International Tiger Day 2025: இதுதான் இந்தியாவின் உறுமல் சக்சஸ்.. பாயும் தமிழ்நாடு! பூரிக்க வைக்கும் புலிகள் தினம்

சென்னை: இன்று, ஜூலை 29, சர்வதேச புலிகள் தினம் (World tiger day). உலகம் முழுவதும் உள்ள காடுகளில் கம்பீரமாக வலம் வரும் புலிகளைப் பாதுகாப்பதன் அவசியத்தை வலியுறுத்தவும், அவற்றின் வாழ்விடங்களைப் பேணவும் இந்த நாள் அனுசரிக்கப்படுகிறது.கடந்த நூற்றாண்டில், வேட்டையாடுதல், வாழ்விட இழப்பு மற்றும் மனித-வனவிலங்கு மோதல் போன்ற காரணங்களால் உலகில் 95% க்கும் அதிகமான புலிகள் அழிந்துவிட்டன. இந்த அபாயகரமான சரிவைத் தடுக்கும் நோக்கில், புலிகள் வசிக்கும் 13 நாடுகள் ஒன்றிணைந்து, 2022 ஆம் ஆண்டிற்குள் புலிகளின் எண்ணிக்கையை இரட்டிப்பாக்க Tx2 என்ற இலக்கை நிர்ணயித்தன. எனவே, 2010 ஆம் ஆண்டு ரஷ்யாவின் செயின்ட் பீட்டர்ஸ்பர்க் நகரில் நடைபெற்ற புலிகள் மாநாட்டில் இந்த தினம் நிறுவப்பட்டது.

இந்தியாவிடம்தான் அதிக புலிகள்

புராஜெக்ட் டைகர் (Project Tiger) என்ற மாபெரும் திட்டத்தை 1973-ஆம் ஆண்டிலேயே இந்தியா தொடங்கியது. இந்தத் தொலைநோக்குத் திட்டத்தின் விளைவாக, இன்று உலகின் மொத்த காட்டுப் புலிகளில் சுமார் 75% இந்தியாவில்தான் உள்ளன. ஆரம்பத்தில் 9 காப்பகங்களுடன் தொடங்கப்பட்ட இத்திட்டம், தற்போது 53 காப்பகங்களாக விரிவடைந்து, நாட்டின் 2.3% நிலப்பரப்பை உள்ளடக்கியுள்ளது. 2022 ஆம் ஆண்டு கணக்கெடுப்பின்படி, இந்தியாவில் 3,682 புலிகள் இருப்பது, நாட்டின் பாதுகாப்பு முயற்சிகளுக்குக் கிடைத்த மாபெரும் வெற்றியாகும்.

புலிகள் குடை இனம் (umbrella species) என அழைக்கப்படுகின்றன. இதன் பொருள், புலிகளைப் பாதுகாப்பதன் மூலம், அவை வாழும் காடுகளின் முழு சுற்றுச்சூழல் அமைப்பும், அதில் உள்ள மற்ற உயிரினங்களும் பாதுகாக்கப்படுகின்றன என்பதாகும். காடுகளின் ஆரோக்கியத்திற்கும் பல்லுயிர் பெருக்கத்திற்கும் புலிகள் மிக அவசியம். மத்திய பிரதேசத்திற்கு அடுத்தபடியாக, கர்நாடகாவில் அதிக புலிகள் உள்ளன.

தமிழ்நாட்டின் முயற்சிகள்

இந்தியாவின் புலிகள் பாதுகாப்பில் தமிழ்நாடு ஒரு முக்கியப் பங்காற்றுகிறது. நமது மாநிலத்தில் ஐந்து பெரிய புலிகள் காப்பகங்கள் உள்ளன:

• களக்காடு முண்டந்துறை
• ஆனைமலை
• முதுமலை
• சத்தியமங்கலம்

ஸ்ரீவில்லிபுத்தூர் மேகமலை

இந்தக் காப்பகங்கள் இணைந்து 6,150 சதுர கிலோமீட்டருக்கும் அதிகமான பரப்பளவைக் கொண்டுள்ளன. தேசிய புலிகள் பாதுகாப்பு ஆணையத்தின் கணக்கெடுப்பின்படி, தமிழ்நாட்டில் சுமார் 264 புலிகள் உள்ளன. தமிழ்நாடு அரசு, மத்திய அரசுடன் இணைந்து புராஜெக்ட் டைகர் திட்டத்தின் கீழ் ஆனைமலை மற்றும் முதுமலை காப்பகங்களுக்கு கோடிக்கணக்கில் நிதி ஒதுக்கி, புலிகளின் வழித்தடங்களைப் பாதுகாத்தல், வாழ்விடங்களை மேம்படுத்துதல் மற்றும் காட்டுத் தீ தடுப்பு போன்ற பணிகளை மேற்கொண்டு வருகிறது. இதன் ஒரு பகுதியாக, தென்னிந்தியாவிலேயே முதல் முறையாக, மேகமலை பகுதியில் உள்ள தனியாருக்குச் சொந்தமான நிலங்களைக் கையகப்படுத்தி, புலிகளின் வலசைப் பாதைக்கு வழிவகுத்துள்ளது.

இன்றைய புலிகள் தினத்தை முன்னிட்டு, பல்வேறு கொண்டாட்டங்களுக்கும் விழிப்புணர்வு நிகழ்ச்சிகளுக்கும் ஏற்பாடுகள் செய்யப்பட்டுள்ளன. புலிகள் காடுகளின் காவலன். இந்த கம்பீரமான உயிரினத்தைப் பாதுகாப்பது நமது கடமை. இந்த சர்வதேச புலிகள் தினத்தில், புலிகளையும் அவற்றின் இயற்கை வாழ்விடங்களையும் பாதுகாக்க நாம் அனைவரும் ஒன்றிணைந்து செயல்படுவோம்.

English summary

Today, as the world observes International Tiger Day, India stands tall as a beacon of hope for these magnificent big cats. Home to approximately 75% of the global wild tiger population, the nation's unwavering commitment to conservation, exemplified by states like Tamil Nadu, continues to yield remarkable results.