”ஸ்போர்ட்ஸ் நாதனாகவே மாறிவிட்டார்” மெய்யநாதனை பாராட்டிய முதல்வர் ஸ்டாலின்.. அதிர்ந்த ஸ்டேடியம்!

Updated: Monday, September 12, 2022, 16:41 [IST]

Subscribe to Oneindia Tamil

சென்னை: தமிழக விளையாட்டுத்துறை அமைச்சர் மெய்யநாதன் "ஸ்போர்ட்ஸ்" நாதனாகவே மாறிவிட்டார் என்று முதலமைச்சர் மு.க.ஸ்டாலின் பாராட்டியுள்ளார்.

சர்வதேச, தேசிய விளையாட்டுப் போட்டிகளில் வென்ற வீரர்களுக்கு முதலமைச்சர் மு.க. ஸ்டாலின் விருதுகளை வழங்கி கவுரவித்தார். அதேபோல் 2018, 2019 மற்றும் 2020 ஆகிய ஆண்டுகளுக்கான விளையாட்டு விருதாளர்களுக்கு பரிசுத் தொகையை வழங்கினார்.

இதனைத்தொடர்ந்து விளையாட்டு வீரர்களுக்கு உள்ள சந்தேகங்களை கேட்டறிய "ஆடுகளம்" என்ற புதிய உதவி மையத்தை முதல்வர் ஸ்டாலின் தொடங்கிவைத்தார். இந்த உதவி மையத்தில் விளையாட்டுப் போட்டிகள் தொடர்பான சந்தேகங்களை தொலைபேசி மூலம் கேட்டறிய முடியும் என்று தெரிவிக்கப்பட்டுள்ளது.

முதல்வர் ஸ்டாலின் பேச்சு

இதனைத்தொடர்ந்து முதலமைச்சர் மு.க.ஸ்டாலின் பேசுகையில், கடந்த 3 ஆண்டுகளில் மூன்றாவது முறையாக நேரு உள்விளையாட்டு அரங்கிற்கு வந்துள்ளேன். இதன் மூலம் தமிழக விளையாட்டுத்துறை, விளையாட்டு வீரர் ஓடும் வேகத்தில் செயல்பட்டு வருவது அனைவருக்கும் தெரிந்து கொள்ளலாம். உலகமே வியந்து பார்க்கும் வகையில் செஸ் ஒலிம்பிட் போட்டியை நடத்திக் காட்டியுள்ளது தமிழக விளையாட்டு துறை.

”ஸ்போர்ட்ஸ் நாதன்”

தற்போது சென்னை ஓபன் மகளிர் டென்னிஸ் போட்டியை தொடங்க ஆயத்தமாகி வருகிறது. அமைச்சர் மெய்யநாதன் ஒரு ஸ்போர்ட்ஸ் நாதனாகவே மாறிவிட்டார். தனது துறையை என்றும், எப்போதும் துடிப்புடன் வைத்துக் கொள்ள வேண்டும் என்று செயல்பட்டு வருகிறார். இப்படி ஒரு அமைச்சர் கிடைத்ததற்கு பெருமை கொள்ள வேண்டும்.

விளையாட்டுத்துறை

திராவிட மாடல் குறிக்கோளின்படி, அனைத்து துறைகளிலும் வளர்ச்சி பெற வேண்டும் என்பதே எங்களின் நோக்கம். அதில் விளையாட்டுத் துறைக்கு எடுத்துக்காட்டாக இந்த விழா நடைபெற்று வருகிறது. ஒரே விழாவில் 4 முக்கிய நிகழ்வுகளுக்கு ஏற்பாடு செய்யப்பட்டுள்ளன. வீரர்கள், பயிற்சியாளர்கள் விருது, சர்வதேச, தேசிய வீரர்களுக்கான ஊக்கத்தொகை, முதலமைச்சர் போட்டிகளுக்கான விண்ணப்பம் தொடக்கம், ஆடுகளம் தகவல் மையம் ஆகியவை தொடங்கி வைக்கப்பட்டுள்ளது.

நம்ம ஊர் வீரர்கள்

உலகளவில் விளையாட்டுத்துறை தமிழ்நாடு முதன்மை பெற வேண்டும். நம்ம ஊர் வீரர்கள் சர்வதேச போட்டிகளில் பதக்கம் பெற வேண்டும். அந்த அளவிற்கு உயரிய நோக்கத்துடன் தமிழ்நாடு அரசு செயல்பட்டு வருகிறது என்று தெரிவித்தார்.