பட்டா மாறுதல் செய்ய இதோ ஆன்லைனில் ஈஸி வழி? லோன் கிடைப்பதில் சிக்கல்? 24 மணி நேரத்தில் தீர்வு

Updated: Wednesday, March 4, 2026, 18:36 [IST]

Subscribe to Oneindia Tamil

சென்னை: தமிழகத்தில் நிலம் அல்லது வீடு வாங்கிய பிறகு வருவாய்த்துறையின் கீழ் பட்டா பெயர் மாற்றம் செய்வது என்பது தற்போது மிக எளிமையான ஆன்லைன் நடைமுறையாக மாற்றப்பட்டுள்ளது.. பொதுமக்கள் வட்டாட்சியர் அலுவலகத்திற்கு அலைந்து திரிய வேண்டிய அவசியமில்லாமல் வீட்டிலிருந்தே இணையதளம் வாயிலாக இந்தச் சேவையைப் பயன்படுத்திக் கொள்ள முடியும்.. அது எப்படி என்பதை இங்கே சுருக்கமாக பார்க்கலாம்.

பட்டா மாறுதலுக்கு விண்ணப்பிக்க வேண்டுமானால், ஒருவர் தமிழக அரசின் அதிகாரப்பூர்வ இ-சேவை வெப்சைட் அல்லது தமிழ் நிலம் என்ற போர்ட்டலுக்குச் செல்ல வேண்டும்..

அங்கு புதிய கணக்கை தொடங்கி உள்நுழைந்த பிறகு பட்டா பெயர் மாற்றத்திற்கான விண்ணப்பப் படிவத்தைத் துல்லியமாக நிரப்ப வேண்டும்.. குறிப்பாக நிலம் அமைந்திருக்கும் மாவட்டம், வட்டம் மற்றும் கிராமத்தின் பெயரைச் சரியாகத் தேர்ந்தெடுப்பது மிக முக்கியமானது..

பட்டா மாறுதல்

அதன் பிறகு புல எண் மற்றும் உட்பிரிவு எண் ஆகியவற்றைத் தவறில்லாமல் பதிவு செய்ய வேண்டும்.. நிலத்தை வாங்கியதற்கான விற்பனைப் பத்திரம் அல்லது கிரயப் பத்திரத்தின் நகலைத் தெளிவாக ஸ்கேன் செய்து பதிவேற்ற வேண்டும்.. இத்துடன் வில்லங்கச் சான்றிதழ் மற்றும் முந்தைய பட்டா நகல் ஆகியவையும் இணைக்கப்பட வேண்டும்..

பத்திரப்பதிவு அலுவலகத்தில் நிலம் பதிவு செய்யப்படும்போதே தானியங்கி பட்டா மாறுதலுக்கும் வசதிகள் உள்ளன என்றாலும் சில நேரங்களில் நாம் தனியாக விண்ணப்பிக்க வேண்டிய சூழல் ஏற்படும்.. விண்ணப்பத்தை முழுமையாக முடித்த பிறகு இதற்கான நிர்ணயிக்கப்பட்ட கட்டணத்தை ஆன்லைன் மூலமாகவே செலுத்த வேண்டும்..

வீட்டு லோன் பெற முடியுமா

வெற்றிகரமாக விண்ணப்பித்தவுடன் ஒரு ஒப்புதல் சீட்டு மற்றும் விண்ணப்ப எண் வழங்கப்படும்.. இந்த எண்ணைப் பயன்படுத்தி நமது விண்ணப்பத்தின் நிலையை அவ்வப்போது ஆன்லைனிலேயே சரிபார்த்துக் கொள்ளலாம்..

நாம் சமர்ப்பித்த ஆவணங்கள் கிராம நிர்வாக அலுவலர் மற்றும் வருவாய் ஆய்வாளர் ஆகியோரால் கள ஆய்வு செய்யப்பட்டு சரிபார்க்கப்படும்.. அனைத்துத் தகவல்களும் சரியாக இருக்கும் பட்சத்தில் வட்டாட்சியர் பட்டா பெயர் மாற்றத்திற்கு ஒப்புதல் அளிப்பார்..

புதிய பட்டா விண்ணப்பம்

இதன் பிறகு புதிய பட்டாவை இணையதளத்திலிருந்தே பதிவிறக்கம் செய்து கொள்ளலாம்.. இந்த டிஜிட்டல் முறை வெளிப்படைத்தன்மையை அதிகரிப்பதோடு இடைத்தரகர்களின் குறுக்கீடு இல்லாமல் பொதுமக்கள் தங்கள் வேலையைத் தாங்களே செய்துகொள்ள வழிவகுக்கிறது.. ஒருவேளை ஆவணங்களில் ஏதேனும் குறைபாடுகள் இருந்தால் அவை விண்ணப்பதாரருக்கு ஆன்லைன் மூலமாகவே தெரிவிக்கப்படும் என்பதால் விரைவாகத் திருத்தங்களை மேற்கொள்ளவும் வாய்ப்பு உள்ளது..

நில உரிமை தொடர்பான இந்த முக்கியமான மாற்றத்தை உரிய நேரத்தில் செய்வது வருங்காலத்தில் சொத்து விற்பனைக்கோ அல்லது வங்கிக் கடன்கள் பெறுவதற்கோ பெரும் உதவியாக இருக்கும்..

பெரும்பாலான வங்கிகள் சொத்து உரிமையை உறுதிப்படுத்த உங்கள் பெயரில் பட்டா இருப்பதையே முதன்மை ஆவணமாகக் கோருகின்றன.. பட்டா மாறுதல் செய்யப்பட்டிருந்தால் மட்டுமே சட்டரீதியான சிக்கல்கள் இன்றி எளிதாக வீட்டுக்கடன் பெற முடியும்..

பட்டா பெயர் மாற்றம்

பாரம்பரியமான அலுவலக நடைமுறைகளை விட இந்த ஆன்லைன் முறை நேரத்தை மிச்சப்படுத்துவதோடு துல்லியமான தரவுகளை பராமரிக்கவும் உதவுகிறது.. எனவே முறையான ஆவணங்களுடன் விண்ணப்பிப்பதன் மூலம் எளிய முறையில் பட்டா பெயர் மாற்றத்தைப் பெற முடியும்..

ஒருவேளை வெப்சைட்டில் ஏதேனும் தொழில்நுட்பக் கோளாறு ஏற்பட்டால் அருகில் உள்ள அரசு இ-சேவை மையத்தை அணுகி உரிய கட்டணம் செலுத்தி இதே விண்ணப்பத்தைச் சமர்ப்பிக்கலாம்..

பட்டா என்பது ஒரு நிலத்தின் உரிமையை உறுதிப்படுத்தும் மிக முக்கியமான ஆவணம் என்பதால் பெயர் மாற்றம் செய்யப்பட்டவுடன் அதில் உங்கள் பெயர் மற்றும் விவரங்கள் சரியாக உள்ளதா என்பதை மீண்டும் ஒருமுறை சரிபார்த்துக் கொள்வது நல்லது.. தற்போதைய நவீன காலத்தில் ஸ்மார்ட்போன் மூலமாகவே விண்ணப்பத்தின் நிலையைத் தெரிந்துகொள்ளும் வசதி இருப்பதால் எளிய மக்களும் இந்தச் சேவையை எளிதாகப் பயன்படுத்த முடியும் என்பது குறிப்பிடத்தக்கது..!!