சாதி மத மோதல்களை தடுக்க காவல்துறை இதைச் செய்ய வேண்டும்! திருமாவளவன் அளிக்கும் யோசனை!

சென்னை: தமிழகத்தில் சாதி மத மோதல்களை தடுத்திடும் வகையில் சாதி மத மோதல் பிரிவிலும் உளவுத்துறையை அமைக்க வேண்டும் என காவல்துறைக்கு விசிக தலைவர் திருமாவளவன் யோசனை தெரிவித்துள்ளார்.

மேலும், பாஜக மாநில தலைவர் அண்ணாமலை அரசியல் பேசாமல் அவதூறு பேசி வருவதாக சாடினார்.

சேலத்தில் நடைபெற்ற நிகழ்ச்சி ஒன்றில் பங்கேற்ற அவர் இதனைக் கூறினார்.

விடுதலை சிறுத்தைகள்

சேலம் மாவட்டத்தில் விடுதலை சிறுத்தைகள் கட்சியின் சார்பில் ஊராட்சி மற்றும் பேரூராட்சி பகுதிகளில் போட்டியிட்டு வெற்றி பெற்றவர்கள் சந்திப்பு நிகழ்ச்சி இன்று தனியார் நட்சத்திர விடுதியில் நடைபெற்றது. அதில் அக்கட்சியின் தலைவர் திருமாவளவன் கலந்து கொண்டு வெற்றி பெற்றவர்களுக்கு வாழ்த்து தெரிவித்தார். அதனை தொடர்ந்து செய்தியாளர்களை சந்தித்த அவர், தமிழகத்தில் பெண்கள் மீதான பாலியல் வன்கொடுமை குற்றங்களை தடுப்பதற்கு சிறப்பு புலனாய்வு குழு அல்லது தனி உளவுத்துறை அமைக்க வேண்டும் என வலியுறுத்தினார்.

சாதி மத மோதல்

மேலும், சாதி மத மோதல்களை தடுத்திடும் வகையில் சிறப்பு சைபர் கிரைம் உளவுத்துறை அமைக்க வேண்டுமென கேட்டுக்கொண்டார். தமிழக பாஜக மாநில தலைவர் அண்ணாமலை அரசியல் பேசாமல் அவதூறு பேசி வருகிறார் என்றும் தன்னுடைய பெயரை விளம்பரப்படுத்தி அனைத்து தொலைக்காட்சிகளும் அவரைப் பற்றி பேச வேண்டும் என்ற நோக்கத்தில் அவர் பேசி வருகிறார் எனவும் திருமாவளவன் விமர்சித்தார்.

நீட் விலக்கு மசோதா

மேலும் அவதூறு பேசி வரும் அண்ணாமலை மீது காவல்துறையினர் வழக்கு பதிவு செய்ய வேண்டும் என்றும் நீட் தேர்வுக்கு எதிராக தமிழக சட்டமன்றத்தில் இயற்றப்பட்ட தீர்மானம் தற்போது ஆளுநரிடம் உள்ள நிலையில், அந்த தீர்மானத்தை விரைந்து குடியரசுத் தலைவருக்கு அனுப்பி வைக்க வேண்டும் என திருமாவளவன் கோரிக்கை விடுத்தார். நீட் விலக்கு மசோதாவை குடியரசுத் தலைவர் கிடப்பில் போடாமல் ஒப்புதல் வழங்கி உள்துறை அமைச்சகத்திற்கு அனுப்ப வேண்டும் எனக் கேட்டுக்கொண்டார்.

2-வது தலைவர்

பாஜக மாநில தலைவர் அண்ணாமலை அரசியல் செய்யாமல் அவதூறு பரப்பி வருவதாக குற்றஞ்சாட்டும் இரண்டாவது அரசியல் கட்சித் தலைவர் திருமாவளவன் என்பது குறிப்பிடத்தக்கது. ஏற்கனவே இதே குற்றச்சாட்டை அண்ணாமலை மீது இந்திய கம்யூனிஸ்ட் மாநிலச் செயலாளர் முத்தரசன் கூறியிருப்பது கவனிக்கத்தக்கது.

English summary

Thirumavalavan pressmeet: தமிழகத்தில் சாதி மத மோதல்களை தடுத்திடும் வகையில் சாதி மத மோதல் பிரிவிலும் உளவுத்துறையை அமைக்க வேண்டும் என காவல்துறைக்கு விசிக தலைவர் திருமாவளவன் யோசனை தெரிவித்துள்ளார்.