சென்னை மக்களே நோட் பண்ணுங்க.. நாளை முதல் 2 நாள் 20 ஏரியாவில் குடிநீர் விநியோகம் ரத்து - CMWSSB

சென்னை: சென்னையில் நாளை (நவம்பர் 20) மற்றும் நாளை மறுநாள் (நவம்பர் 21) ஆகிய 2 நாட்கள் தேனாம்பேட்டை, கோடம்பாக்கம், அடையார் உள்ளிட்ட மண்டலங்களில் இருக்கும் 20 முக்கிய இடங்களில் குடிநீர் விநியோகம் செய்யப்படாது என்று சென்னை மெட்ரோபாலிட்டன் குடிநீர் வினியோகம் மற்றும் வடிகால் வாரியம் சார்பில் தெரிவிக்கப்பட்டுள்ளது.

சென்னை மாநகராட்சி எல்லைக்குட்பட்ட பகுதிகளில் சென்னை மெட்ரோபாலிட்டன் குடிநீர் வினியோகம் மற்றும் வடிகால் வாரியம் (CMWSSB) சார்பில் குழாய்கள் மூலம் குடிநீர் விநியோகம் செய்யப்பட்டு வருகிறது.

சில சமயங்களில் பராமரிப்பு பணி, பவர் கட் உள்ளிட்ட விஷயங்களால் இந்த குடிநீர் விநியோகம் என்பது பாதிக்கப்படும். அந்த வகையில் நாளை காலை முதல் நாளை மறுநாள் காலை வரை 20 ஏரியாக்களில் குடிநீர் விநியோகம் ரத்து செய்யப்பட உள்ளது.

இதுதொடர்பாக சென்னை மெட்ரோபாலிட்டன் குடிநீர் வினியோகம் மற்றும் வடிகால் வாரியம் சார்பில் வெளியிடப்பட்டுள்ள அறிவிப்பில் கூறப்பட்டுள்ளதாவது: ‛‛சென்னை உத்தமர் காந்தி ரோடு மற்றும் சேமியர்ஸ் சாலை இடையே சென்னை மெட்ரோ ரயில் நிர்வாகம் சார்பில் பைப்லைன் இணைப்பு பணிகள் நடைபெற உள்ளது. இதன் காரணமாக சென்னை வள்ளுவர் கோட்டம் குடிநீர் வினியோக மையம் 24 மணிநேரம் செயல்படாது.

இதன் காரணமாக தேனாம்பேட்டை (மண்டலம் 9), கோடம்பாக்கம் (மண்டலம் 10), அடையார் (மண்டலம் 13) உள்ளிட்ட பகுதிகளில் இருக்கும் 20 முக்கிய இடங்களில் நவம்பர் 20 (நாளை), நவம்பர் 21 (நாளை மறுநாள்) என 2 நாட்கள் குடிநீர் வினியோகம் பாதிக்கப்பட உள்ளது.

அதன்படி தேனாம்பேட்டை, கோடம்பாக்கம், அடையார், சூளைமேடு,நுங்கம்பாக்கம், சேத்துப்பேட்டை, ஆயிரம் விளக்கும், ராயப்பேட்டை, கோபாலபுரம், ஆழ்வார்பேட்டை, நந்தனம், மேற்கு மாம்பலம், மேற்கு சிஐடி நகர், சைதாப்பேட்டையின் சில பகுதிகள், அசோக் நகர், டி நகர், வடபழனி உள்ளிட்ட இடங்களில் நவம்பர் 20ம் தேதி (நாளை) காலை 6 மணி முதல் நவ்பம்ர 21ம் தேதி காலை 6 மணி வரை குடிநீர் வினியோகம் செய்யப்படாது.

இதனால் பொதுமக்கள் தங்களுக்கு தேவையான குடிநீரை முன்னெச்சரிக்கையாக சேமித்து வைத்து கொள்ள வேண்டும். ஒருவேளை அவசர தேவைகள் இருப்பின் டேங்கர்கள் மூலம் குடிநீர் பெற்று கொள்ளலாம். டேங்கரை சென்னை மெட்ரோபாலிட்டர் குடிநீர் மற்றும் வடிகால் வாரியத்தின் இணையதளமான https://cmwssb.tn.gov.in இணையதளம் மூலம் முன்பதிவு செய்து பயன்படுத்தி கொள்ளலாம். மேலும் ஏதாவது விபரங்கள் தேவை என்றால் 044 - 4567 4567 என்ற எண்ணை தொடர்பு கொள்ளலாம்'' என தெரிவிக்கப்பட்டுள்ளது.

English summary

Due to CMRL pipeline interconnection works the drinking water supply will be suspended in 20 areas in Tyenampet, Kodmabakka and Adyar zone on November 20 and 21.