"நீட் தேர்வு ரத்து.. அரசின் அனைத்து நடவடிக்கைகளுக்கும் அதிமுக ஆதரவு தரும்.." ஓபிஎஸ் திட்டவட்டம்

Updated: Saturday, February 5, 2022, 13:04 [IST]

Subscribe to Oneindia Tamil

சென்னை: நீட் தேர்வு ரத்து தொடர்பாக அரசு எடுக்கும் அனைத்து சட்ட ரீதியான நடவடிக்கைகளுக்கும் அதிமுக ஆதரவு அளிக்கும் என்று அதிமுக ஒருங்கிணைப்பாளர் ஓ.பன்னீர்செல்வம் அறிக்கை வெளியிட்டுள்ளார்.

தமிழ்நாட்டிற்கு நீட் தேர்வில் இருந்து விலக்கு தர வேண்டும் என்று தொடர்ந்து வலியுறுத்தப்பட்டு வருகிறது. நீட் பாதிப்பு குறித்து ஏகே ராஜன் குழு அளித்த பரிந்துரையின் அடிப்படையில் திமுக அரசு நீட் விலக்கு மசோதாவைத் தயார் செய்திருந்தது.

கடந்த செப். 13ஆம் தேதி தமிழக சட்டசபையில் இந்த மசோதா முழு மனதாக நிறைவேற்றப்பட்டு, ஆளுநரிடம் அனுப்பப்பட்டது.சுமார் 6 மாதங்களுக்குப் பிறகு, ஆளுநர் இந்த நீட் விலக்கு மசோதாவைத் தமிழக அரசுக்கே திருப்பி அனுப்பினார்.

ஓபிஎஸ் அறிக்கை

இது தொடர்பாக ஆலோசனை நடத்த இன்று காலை 11 மணிக்குத் தலைமைச் செயலகத்தில் உள்ள நாமக்கல் கவிஞர் மாளிகையில் ஆலோசனைக் கூட்டம் நடைபெற்றது. இருப்பினும், இந்தக் கூட்டத்தில் அதிமுக சார்பில் யாரும் பங்கேற்கவில்லை. இது தொடர்பாகப் பலரும் கேள்வி எழுப்பிய நிலையில், அதிமுக ஒருங்கிணைப்பாளர் ஓ.பன்னீர்செல்வம் அறிக்கை ஒன்றை வெளியிட்டுள்ளார். அதாவது அதிமுகவைப் பொறுத்தவரை நீட் தேர்வு ரத்து தொடர்பாக அரசு எடுக்கும் அனைத்து சட்ட ரீதியான நடவடிக்கைகளுக்கும் ஆதரவு அளிக்கும் என்று அதில் அவர் கூறியுள்ளார்.

அனைத்துக் கட்சி கூட்டம்

அந்த அறிக்கையில் ஓ பன்னீர்செல்வம், "தங்களின் 3.2.2022 நாளிட்ட கடிதம் கிடைக்கப் பெற்றேன். அதில், மருத்துவக் கல்வியில் சேருவதற்கான நீட் தேர்வில் இருந்து விலக்கு பெற வழிவகை செய்யும் சட்ட முன்வடிவினை மறுபரிசீலனை செய்யும் பொருட்டு, மேதகு ஆளுநர் அவர்கள் தமிழ் நாடு அரசிற்குத் திருப்பி அனுப்பியுள்ள நிலையில், இது தொடர்பாகத் தலைமைச் செயலகத்தில் நடைபெறும் சட்டமன்ற அனைத்து கட்சித் தலைவர்கள் கூட்டத்தில் பங்கேற்று ஆலோசனை வழங்க, அதிமுக சார்பில் சட்டமன்ற உறுப்பினரை அனுப்பி வைக்குமாறு தாங்கள் கோரி உள்ளீர்கள்.

ஆதரவு தரும்

'நீட் தேர்வு ரத்து" குறித்த அதிமுகவின் கருத்துகள் ஏற்கனவே தமிழ்நாடு சட்டமன்றப் பேரவையிலும், 8.1.2022 அன்று நடைபெற்ற சட்டமன்ற அனைத்துக் கட்சித் தலைவர்கள் கூட்டத்திலும் விரிவாக எடுத்துரைக்கப்பட்டன. அதிமுகவை பொறுத்தவரை 'நீட்' தேர்வு ரத்து செய்யப்பட வேண்டும் என்பதில் உறுதியாக உள்ளது. எனவே, 'நீட் தேர்வு ரத்து தொடர்பாக எடுக்கப்படும் அனைத்து சட்டப்படியான நடவடிக்கையையும் அதிமுக ஆதரிக்கும் என்பதைத் தெரிவித்துக் கொள்கிறேன்" என்று தெரிவித்துள்ளார்.

விரைவில் சட்டசபை கூட்டத்தொடர்?

இன்று நடைபெற்ற அனைத்துக் கட்சி கூட்டத்தில் அதிமுக தவிர பாஜக மற்றும் புரட்சி பாரதம் கட்சிகளும் கலந்து கொள்ளவில்லை. அனைத்துக் கட்சி கூட்டத்தில் நீட் விலக்கு தொடர்பாகத் தமிழ்நாடு சட்டசபையில் மீண்டும் சட்ட முன்வடிவை நிறைவேற்றி, ஆளுநர் மூலம் மத்திய அரசுக்கு அனுப்ப முடிவெடுக்கப்பட்டுள்ளது. இதற்காக விரைவில் சிறப்புச் சட்டசபை கூட்டத்தொடர் கூட்டப்படும் என்றும் தகவல் வெளியாகியுள்ளது.