SIR பணிகள் தொடங்கியது.. வீட்டுக்கே வரும் அதிகாரிகள்.. என்னென்ன ஆவணங்கள் காட்ட வேண்டும்?

சென்னை: இந்திய தேர்தல் ஆணையம், வாக்காளர் பட்டியல் சிறப்பு தீவிர திருத்தப் பணியின் (SIR) இரண்டாம் கட்டத்தை தொடங்கியுள்ளது. இன்று முதல் வீடு வீடாகச் சென்று ஆய்வு செய்யும் பணி ஆரம்பமாகிறது. உங்கள் வீட்டிற்கு அதிகாரிகள் வரும் போது என்னென்ன ஆவணங்களை சமர்ப்பிக்க வேண்டும் என்று இங்கே பார்க்கலாம்.

'SIR 2.0' என்று பெயரிடப்பட்டுள்ள இந்த விரிவான பணி, 12 மாநிலங்கள் மற்றும் யூனியன் பிரதேசங்களை உள்ளடக்கியது. இந்தப் பணிகள் பிப்ரவரி 7, 2026 அன்று இறுதி வாக்காளர் பட்டியல் வெளியீட்டுடன் நிறைவடையும்.

வழக்கமான வாக்காளர் பட்டியல் புதுப்பித்தல்களைப் போலல்லாமல், 'SIR 2.0' என்பது இந்தியாவில் உள்ள மிகப்பெரிய வாக்காளர் தரவுத்தளத்தில் இருந்து பிழைகளை நீக்குவதற்கும், நகல்களை அகற்றுவதற்கும் வடிவமைக்கப்பட்ட ஒரு கள அளவிலான நடவடிக்கையாகும்.

வீடு வீடாகச் சென்று சரிபார்ப்பு

தகுதிவாய்ந்த வாக்காளர்கள் மட்டுமே பட்டியலில் இருப்பதை உறுதிசெய்ய, வீடு வீடாகச் சென்று சரிபார்ப்பு நடத்தப்படும். இறந்தவர்கள், இடம் பெயர்ந்தவர்கள் அல்லது நகல் உள்ளீடுகள் நீக்கப்படும். இது ஒரு ஜனநாயக தூய்மைப்படுத்தும் பணியாகும். இப்போது மொத்தமாக வாக்காளர் பட்டியல் முடக்கப்பட்டு உள்ளது. நீங்கள் அதிகாரிகள் தரும் ஆவணங்களை நிரப்பி கொடுத்தால் மட்டுமே உங்கள் வாக்காளர் லிஸ்ட் உறுதி செய்யப்படும்.

தலைமைத் தேர்தல் ஆணையர் ஞானேஷ் குமார் ஊடகங்களுக்கு, அளித்த பேட்டியில், இந்த முறை பீகாரில் வெற்றிகரமாக நடத்தப்பட்ட முன்னோடித் திட்டத்தின் அடிப்படையில் இருக்கும் என்று கூறினார். "பீகார் பணியைப் போன்றே இரண்டாம் கட்டமும் நடத்தப்படும்" என்று அவர், வாக்காளர் தரவுகளில் துல்லியத்தை உறுதிசெய்யும் வகையில் பணிகள் நடக்கும்.

அந்தமான் & நிக்கோபார் தீவுகள், சத்தீஸ்கர், கோவா, குஜராத், கேரளா, லட்சத்தீவு, மத்தியப் பிரதேசம், புதுச்சேரி, ராஜஸ்தான், தமிழ்நாடு, உத்தரப் பிரதேசம் மற்றும் மேற்கு வங்கம் ஆகிய மாநிலங்கள் மற்றும் யூனியன் பிரதேசங்களில் இந்த பணி நடைபெறும். அசாம் மாநிலம் அடுத்த ஆண்டு தேர்தலை எதிர்கொள்வதால், அதன் தனித்துவமான குடியுரிமை ஆவண விதிகளின் காரணமாக இந்த பட்டியலில் இருந்து விலக்கப்பட்டுள்ளது.

