சென்னையில் இன்று முதல் டீ, காபி விலை உயர்வு! 3 ஆண்டுகளுக்கு பிறகு நடந்த மாற்றம்!

சென்னை: சென்னையில் இன்று முதல் டீக்கடைகளில் டீ, காபி விலை உயர்த்தப்படுகிறது. நேற்று வரை டீ 10 ரூபாய்க்கும், காபி 12 ரூபாய்க்கும் விற்கப்பட்டு வந்த நிலையில் இன்று முதல் புதிய விலைக்கு விற்பனை செய்யப்படுகிறது. இந்த விலையுயர்வு 3 ஆண்டுகளுக்கு பிறகு இன்று முதல் உயர்த்தப்படுகிறது.

என்னதான் வீடுகளில் டீ, காபி போட்டாலும் டீக்கடைகளுக்கு சென்று டீ, காபி குடிப்பதை சிலர் வாடிக்கையாக வைத்திருப்பார்கள். இதனால்தான் அதிகாலை 4 மணி முதலே டீக்கடைகள் திறந்திருக்கும்.

இங்கு ஆரம்பத்தில் டீ, காபி மட்டுமே விற்கப்பட்ட நிலையில் தற்போது காலத்திற்கேற்ப லெமன் டீ, பூஸ்ட், போர்ன்வீட்டா, ஹார்லிக்ஸ், கிரீன் டீ, பிளாக் டீ உள்ளிட்டவைகளும் விற்பனை செய்யப்படுகின்றன.

டீக்கடையை வாடகைக்கு விட்டுவிட்டு மேலே குடியிருப்போர் கூட டீக்கடைக்கு வந்து டீ, காபி சாப்பிடுவதையே விரும்புவர். இந்த டீ, காபி இதுவரை காபி ரூ 12 க்கும் டீ ரூ 10-க்கும் விற்பனை செய்யப்பட்டு வந்தது.

இந்த நிலையில் இன்று முதல் டீ, காபி விலை கூடுதலாகிறது. இதை சென்னை டீ கடை உரிமையாளர்கள் சங்கம் அறிவித்துள்ளது. டீ ரூ 15, காபி ரூ 20-க்கும் விற்கப்படுகிறது. அது போல் பால், லெமன் டீயும் 15 ரூபாய்க்கு விற்பனையாகிறது. காபி, ஸ்பெஷல் டீ, ராகி மால்ட், சுக்கு காபி உள்ளிட்டவை 20 ரூபாய்க்கு விற்பனையாகும்.

அது போல் பூஸ்ட், ஹார்லிக்ஸ் ரூ 25-க்கு விற்பனை செய்யப்படும். இதே பார்சல் என்றால் டீ, பால் ரூ 45-க்கும், லெமன் டீ, காபி, ஸ்பெஷல் டீ, ராகி மால்ட், சுக்கு காபி உள்ளிட்டவை ரூ 60-க்கும், பூஸ்ட், ஹார்லிக்ஸ் ஆகியவை ரூ 70-க்கும் விற்பனையாகிறது.

சென்னையில் 1000-க்கும் மேற்பட்ட டீக்கடைகள் இயங்கி வருகின்றன. பால் விலை, கேஸ் சிலிண்டர் விலை உயர்வு உள்ளிட்ட காரணங்களால் கடந்த 2022 ஆம் ஆண்டு சென்னையில் 10 ரூபாய்க்கு விற்கப்பட்ட டீயின் விலை 2 ரூபாய் உயர்த்தப்பட்டு 12 ரூபாய்க்கும், 12 ரூபாய்க்கு விற்கப்பட்ட காபி ரூ 3 உயர்த்தப்பட்டு ரூ 15 க்கும் விற்கப்பட்டு வந்தது.

இந்த நிலையில் சென்னையில் 3 ஆண்டுகளுக்கு பிறகு, பால் விலை, காபி, டீ தூள் விலை, போக்குவரத்து செலவு உள்ளிட்ட காரணங்களுக்காக இன்று முதல் டீ, காபி விலை உயர்த்தப்படுகிறது. அது போல் போண்டா, பஜ்ஜி, சமோசா விலையும் ரூ 3 உயர்த்தப்பட்டு ரூ 15-க்கு விற்கப்படுகிறது.

English summary

Starting today, tea and coffee prices at Chennai tea shops have been increased after three years. Until yesterday, tea was sold at ₹10 and coffee at ₹12, but with the new revision, both beverages will now cost more. The price hike comes after a long gap, citing rising expenses in recent years.