தமிழகத்தில் மளமளவென குறையும் கொரோனா! பாசிட்டிவ் விகிதமும் 6க்கு கீழ் சரிந்தது! பொதுமக்கள் நிம்மதி

சென்னை: தமிழ்நாட்டில் தினசரி கொரோனா பாதிப்பு தொடர்ந்து குறைந்து வரும் நிலையில், உயிரிழப்புகளும் கட்டுக்குள் வந்துள்ளது.

தமிழ்நாட்டில் ஓமிக்ரான் கொரோனா பின்னர் பல மாதங்களாக கொரோனா பாதிப்பு தொடர்ந்து குறைந்தே வந்தது. இதற்கிடையே வைரஸ் பாதிப்பு மீண்டும் சில வாரங்களாக அதிகரிக்கத் தொடங்கியது.

இதனால் பொதுமக்களிடையே ஊரடங்கு தொடர்பான அச்சமம் எழுந்தது. இந்தச் சூழலில் மாநிலத்தில் வைரஸ் பாதிப்பு கடந்த சில நாட்களாகவே தொடர்ந்து குறைந்தே வருகிறது.

தினசரி பாதிப்பு

பல நாட்களுக்குப் பின்னர் நேற்று மாநிலத்தில் தினசரி கொரோனா பாதிப்பு 2000க்கு கீழ் குறைந்து இருந்தது. இந்நிலையில், இன்றும் வைரஸ் பாதிப்பு குறைந்தே உள்ளது. இன்று மாநிலத்தில் மொத்தம் 27,975 பேருக்கு கொரோனா பரிசோதனை செய்யப்பட்டது. அதில் அந்தமானில் இருந்து திரும்பிய ஒருவர் உட்பட மொத்தம் 1903 பேருக்கு கொரோனா பாதிப்பு உறுதியானது. இதுவரை மாநிலத்தில் 35,34,246 பேருக்கு கொரோனா பாதிப்பு உறுதியாகி உள்ளது.

ஆக்டிவ் கேஸ்கள்

மாநிலத்தில் வைரஸ் பாதிப்பு தொடர்ந்து குறைந்து வரும் நிலையில், ஆக்டிவ் கேஸ்களின் எண்ணிக்கையும் தொடர்ந்து குறைந்தே வருகிறது. நேற்று தமிழகத்தில் மொத்தம் 15,409 கொரோனா நோயாளிகள் சிகிச்சை பெற்று வந்த நிலையில், இன்று அது 15,093ஆக குறைந்து உள்ளது. அதிகபட்சமாகச் சென்னையில் சுமார் 4901 பேரும் செங்கல்பட்டில் 1698 பேரும் சிகிச்சை பெற்று வருகின்றனர்.

உயிரிழப்புகள் இல்லை

மேலும், இன்று ஒரே நாளில் மட்டும் மொத்தம் 2219 பேர் கொரோனா பாதிப்பில் இருந்து விடுபட்டு உள்ளனர். இதன் மூலம் கொரோனாவில் இருந்து ஒட்டுமொத்தமாகக் குணமடைந்தோரின் எண்ணிக்கை 34,81,121ஆக உயர்ந்துள்ளது. கடந்த சில நாட்களைப் போலவே நல்வாய்ப்பாக இன்றும் கொரோனாவால் யாரும் உயிரிழக்கவில்லை. மாநிலத்தில் பதிவான கொரோனா உயிரிழப்புகள் 38032ஆகவே உள்ளது.

மாவட்ட வாரியாக பாதிப்பு

தலைநகர் சென்னையில் கொரோனா பாதிப்பு 500க்கு கீழாகக் குறைந்துள்ளது. ஒரே நாளில் அங்கு 415 பேருக்கு வைரஸ் பாதிப்பு கண்டறியப்பட்டு உள்ளது. அதைத் தொடர்ந்து செங்கல்பட்டில் 202 பேருக்கும் கோவையில் 177 பேருக்கும் வைரஸ் பாதிப்பு உறுதியாகி உள்ளது. இது தவிர விருதுநகரில் 96 பேருக்கு கொரோனா உறுதியாகி உள்ளது. மாநிலத்தின் பாசிட்டிவ் விகிதம் 5.6ஆக குறைந்துள்ள நிலையில், அதிகபட்சமாகத் திருப்பூரில் பாசிட்டிவ் விகிதம் 15.4ஆக உள்ளது.

English summary

Tamilnadu Corona cases falls below 2000: (தமிழ்நாடு தினசரி கொரோனா பாதிப்பு மற்றும் கொரோனா உயிரிழப்புகள்) Tamilnadu Coronavirus latest updates in tamil.