பிளஸ் 1 பொதுத் தேர்வு இன்று தொடக்கம்: 8 லட்சம் மாணவர்கள் தேர்வு எழுதுகின்றனர்
சென்னை: பிளஸ் 1 மாணவர்களுக்கான பொதுத் தேர்வு இன்று (மார்ச் 5) தொடங்கியது. முதல் நாளான இன்று தமிழ் உள்பட இதர மொழிப் பாடங்களுக்கான தேர்வை மாணவர்கள் எழுதவுள்ளனர். தமிழ்நாட்டில் மொத்தம் 8 லட்சத்து 18 ஆயிரத்து 369 மாணவர்கள் பொதுத் தேர்வை எழுதவுள்ளனர்.
தமிழகத்தில் மார்ச், ஏப்ரல் மாதங்களில் பொதுத் தேர்வுகள் தொடங்குவது வழக்கம். அந்த வகையில், 2024-25 கல்வி ஆண்டுக்கான பிளஸ் 2 பொதுத் தேர்வு மார்ச் 3 ஆம் தேதி தொடங்கி நடைபெற்று வருகிறது. இந்த தேர்வு மார்ச் 25 ஆம் தேதி வரை நடைபெறவுள்ளது. பிளஸ் 2 பொதுத் தேர்வை மாணவர்கள் எழுதுவதற்காக 3,316 தேர்வு மையங்கள் அமைக்கப்பட்டுள்ளன. 7,518 பள்ளிகளைச் சேர்ந்த 8.03 லட்சம் மாணவர்கள், 18,344 தனித்தேர்வர்கள், 145 கைதிகள் என மொத்தம் 8.21 லட்சம் பேர் தேர்வு எழுதுகின்றனர்.
இதைத்தொடர்ந்து, பிளஸ் 1 மாணவர்களுக்கான பொதுத் தேர்வு இன்று (புதன்கிழமை) தொடங்கியது. தேர்வின் முதல் நாளான இன்று தமிழ் உள்பட இதர மொழிப் பாடங்களுக்கான தேர்வை மாணவர்கள் எழுதுகின்றனர். இதற்காக தமிழ்நாடு முழுவதும் 3 ஆயிரத்து 316 தேர்வு மையங்கள் அமைக்கப்பட்டுள்ளன. காலை 10 மணி முதல் பிற்பகல் 1.15 மணி வரை தேர்வு நடைபெறவுள்ளது. இன்று முதல் மார்ச் 27 ஆம் தேதி வரை தேர்வு நடைபெறுகிறது. ஒவ்வொரு தேர்வும் 2 முதல் 4 நாட்கள் இடைவெளியில் நடைபெறவுள்ளது.
பிளஸ் 1 பொதுத் தேர்வை தமிழ்நாட்டில் உள்ள 7 ஆயிரத்து 557 பள்ளிகளைத் சேர்ந்த 8 லட்சத்து 18 ஆயிரத்து 369 பேர் எழுதவுள்ளனர். இதில், 3 லட்சத்து 89 ஆயிரத்து 423 மாணவர்கள், 4 லட்சத்து 28 ஆயிரத்து 946 மாணவிகள் ஆவர். மேலும், தனித்தேர்வர்கள் 4 ஆயிரம் பேரும், சிறைவாசிகள் 137 பேரும் பிளஸ் 1 பொதுத் தேர்வை எழுதுகின்றனர்.
தேர்வுகளில் முறைகேடுகள் நடைபெறுவதைத் தடுக்கும் வகையில் 4 ஆயிரத்து 470 பறக்கும் படைகளும், தேர்வுப் பணிகளில் 44 ஆயிரத்து 236 தேர்வறை கண்காணிப்பாளர்களும் ஈடுபடவுள்ளனர். தேர்வு மையங்களில் குடிநீர், இருக்கை, மின்சாரம், காற்றோட்டம், வெளிச்சம் மற்றும் கழிப்பறை வசதிகள் அமைக்கப்பட்டுள்ளன.
Click it and Unblock the Notifications
Sign in with Google