அதிகாரி... ஆசிரியர்... அரசியல்வாதி... தொழில்முனைவோர்... அடுத்து..? சந்தோஷ் பாபுவின் புதிய அவதாரம்..!

சென்னை: இந்திய குடிமைப் பணியை ராஜினாமா செய்துவிட்டு ஆசிரியராகவும், அரசியல்வாதியாகவும் அவதாரம் எடுத்த சந்தோஷ் பாபு ஐ.ஏ.எஸ். இப்போது தொழில்முனைவோராக மாறியிருக்கிறார்.

தமிழகத்தில் உள்ள முக்கிய ஐ.ஏ.எஸ்.அதிகாரிகளில் ஒருவராக திகழ்ந்தவர் சந்தோஷ் பாபு. மிகவும் நேர்மையான இவர் கடந்த அதிமுக ஆட்சியில் டெண்டர் விவகாரம் ஒன்றில் ஏற்பட்ட கருத்து வேறுபாடு காரணமாக தனது பதவியை ராஜினாமா செய்துவிட்டு ஐ.ஏ.எஸ்.-க்கு படிக்கும் மாணவர்களுக்கு பாடம் எடுக்கும் ஆசிரியராக மாறினார்.

சிறிதுகாலம் அந்தப் பணியை செய்த அவர், அடுத்ததாக என்ன நினைத்தாரோ கமலஹாசனின் மக்கள் நீதி மய்யத்தில் தன்னை இணைத்துக்கொண்டார். இவருக்கு தலைமை அலுவலக பொதுச்செயலாளர் பதவியை கொடுத்த கமல், தேர்தல் அறிக்கை உள்ளிட்ட இன்னும் பல முக்கிய விவகாரங்களில் சந்தோஷ்பாபுவிடம் ஆலோசனைகளை கேட்டு அதன்படி செயல்பட்டார்.

கட்சியில் இணைந்த சில நாட்களில் சந்தோஷ்பாபு கமல்ஹாசனுக்கு நெருக்கமானவராக மாறினார். இதனிடையே நடைபெற்று முடிந்த சட்டமன்றத் தேர்தலில் சென்னை வேளச்சேரி தொகுதி வேட்பாளராக சந்தோஷ் பாபுவை நிறுத்தினார் கமல். தொகுதியின் மூலை முடுக்குகளுக்கு எல்லாம் பிரச்சாரத்துக்கு செல்வார் என கமல் எதிர்பார்த்திருந்த நிலையில் கொரோனாவால் பாதிக்கப்பட்டு வீட்டை தாண்டவில்லை அவர். அப்போதே இவரது நடவடிக்கைகள் குறித்து சலசலப்பு ஏற்பட்டது.

தேர்தல் முடிவுக்கு பிறகு மக்கள் நீதி மய்யத்தில் ஏற்பட்ட பிரளயத்தில் சந்தோஷ்பாபு அங்கிருந்து வெளியேறினார். ஐ.ஏ.எஸ். அதிகாரி, பிறகு ஐ.ஏ.எஸ். பயிற்சி மாணவர்களுக்கு பாடம் எடுக்கும் ஆசிரியர், அதைத் தொடர்ந்து அரசியல்வாதி, என்று இருந்த சந்தோஷ்பாபு இப்போது தொழில்முனைவோர் என்ற புதிய அவதாரத்தில் காட்சியளிக்கிறார்.

கேப்ஸ்டோன் ஐ.ஏ.எஸ்.அகாடமி என்ற பெயரில் புதிதாக நிறுவனம் தொடங்கியுள்ள அவர், முழுக்க முழுக்க இணைய வழியிலான ஐ.ஏ.எஸ்., ஐ.பி.எஸ். கோச்சிங் வகுப்புகளை தொடங்கவிருக்கிறார். இதற்காக பல லட்சங்கள் ஊதியமாக கொடுத்து ஓய்வு பெற்ற அனுபவம் வாய்ந்த ஐ.ஏ.எஸ்., ஐ.பி.எஸ். அதிகாரிகளை பணியில் அமர்த்தியுள்ளார். எல்லா சரி இவரது நிறுவனத்தில் சேர்ந்து பயிற்சி பெற கட்டணம் எவ்வளவு தெரியுமா ஒன்றரை லட்சம். இந்த தொகை கூடுதலாக இருப்பதாக அவருக்கு தொடர்ந்து கருத்துக்கள் வந்ததால் 94 ஆயிரமாக பயிற்சிக்கட்டணத்தை குறைத்திருக்கிறார் சந்தோஷ் பாபு.

English summary

Santosh Babu who became an entrepreneur