சென்னையில் 3 நாட்கள் டிரோன் பயிற்சி.. ஆர்வமுள்ளோர் விண்ணப்பிக்கலாம்! தமிழக அரசு ஸ்பெஷல் ஏற்பாடு!

சென்னை: தமிழக அரசின் சார்பில் சென்னையில் வரும் மார்ச் 18 ஆம் தேதி முதல் 20 ஆம் தேதி வரை 3 நாட்கள் டிரோன் (Drone) பயிற்சி வழங்கப்பட உள்ளது. 10 ஆம் வகுப்பு முடித்து, 18 வயது நிரம்பிய ஆர்வமுள்ள யார் வேண்டுமானாலும் முன்பதிவு செய்து டிரோன் பயிற்சி பெறலாம்.

தமிழக அரசின் தொழில்முனைவோர் மேம்பாடு மற்றும் புத்தாக்க நிறுவனம் மூலம் பல்வேறு துறைகளில் தொழில்முனைவோர்களை உருவாக்கும் விதமாகவும், தொழில்முனைவோர்களுக்கு தொழில் வளர்ச்சிக்கு உதவும் வகையிலும் பல்வேறு பயிற்சிகள் அளிக்கப்பட்டு வருகின்றன. அந்த வகையில், டிரோன் இயந்திரம் இயக்க பயிற்சி அளிக்கப்பட உள்ளது.

இது குறித்து தமிழக அரசு வெளியிட்டுள்ள செய்திக் குறிப்பில், தமிழக அரசின் தொழில் முனைவோர் மேம்பாடு மற்றும் புத்தாக்க நிறுவனம் சார்பில் சென்னையில், 3 நாள்கள் தொழில் முனைவோர் மேம்பாட்டு திட்டம் ட்ரோன் பயிற்சி வரும் 18.03.2025 முதல் 20.03.2025 தேதி வரை காலை 9.30 மணி முதல் மாலை 6 மணி வரை நடைபெற உள்ளது.

இப்பயிற்சியில் ட்ரோன் விதிமுறைகள் & ட்ரோன் தொழில்நுட்ப அறிமுகம், ட்ரோன் ஒளிப்பதிவு நுட்பங்கள், வான்வழி புகைப்படம் எடுத்தல் பற்றிய கண்ணோட்டம், FPV ஒளிப்பதிவு DGCA இன் கீழ் விமான விதிமுறைகள் மற்றும் பாதுகாப்பு போன்றவை கற்றுத்தரப்படும். அரசு வழங்கும் உதவிகள் மற்றும் மானியங்கள் ஆகியவையும் விளக்கப்படும்.

இந்தப் பயிற்சியில் ஆர்வமுள்ள தொழில்முனைவோர் (ஆண்/பெண்) 18 வயதுக்கு மேற்பட்ட குறைந்தபட்ச கல்வித் தகுதி 10 ஆம் வகுப்புடன் விண்ணப்பிக்கலாம். இப்பயிற்சியில் பங்குபெறும் பயனாளிகளுக்கு குறைந்த வாடகையில் குளிரூட்டப்பட்ட தங்கும் விடுதி உள்ளது. தேவைப்படுவோர் இதற்கு விண்ணப்பித்து பெற்றுக் கொள்ளலாம்.

இப்பயிற்சி பற்றிய கூடுதல் விவரங்களை பெற விரும்புவோர் www.editn.in என்ற வலைத்தளத்தில் தெரிந்து கொள்ளலாம். மேலும் விவரங்களுக்கு அலுவலக வேலை நாள்களில் (திங்கள் முதல் வெள்ளி வரை) காலை 10 மணி முதல் மாலை 5.45 மணி வரை தொடர்பு கொள்ள வேண்டிய முகவரி மற்றும் தொலைபேசி / கைபேசி எண்கள்:
தமிழ்நாடு தொழில் முனைவோர் மேம்பாடு மற்றும் புத்தாக்க நிறுவனம், சிட்கோ தொழிற்பேட்டை, இடிஐஐ அலுவலக சாலை ஈக்காட்டுத்தாங்கல், சென்னை - 600032. 8668108141 / 8668102600 / 7010143022.

டிரோன் பயிற்சிக்கு 3 நாள் கட்டணமாக ரூபாய் 6000 நிர்ணயம் செய்யப்பட்டுள்ளது. டிரோன் பயிற்சி பெறுவதற்கு முன்பதிவு அவசியம் என்றும் பயிற்சி பெறுபவர்களுக்கு அரசு சான்றிதழ் வழங்கப்படும் என்றும் தெரிவிக்கப்பட்டுள்ளது.

English summary

Tamil Nadu government is offering 3 days of drone training in Chennai from March 18th to 20th. Anyone who has completed 10th standard and is 18 years of age and interested can book and take drone training.