சந்திராயன்களை தொடர்ந்து சூரியன் ஆய்வு ஆதித்யா எல்-1 திட்ட இயக்குநர் தமிழக பெண் விஞ்ஞானி நிகர் சாஜி!
சென்னை: இந்திய விண்வெளி ஆய்வுத் துறையின் (இஸ்ரோ) புதிய சரித்திரமான ஆதித்யா எல்-1 திட்ட இயக்குநர் தமிழ்நாட்டு பெண் விஞ்ஞானி நிகர் சாஜி என்பது பெருமிதத்திக்குரியது.
இஸ்ரோவின் சந்திரயான் விண்கலங்கள் மூன்றுக்கும் திட்ட இயக்குநர்களாக தமிழ்நாட்டு தமிழர்கள் தலைமை வகித்தனர். சந்திரயான் -1 க்கு விஞ்ஞானி மயில்சாமி அண்ணா துரை, சந்திரயான் 2--க்கு விஞ்ஞானி வளர்மதி, சந்திரயான் 3-க்கு விஞ்ஞானி வீரமுத்துவேல் திட்ட இயக்குநர்களாகப் பணியாற்றினர். மேலும் சந்திரயான் 3 குழுவில் பல்வேறு நிலையில் தமிழ்நாட்டின் குக்கிராமங்களில் படித்து பட்டம் பெற்ற விஞ்ஞானிகள் பலரும் இடம் பெற்றிருதனர்.
சந்திரயான் 3 விண்கலமானது ஆகஸ்ட் 23-ந் தேதி நிலவின் தென் துருவத்தில் வெற்றிகரமாக தரை இறக்கப்பட்டது. இதனால் ஆகஸ்ட் 23-ந் தேதி தேசிய விண்வெளி தினமாகவும் பிரகடனப்படுத்தப்பட்டுள்ளது. நிலவின் தென் துருவம் அருகே கால் பதித்த முதல் நாடு என்கிற பெருமையை இந்தியா பெற்றுள்ளது.
இதனைத் தொடர்ந்து சூரியனை ஆய்வு செய்யும் ஆதித்யா எல்-1 விண்கலம் நாளை விண்ணில் ஏவப்படுகிறது. இதற்கான கவுண்ட்டன் இன்று தொடங்குகிறது. ஆதித்யா எல்-1 விண்கலமானது, ஸ்ரீஹரிகோட்டாவில் இருந்து பிஎஸ்எல்வி சி-57 ராக்கெட் மூலம் விண்ணில் ஏவப்படுகிறது.
ஆதித்யா எல்-1 திட்ட இயக்குநராகவும் தமிழ்நாட்டின் தென்காசி மாவட்டத்தைச் சேர்ந்த விஞ்ஞானி நிகர் சாஜி பொறுப்பு வகிக்கிறார் என்பதில் தமிழ்நாடு பெருமிதம் கொள்கிறது.
தென்காசி மாவட்டம் செங்கோட்டை சுலைமான்நபி பள்ளிவாசல் ஜமாத் பகுதியைச் சேர்ந்தவர் நிகர் சாஜி. அவரது பெற்றோர் ஷேக் மீரான், சைத்தூன் பீவி ஆகியோராவர். செங்கோட்டை தனியார் பள்ளியில் பயின்று பிளஸ் டூவில் மாவட்ட முதலிடம் பெற்றார். பின்னர் நெல்லை அரசு பொறியியல் கல்லூரியில் பட்டம் படித்து முடித்தார். பிர்லா இன்ஸ்டிடியூட் நிறுவனத்தில் மேற்படிப்பை முடித்து இஸ்ரோவில் இணைந்தார் நிகர் சாஜி.
நிகர் சாஜியின் கணவர் ஷாஜகான் துபாயில் பொறியாளராகவும் அவரது மகன் முகம்மது தாரிக் நெதர்லாந்து நாட்டில் விஞ்ஞானியாகவும் பணிபுரிகின்றனர். நிகர் சாஜி- ஷாஜகான் மகள் தஸ்நீம் பெங்களூரில் படித்து வருகிறார்.
இஸ்ரோவின் தேசத்துக்கு பெருமை சேர்க்கும் திட்டங்கள் அனைத்திலும் தமிழர்கள் கொடிநாட்டிப் பறக்கின்றனர்!
Click it and Unblock the Notifications
Sign in with Google