Jacto geo: ஜாக்டோ ஜியோ போராட்டம் தற்காலிக வாபஸ் பெறப்பட்ட பின்னணி இதுதான்!

சென்னை: அரசு ஊழியர் அமைப்பான ஜாக்டோ ஜியோ போராட்டம் 9 நாட்களுக்கு பிறகு தற்காலிகமாக வாபஸ் பெறப்பட்டுள்ளது.

ஒன்பது அம்ச கோரிக்கைகளை முன்வைத்து ஜாக்டோ ஜியோ அமைப்பினர் கடந்த 22ஆம் தேதி முதல் தொடர் போராட்டங்களில் ஈடுபட்டு வந்தனர்.

அரசு பள்ளி ஆசிரியர்கள் உள்ளிட்ட பல்வேறு பிரிவினரும் இந்த போராட்டத்தில் ஈடுபட்டு வந்ததால், பள்ளிகளில் கல்வி பாதிக்கப்பட்டது.

பேச்சுவார்த்தைக்கு அரசு தயாரில்லை

போராட்ட குழுவினருடன் முதல்வர் எடப்பாடி பழனிச்சாமி பேச்சுவார்த்தை நடத்த வேண்டும் என்ற கோரிக்கையை அரசு தரப்பு புறந்தள்ளி விட்டது. ஜாக்டோ ஜியோ அமைப்பினரின் கோரிக்கைகளை பரிசீலிக்க முடியாதவையாக உள்ளன என்பதால் இதை ஏற்க முடியாது என்று திட்டவட்டமாக அமைச்சர் ஜெயக்குமார் அறிவித்துவிட்டார்.

அரசு ஊழியர்கள் மீது நடவடிக்கை

மேலும் பணிக்கு வராத ஆசிரியர்கள் மீது சஸ்பெண்டு நடவடிக்கை, போராட்டம் நடத்திய அரசு ஊழியர்கள் மீது கைது நடவடிக்கை என பல்வேறு நடவடிக்கைகளும் அரசுத் தரப்பிலிருந்து பாய்ந்தன. இந்த நிலையில் போராட்டம் நடத்துவோர் எண்ணிக்கை வெகுவாக குறையத் தொடங்கியது.

பிசுபிசுத்த அரசு ஊழியர் போராட்டம்

நேற்றைய தினம் 95 சதவீத ஆசிரியர்கள் பள்ளிக்கு திரும்பிவிட்டதாக பள்ளிக்கல்வி இயக்குனரகம் தெரிவித்தது. சென்னையில் சுமார் 100 சதவீதம் ஆசிரியர்களும் பணிக்கு திரும்பியதாக அறிவிக்கப்பட்டது.

அரசு ஊழியர்கள் - ஆசிரியர்களை நேரில் அழைத்துப் பேசி தீர்வு காண முடியாத ஒரு முதல்வரிடம், இனியும் நியாயம் எதிர்பார்ப்பது தவறு.

திமுக ஆட்சி அமையும் வரை பொறுமை காக்கவும்; ஆட்சி அமைந்தவுடன் கோரிக்கைகள் நிறைவேற்றப்படுவதோடு, அதிமுக அரசின் அராஜக நடவடிக்கைகள் அனைத்தும் ரத்து செய்யப்படும்! pic.twitter.com/JF0gLaqjmp

— M.K.Stalin (@mkstalin) January 30, 2019

ஜாக்டோ ஜியோவினருக்கு ஸ்டாலின் கோரிக்கை

இந்த நிலையில் இன்று திமுக தலைவர் மு.க.ஸ்டாலின் ஒரு அறிக்கையை வெளியிட்டார். அதில், ஜாக்டோ ஜியோ ஊழியர்கள், திமுக ஆட்சி மலரும் வரை பொறுத்துக் கொள்ளவும். அதன் பிறகு அவர்கள் கோரிக்கைகள் நிறைவேற்றப்படும் என்று தெரிவிக்கப்பட்டிருந்தது அதற்கு முன்பாக தாங்கள் போராட்டத்தை நிறுத்தி விட்டு மாணவர்கள் நலனுக்காக மீண்டும் பள்ளிக்கு திரும்ப வேண்டும் என்று அவர் கோரிக்கை விடுத்திருந்தார்.

போராட்டம் வாபஸ் பெற இரு காரணங்கள்

இந்த நிலையில்தான் இன்று மாலை ஜாக்டோ ஜியோ வெளியிட்டுள்ள அறிவிப்பில், தங்கள் போராட்டம் தற்காலிகமாக வாபஸ் பெறப்படுவதாக அறிவிக்கப்பட்டுள்ளது. அரசு கடும் நடவடிக்கைகளை எடுத்து வந்து ஒரு பக்கம் என்றால், எதிர்க்கட்சி தலைவர் ஸ்டாலின் கோரிக்கை மற்றொரு பக்கம் என இந்த போராட்டத்தை கைவிடுவதற்கான காரணங்களாக கூறப்படுகின்றன.

English summary

Jacto Geo protest and strike withdrawn after 9 days as Tamilnadu government is not ready to speak with them and the leader of the opposition MK Stalin request them to join their work.