக்கள் நீதி மய்யம் அதிரடி முடிவு! ஆஹா.. ட்விஸ்ட்!

சென்னை: 2 நிபந்தனைகளுக்கு ஒத்து வரும் கட்சியுடன் தான் கூட்டணி, இல்லையேல் 40 தொகுதிகளிலும் தனித்துப் போட்டியிடவும் தயங்க மாட்டோம் என மநீம துணை தலைவர் மவுரியா அறிவித்துள்ளது பரபரப்பை ஏற்படுத்தியுள்ளது.

மக்களவைத் தேர்தல் நெருங்கி வருவதால், அரசியல் கட்சிகள் தேர்தல் பணிகளில் தீவிர கவனம் செலுத்தி வருகின்றன. கமல்ஹாசனின் மக்கள் நீதி மய்யம் கட்சியின் செயற்குழு கூட்டம் சென்னை ஆழ்வார்பேட்டையில் உள்ள கட்சி அலுவலகத்தில் இன்று நடைபெற்றது. அப்போது, தேர்தல் கூட்டணி குறித்து தீவிரமாக விவாதிக்கப்பட்டுள்ளது.

இந்நிலையில், செயற்குழு கூட்டத்திற்குப் பிறகு, மக்கள் நீதி மய்யம் கட்சியின் துணைத் தலைவர் மவுரியா செய்தியாளர்களைச் சந்தித்தார். அப்போது பேசிய அவர், "தமிழ்நாட்டின் வளர்ச்சியிலும், தமிழக மக்கள் நலனிலும் மக்கள் நீதி மய்யம் எந்த சமரசமும் செய்துகொள்ளாது. கமல்ஹாசனின் கொள்கைகளுடனும் சிந்தனைகளுடன் ஒத்த கருத்து கொண்டவர்களுடன் தான் கூட்டணி அமைய முடியும்.

இந்த இரண்டு நிபந்தனைகளையும் ஏற்கும் கட்சிகளுடன் மட்டுமே கூட்டணி. இந்த 2 நிபந்தனைகளுடன் யாரும் ஒத்துவராவிட்டால் 40 தொகுதிகளிலும் தனித்துப் போட்டியிட தயங்கமாட்டோம். கூட்டணி தொடர்பாக ஒரு குழு அமைத்து முடிவெடுக்கப்படும்" எனத் தெரிவித்துள்ளார்.

மேலும் கூட்டணியை நான் பார்த்துக்கொள்கிறேன் தேர்தல் பணிகளை நீங்கள் பார்த்துக் கொள்ளுங்கள் என கமல்ஹாசன் அறிவுறுத்தி உள்ளதாகவும் தகவல் வெளியாகியுள்ளது. வரும் பிப்ரவரி மாத இறுதியில் மக்கள் நீதி மய்யம் கட்சியின் பொதுக்குழு கூட்டம் நடைபெறும் என்றும் தெரிவிக்கப்பட்டுள்ளது.

திமுக கூட்டணியில் கமல்ஹாசனின் மக்கள் நீதி மய்யம் கட்சி இணையும் என்று எதிர்பார்க்கப்பட்டு வருகிறது. ஈரோடு கிழக்கு இடைத்தேர்தலில் திமுக கூட்டணிக்கு கமல்ஹாசன் ஆதரவு தெரிவித்திருந்தார். முன்னதாக, காங்கிரஸ் தலைவர் ராகுல் காந்தியின் இந்திய ஒற்றுமை நடைபயணத்திலும் கலந்து கொண்டார் கமல்ஹாசன்.

முதல்வர் ஸ்டாலின், அமைச்சர் உதயநிதி ஆகியோருடன் பல்வேறு மேடைகளை கமல்ஹாசன் பகிர்ந்து வருவதால் திமுக கூட்டணியில் கமல் இணைய அதிக வாய்ப்பிருப்பதாக கூறப்படும் நிலையில், மக்கள் நீதி மய்யம் இன்று 2 நிபந்தனைகளுடன் ஒத்து வருபவர்களுடன் தான் கூட்டணி, இல்லையேல் தனித்துப் போட்டியிடுவோம் என கூறியுள்ளது பரபரப்பை ஏற்படுத்தியுள்ளது.

English summary

Makkal Needhi Maiam Vice President AG Mourya has announced that the alliance is only with the party that meets the 2 conditions, otherwise we will not hesitate to contest alone in all 40 constituencies in lok sabha election.