தேர்தல் ஆணையம் 'SIR 2.0'

தேர்தல் ஆணையம் 'SIR 2.0' ஐ ஒரு அரசியலமைப்பு அவசியமாகக் கருதுகிறது. கடைசியாக 2002 மற்றும் 2004 க்கு இடையில் நாடு தழுவிய சிறப்புத் தீவிர திருத்தம் நடைபெற்றது.

அதன்பிறகு, விரைவான நகரமயமாக்கல், உள்நாட்டு இடப்பெயர்வு மற்றும் மக்கள்தொகை மாற்றங்கள் நாட்டின் வாக்காளர் நிலப்பரப்பை கணிசமாக மாற்றியுள்ளன. "பெரிய அளவிலான இடப்பெயர்வு, நகல் வாக்காளர்கள், வாக்காளர்களின் மரணங்கள் மற்றும் பிற மாற்றங்கள் காரணமாக வாக்காளர் பட்டியல்கள் முழுமையாக திருத்தப்பட வேண்டும்" என்று ஆணையம் குறிப்பிட்டது.

அரசியல் கட்சிகளும் வாக்காளர் பட்டியல்களின் தரம் குறித்த பிரச்சினைகளை அடிக்கடி சுட்டிக்காட்டி, அடிக்கடி திருத்தங்களை கோரியுள்ளன. பீகாரில் முதல் கட்ட 'SIR' பணியின் போது, தேர்தல் ஆணையம் சுமார் 68 லட்சம் பெயர்களை நீக்கியதுடன், 21 லட்சம் புதிய வாக்காளர்களை சேர்த்தது.

ஒவ்வொரு சட்டமன்றத் தொகுதியும் ஒரு தேர்தல் பதிவு அலுவலரால் (ERO) நிர்வகிக்கப்படும். இவருக்கு துணையாக சாவடி நிலை அலுவலர்கள் (BLOs) இருப்பார்கள். இவர்கள் விவரங்களை சரிபார்க்க வீடுகளுக்கு நேரில் செல்வார்கள்.

எத்தனை அதிகாரிகள் - எத்தனை வாக்காளர்கள்

ஒவ்வொரு சாவடி நிலை அலுவலரும் சுமார் 1,000 வாக்காளர்களைக் கையாளுவார்கள். அவர்கள் கணக்கெடுப்பு படிவங்களை (EFs) விநியோகிப்பார்கள் மற்றும் புதிய பதிவுகளுக்கான படிவம் 6 ஐ, சரிபார்ப்புக்கான அறிவிப்பு படிவத்துடன் சேகரிப்பார்கள்.

நகர்ப்புற மற்றும் புலம் பெயர்ந்த வாக்காளர்கள் தங்கள் படிவங்களை ஆன்லைனில் சமர்ப்பிக்கலாம். அரசியல் கட்சிகளின் சாவடி நிலை முகவர்கள் (BLAs) ஒரு நாளைக்கு 50 படிவங்கள் வரை சாவடி நிலை அலுவலரிடம் சமர்ப்பிக்கலாம்.

நீக்குதல்களுக்கு எதிரான மேல்முறையீடுகளை மாவட்ட ஆட்சியரிடமும், தேவைப்பட்டால் பின்னர் தலைமைத் தேர்தல் அலுவலரிடமும் தாக்கல் செய்யலாம்.

அக்டோபர் 28 முதல் நவம்பர் 3 வரை அச்சிடுதல் மற்றும் பயிற்சி அமர்வுகளுடன் இந்த செயல்முறை தொடங்குகிறது. வீடு வீடாகச் சென்று கணக்கெடுக்கும் பணி நவம்பர் 4 முதல் டிசம்பர் 4 வரை நடைபெறும்.

