ஹீராபென் மறைவு: தாயாரை இழந்த துயரம் யாராலும் தாங்க முடியாதது -பிரதமர் மோடிக்கு மு.க ஸ்டாலின் ஆறுதல்!

Published: Friday, December 30, 2022, 8:50 [IST]

Subscribe to Oneindia Tamil

சென்னை: பிரதமர் மோடியின் தாயர் ஹீராபென் மோடி இன்று அதிகாலை காலமானார். அவரது மறைவுக்கு தமிழக முதல்வர் மு.க ஸ்டாலின் இரங்கல் தெரிவித்துள்ளார். தாயாரை இழந்த துயரம் யாராலும் தாங்க முடியாதது. உங்களுக்கு ஏற்பட்ட இழப்புக்காக ஆழ்ந்த இரங்கலை தெரிவித்துக்கொள்கிறேன் என்று பிரதமர் மோடிக்கு மு.க ஸ்டாலின் இரங்கல் தெரிவித்துள்ளார்.

பிரதமர் மோடியின் தாயர் ஹீராபென் மோடி. கடந்த ஜூன் மாதம் 100-வது பிறந்த நாளை ஹீராபென் மோடி கொண்டாடினார்.

குஜராத்தின் அகமதாபாத்தில் உள்ள பிருந்தாவன் சொசைட்டியில் தனது இளைய மகன் பங்கஜ் மோடியுடன் வசித்து வந்தார். பிரதமர் மோடி குஜராத் மாநிலம் செல்லும் போதெல்லாம் தவறாமல் தனது தாயார் ஹீராபென் மோடியை சந்தித்து விட்டு செல்வார்.

உடல் நலம் குறித்து விசாரிக்க

கடந்த 2 தினங்களுக்கு முன்பாக பிரதமர் மோடியின் தாயார் ஹீராபென் மோடிக்கு உடல் நலக்குறைவு ஏற்பட்டது. இதையடுத்து,நேற்று முன் தினம் அகமதாபாத்தில் உள்ள யு.என்.மேத்தா இதய நோய் மருத்துவமனையில் அனுமதிக்கப்பட்டார். மருத்துவமனையில் அனுமதிக்கப்பட்ட தாயாரின் உடல் நலம் குறித்து விசாரிக்க பிரதமர் மோடி உடனடியாக நேற்று முன் தினம் அகமதாபாத் சென்றார்.

உடல் நலம் தேற வேண்டி..

தாயார் அனுமதிக்கப்பட்டுள்ள மருத்துவமனைக்கு சென்ற பிரதமர் மோடி, தனது தாயாரின் உடல் நலம் குறித்து மருத்துவர்களிடமும் விசாரித்தார். ஹீராபென் மோடியின் உடல் நலனில் முன்னேற்றம் இருப்பதாகவும் விரைவில் டிஸ்சார்ஜ் செய்யப்படுவார் என்றும் மருத்துவமனை தரப்பில் தெரிவிக்கப்பட்டு இருந்தது. பிரதமர் மோடியின் தாயார் உடல் நலம் தேற வேண்டு என்று ராகுல் காந்தி உள்பட நாடு முழுவதும் உள்ள அரசியல் தலைவர்கள் விருப்பம் தெரிவித்து இருந்தனர்.

அதிகாலையில் உயிரிழந்தார்

இந்த நிலையில் இன்று அதிகாலை 3.39 மணியளவில் பிரதமர் மோடியின் தாயார் ஹீராபென் மோடி காலமானார். தாயார் மறைவையடுத்து பிரதமர் மோடி அவசர அவசரமாக அகமதாபத் புறப்பட்டு சென்றார். பிரதமர் மோடியின் தாயார் மறைவுக்கு நாடு முழுவதும் உள்ள அரசியல் தலைவர்கள் இரங்கல் தெரிவித்து வருகின்றனர். உள்துறை அமைச்சர் அமித்ஷா, மத்திய பாதுகாப்புத்துறை அமைச்சர் ராஜ்நாத்சிங், குஜராத் முதல்வர் பூபேந்திர படேல் என பலரும் இரங்கல் தெரிவித்து வருகின்றனர்.

யாராலும் தாங்க முடியாதது

அந்த வகையில், தமிழக முதல்வர் மு.க ஸ்டாலினும் பிரதமர் மோடியின் தாயார் மறைவுக்கு இரங்கல் தெரிவித்து தனது ட்விட்டரில் பதிவிட்டு இருக்கிறார். முதல்வர் மு.க ஸ்டாலின் வெளியிட்ட பதிவில் கூறியிருப்பதாவது: - தாயார் ஹீராபென்னுடன் நீங்கள் கொண்டிருந்த உணர்ச்சிப்பூர்வமான பிணைப்பை நாங்கள் அறிவோம். தாயாரை இழந்த துயரம் யாராலும் தாங்க முடியாதது. உங்களுக்கு ஏற்பட்ட இழப்புக்காக ஆழ்ந்த இரங்கலை தெரிவித்துக்கொள்கிறேன். தாயாருடன் நீங்கள் பகிர்ந்து கொண்ட நினைவுகளில் அமைதி ஆறுதலை நீங்கள் பெறுவீர்கள்" என்று பதிவிட்டுள்ளார். இதேபோல தமிழக முன்னாள் முதல்வரும் தற்போதைய எதிர்க்கட்சி தலைவருமான எடப்பாடி பழனிசாமி மற்றும் தமிழக முன்னாள் முதல்வர் ஓ பன்னீர் செல்வம் உள்பட பலரும் ஹீராபென் மோடி மறைவுக்கு இரங்கல் தெரிவித்துள்ளனர்.

Published On December 30, 2022