சென்னையில் 5 இடங்களில் என்ஐஏ ரெய்டு.. அதிகாலையில் அதிர்ந்த தலைநகரம்

சென்னை: சென்னையில் 5க்கும் மேற்பட்ட இடங்களில் அதிகாலை முதலே என்ஐஏ அதிகாரிகள் சோதனை மேற்கொண்டு வருகின்றனர். கோவை கார் குண்டு வெடிப்பு தொடர்பாக சென்னை, கோவை, நெல்லை, மதுரை உள்ளிட்ட 8 மாவட்டங்களில் 25க்கும் மேற்பட்ட இடங்களில் தேசிய புலனாய்வு முகமை அதிகாரிகள் இன்று காலை முதல் சோதனை மேற்கொண்டுள்ளனர்.

கோவையில் கடந்த ஆண்டு அக்டோபர் மாதம் தீபாவளிக்கு முன்பாக 23ஆம் தேதி நிகழ்ந்த கார் குண்டு வெடிப்பு சம்பவம் பதற்றத்தை ஏற்படுத்தியது. இந்த சம்பவம் தொடர்பாக 6 பேர் கைது செய்யப்பட்டுள்ளனர். என்ஐஏ வசம் வழக்கு ஒப்படைக்கப்பட்டுள்ளது.

கார் குண்டு வெடிப்பு தொடர்பாக என்ஐஏ அதிகாரிகள் தீவிர விசாரணை நடத்தி வரும் நிலையில் அவ்வப்போது சந்தேகத்திற்கு இடமான வகையில் சோதனை நடத்தப்படுகிறது. சென்னையில் கடந்த சில வாரங்களாகவே பல பகுதிகளில் சோதனை நடத்தப்பட்டு பொருட்கள் கைப்பற்றப்பட்டு வருகின்றன.

தமிழ்நாடு முழுவதும் கோவை, நெல்லை பகுதிகளில் தடை செய்யப்பட்ட அமைப்புகளுடன் தொடர்பில் இருப்பவர்களின் வீடுகளில் என்ஐஏ அதிகாரிகள் சோதனை நடத்துவது வழக்கமான ஒன்றாகும். சென்னை மற்றும் புறநகர் பகுதிகளில் பல்வேறு இடங்களில் NIA அதிகாரிகள் சோதனயில் ஈடுபட்டுள்ளனர். இன்றைய தினம் சென்னையில் வில்லிவாக்கம், பல்லாவரம் உள்ளிட்ட 5 இடங்களில் சோதனை மேற்கொண்டுள்ளனர். இதே போல கடலூர், திருச்சியில் என்ஐஏ சோதனை நடைபெற்று வருவது குறிப்பிடத்தக்கது.

கடந்த சில நாட்களுக்கு முன்பு சென்னை கொரட்டூரில் தேசிய புலனாய்வு முகமை அதிகாரிகள் சோதனை நடத்தி வருகின்றனர். ஐதராபாத்தை சேர்ந்த என்.ஐ.ஏ அதிகாரிகள் மாவோயிஸ்ட் வழக்கு தொடர்பாக கொரட்டூரில் உள்ள குறும்பட இயக்குனர் முகில் சந்திரா என்பவரது வீட்டில் சோதனை மேற்கொண்டனர் என்பது குறிப்பிடத்தக்கது.

English summary

NIA officials have been conducting raids since early morning at more than 5 places in Chennai. In connection with the Coimbatore car blast, the National Investigation Agency officials have conducted searches in more than 25 places in 8 districts including Chennai, Coimbatore, Nellai and Madurai since this morning.