தமிழ்நாட்டில் தான் வெப்பம் ரொம்ப அதிகம்! தென்னிந்தியாவிலேயே நாம் தான் மோசம்... நாசாவின் ஹீட் மேப்

சென்னை: உலகில் நிலவும் வெப்பத்தின் அளவு குறித்து நாசா வெளியிட்டுள்ள சாட்டிலைட் படத்தில் முக்கிய விஷயம் தெரிய வந்துள்ளது.

உலக வெப்ப மயமாதல் தான் சர்வதேச நாடுகள் இப்போது சந்திக்கும் முக்கிய பிரச்சினையாக உருவெடுத்து உள்ளது. இதனால் பூமியில் பல்வேறு பிரச்சினைகள் ஏற்பட்டு உள்ளது.

குறிப்பாக உலக வெப்ப மயமாதல் காரணமாகப் பருவநிலை மாற்றம் ஏற்படுவது பெரும் பிரச்சினையாக உருவெடுத்து உள்ளது.

வெப்பம்

இதனால் ஏற்படும் பாதிப்புகள் மனிதர்களுக்கு மட்டுமில்லை பூமியில் உள்ள அனைத்து உயிரினங்களுக்கும் பெரிய பிரச்சினையாக உருவெடுத்து உள்ளது. கடந்த சில ஆண்டுகளாகவே உலகின் பல்வேறு பகுதிகளிலும் உள்ள காடுகளில் காட்டுத் தீயும் ஏற்பட்டு வருகிறது. இதனால் காடுகளில் வசிக்கும் பல அரிய உயிரினங்கள் தீயில் கருகி உயிரிழந்தனர். இது தொடர்பான ஃபோட்டோக்களும் இணையத்தில் அதிர்வலைகளை ஏற்படுத்தி இருந்தது.

பாதிப்பு

வெயில் ஒரு புறம் என்றால் பருவம் தவறிப் பெய்யும் மழையும் பெரிய சிக்கலாகி உள்ளது. இதனால் இந்தியா உட்பட பல நாடுகளில் விவசாயமும் கூட பாதிக்கப்பட்டு உள்ளது. அதேபோல ஜெர்மனி, சீனா தொடங்கி டெல்லி, மும்பை வரையும் கூட கனமழை வெளுத்து வாங்குகிறது. இதனால் ஏற்படும் வெள்ள பாதிப்பும் மிக மோசமாகவே உள்ளது. இப்படி வெயிலும் மழையும் பூமியை வாட்டி வதைக்கிறது.

பருவம் தவறும் மழை

மனிதர்கள் முன்னெப்போதும் இல்லாத அளவுக்கு உலகத்தை நாசம் செய்து வருவதே இதற்கு முக்கிய காரணம். சமீப ஆண்டுகளாக உலகின் பல நாடுகளிலும் முன்னெப்போதும் இல்லாத அளவுக்கு வெப்ப அலை ஏற்படுகிறது. அமெரிக்கா, கனடா நாடுகளில் வெப்பத்தின் தாக்கம் மிக மோசமாக உள்ளது. சமீபத்தில் ஐரோப்பாவில் இதேபோல வெப்ப அலை ஏற்பட்டதால் உலகெங்கும் பலரும் உயிரிழக்கும் சூழலும் உருவானது.

நாசா

இந்நிலையில், நாசாவின் சுற்றுச்சூழல் அமைப்பு வெப்ப ரேடியோமீட்டர் மூலம் பூமியில் நிலவும் வெப்பம் குறித்த மேப் ஒன்றை வெளியிட்டு உள்ளது. அதில் கடந்த ஜூலை 13ஆம் தேதி பூமியின் பல்வேறு நாடுகளிலும் பதிவான வெப்பத்தின் நிலை பதிவாகி உள்ளது. ஆப்பிரிக்கா, ஐரோப்பிய, மத்திய கிழக்கு நாடுகள், ஆசிய நாடுகளில் நிலவிய வெப்பம் குறித்த தகவல்கள் அதில் இடம் பெற்று உள்ளது.

உலக நாடுகள்

அதில் ஆப்பிரிக்காவில் வடக்குப் புறத்தில் இருக்கும் நாடுகளில் வெப்பம் அதிகமாக உள்ளது. அதேபோல மத்திய கிழக்கு நாடுகளிலும் வெப்பத்தின் தாக்கம் அதிகமாகவே உள்ளது. கடந்த சில நாட்களாக வெளியான தகவல்களை உறுதி செய்வது போலவே ஐரோப்பாவில் பல நாடுகளில் வெப்பத்தின் தாக்கம் அதிகமாகவே உள்ளது. இதில் சுவாரசியமான ஒன்று இந்தியாவின் பல்வேறு பகுதிகளில் நிலவும் வெப்பம் தான்.

இந்தியா

இந்தியாவைப் பொறுத்தவரை வட இந்தியாவில் கிட்தட்ட அனைத்து இடங்களிலும் வெப்பத்தின் தாக்கம் அதிகமாகவே உள்ளது. ஆனால், மகாராஷ்டிராவுக்குக் கீழே தென் மாநிலங்களில் வெப்பத்தின் தாக்கம் கணிசமாகக் குறைவாகவே உள்ளது.கர்நாடகா, கேரளா, தெலங்கானா மாநிலங்களில் வெப்பத்தின் தாக்கம் சற்று குறைவாகவே உள்ளது. ஆந்திராவின் சில பகுதிகளில் வெப்பம் அதிகமாக உள்ளது.

தமிழ்நாடு

இருப்பினும், தமிழ்நாட்டை எடுத்துக் கொண்டால் மாநிலம் முழுவதுமே வெப்பம் மிக அதிகமாகவே உள்ளது. அதாவது தென்னிந்திய மாநிலங்களிலேயே தமிழ்நாட்டில் மட்டும் தான் வெப்பத்தின் தாக்கம் அதிகமாக உள்ளது. அதிகரிக்கும் நகர மயமாக்கல், காடுகளை அழிப்பது. மரங்களை வெட்டுவது போன்ற காரணங்களே தமிழ்நாட்டில் வெப்பம் அதிகமாக இறுக்க முக்கிய காரணமாகக் கூறப்படுகிறது.

English summary

Nasa latest satellite picture about heavtwave issue: (தமிழ்நாட்டில் நிலவும் வெப்ப அலை குறித்து வெளியான நாசாவின் ஃபோட்டோ) Heatwave around the world NASA.