பொதுமக்கள் கோரிக்கைகள் மற்றும் ஆட்சேபணைகள்

பின்னர் டிசம்பர் 9 அன்று வரைவுப் பட்டியல்கள் வெளியிடப்படும். அதன் பிறகு, ஜனவரி 8, 2026 வரை பொதுமக்கள் கோரிக்கைகள் மற்றும் ஆட்சேபணைகளைத் தாக்கல் செய்யலாம்.

விசாரணைகள் மற்றும் சரிபார்ப்புகள் ஜனவரி 31 வரை தொடரும். இறுதி வாக்காளர் பட்டியல் பிப்ரவரி 7, 2026 அன்று வெளியிடப்படும். பங்கேற்கும் 12 மாநிலங்கள் மற்றும் யூனியன் பிரதேசங்களில் உள்ள அனைத்து வாக்காளர் பட்டியல்களும் கணக்கெடுப்பு தொடங்கும் நவம்பர் 4 நள்ளிரவு முதல் முடக்கப்படும்.

எந்தெந்த ஆவணங்கள் தேவை?

சரிபார்ப்பின் போது எந்த ஆவணமும் கட்டாயமில்லை என்று தேர்தல் ஆணையம் தெளிவுபடுத்தியுள்ளது.
ஆனாலும், அடையாள மற்றும் வசிப்பிடச் சான்றுகளாகப் பயன்படுத்தக்கூடிய 12 பரிந்துரைக்கப்பட்ட ஆவணங்களின் பட்டியலை வெளியிட்டுள்ளது.

1. மத்திய/மாநில அரசு/பொதுத்துறை நிறுவனங்களின் ஊழியர்கள்/ஓய்வூதியதாரர்களுக்கு வழங்கப்படும் அடையாள அட்டைகள், ஓய்வூதியப் பணம் செலுத்தும் உத்தரவு.

2. இந்திய அரசு/வங்கிகள்/உள்ளாட்சி அமைப்புகள்/பொதுத்துறை நிறுவனங்களால் வழங்கப்படும் அடையாள அட்டைகள்/சான்றிதழ்கள்/ஆவணங்கள்.

3. உரிய அதிகாரியால் வழங்கப்பட்ட பிறப்புச் சான்றிதழ்.

4. கடவுச்சீட்டு (பாஸ்போர்ட்).

5. அங்கீகரிக்கப்பட்ட வாரியங்கள்/பல்கலைக்கழகங்களால் வழங்கப்படும் மெட்ரிக்/கல்விச் சான்றிதழ்.

6. மாநில அதிகாரியால் வழங்கப்பட்ட நிரந்தர வசிப்பிடச் சான்றிதழ்.

7. வன உரிமைச் சான்றிதழ்.

8. இதர பிற்படுத்தப்பட்டோர்/பட்டியல் பழங்குடியினர்/பட்டியல் இனத்தவர் அல்லது வேறு எந்த சாதிச் சான்றிதழ்.

9. தேசிய குடிமக்கள் பதிவேடு (எங்கு உள்ளதோ அங்கு).

10. மாநில/உள்ளாட்சி அமைப்புகளால் தயாரிக்கப்பட்ட குடும்பப் பதிவேடு.

11. அரசால் வழங்கப்படும் நிலம்/வீட்டு ஒதுக்கீட்டுச் சான்றிதழ்.

12. ஆதார் அட்டைக்கு, ஆணையத்தின் கடிதம் எண். 23/2025-ERS/Vol.II, தேதி 09.09.2025 இல் வழங்கப்பட்ட வழிமுறைகள் பொருந்தும். கணக்கெடுப்பு செயல்பாட்டின் போது எந்த ஆவணமும் தேவையில்லை.

ஜூலை 1, 1987-க்கு முன் வழங்கப்பட்ட எந்தவொரு அரசு அல்லது பொதுத்துறை நிறுவன ஆவணமும், தேசிய குடிமக்கள் பதிவேட்டில் உள்ள பதிவுகளும் (பொருந்தும் இடங்களில்) ஏற்றுக்கொள்ளப்படும்.

English summary

SIR begins: What are the documents needed for the Special Intensive Revision in Tamil Nadu