தமிழ்நாட்டில் பேன்சி நம்பர் கட்டணம் கிடுகிடு உயர்வு: சொகுசு எண்களுக்கு ரூ.8 லட்சம் வரை புதிய கட்டணம்!
சென்னை: தமிழ்நாட்டில் தங்களுக்குப் பிடித்தமான விஐபி மற்றும் 'பேன்சி' (Fancy Numbers) வாகனப் பதிவு எண்களை வாங்க விரும்பும் வாகன ஓட்டிகளுக்கு பெரும் அதிர்ச்சி தரும் செய்தி வெளியாகியுள்ளது.
மாற்றுப் பதிவு எண்களுக்கான கட்டணத்தை கணிசமாக உயர்த்த தமிழக அரசு திட்டமிட்டுள்ளது. பெரும்பாலான பிரிவுகளில் இந்த கட்டணங்கள் இரு மடங்காக உயர்த்தப்பட உள்ளதோடு, மிகவும் முன்கூட்டியே எண்களைப் பெறுவதற்கான புதிய பிரீமியம் பிரிவின் கீழ் அதிகபட்சமாக 8 லட்சம் ரூபாய் வரை கட்டணம் நிர்ணயிக்க முன்மொழியப்பட்டுள்ளது.
இது தொடர்பாக, தமிழ்நாடு மோட்டார் வாகன விதிகள், 1989-ல் திருத்தங்கள் மேற்கொள்வதற்கான வரைவு அறிவிப்பை தமிழக அரசு ஜூன் 19 அன்று சிறப்பு அரசிதழில் (Extraordinary Gazette) வெளியிட்டுள்ளது. கடந்த 2012ஆம் ஆண்டுக்குப் பிறகு, சுமார் 14 ஆண்டுகளுக்குப் பின் இந்த கட்டண அமைப்பில் பெரிய அளவிலான மாற்றம் செய்யப்படுவது இதுவே முதல் முறை என்பது குறிப்பிடத்தக்கது.
மதிப்பு சார்ந்த புதிய கட்டண முறை (Value-Based Fee Structure)
தற்போதுள்ள நடைமுறைப்படி, வாகனப் பதிவின் போது எண்கள் சீரற்ற முறையில் (Random) ஒதுக்கப்படுகின்றன. நடப்பு சீரிஸில் உள்ள முதல் 1,000 எண்களுக்குள் தங்களுக்குப் பிடித்த குறிப்பிட்ட எண்ணைப் பெற விரும்பும் வாகன உரிமையாளர்கள், வட்டாரப் போக்குவரத்து அலுவலகத்தில் (RTO) நிர்ணயிக்கப்பட்ட கட்டணத்தைச் செலுத்தி அதனைப் பெற்று வந்தனர். இதுவரை இந்த எண்களுக்கு நிலையான கட்டண முறை (Flat-rate) அமலில் இருந்தது.
ஆனால், புதிய வரைவுத் திட்டத்தின்படி, இந்த நிலையான கட்டண முறைக்கு மாற்றாக, வாகனத்தின் விலையை அடிப்படையாகக் கொண்ட 'மதிப்பு சார்ந்த கட்டண முறை' அறிமுகப்படுத்தப்பட உள்ளது.
இருசக்கர மற்றும் முச்சக்கர வாகனங்கள்: 50,000 ரூபாய் வரை மதிப்புள்ள சாதாரண பைக்குகளுக்கு பேன்சி எண் கட்டணம் 2,000 ரூபாயாக இருக்கும். அதே நேரத்தில், 30 லட்சம் ரூபாய்க்கும் அதிக மதிப்புள்ள சொகுசு பைக்குகளுக்கு இந்த கட்டணம் 1 லட்சம் ரூபாய் வரை உயர்த்தப்பட உள்ளது.
இறக்குமதி செய்யப்படும் வாகனங்கள் (Imported Vehicles): வெளிநாடுகளில் இருந்து இறக்குமதி செய்யப்படும் ஆடம்பர கார்கள் மற்றும் வாகனங்களுக்கான கட்டணம் தற்போதைய நிலவரப்படி 1,000 ரூபாய் முதல் 16,000 ரூபாய் வரை மட்டுமே உள்ளது. புதிய விதிமுறைகளின் கீழ், 4 லட்சம் ரூபாய் வரையிலான இறக்குமதி வாகனங்களுக்கு 20,000 ரூபாயும், 50 லட்சம் ரூபாய்க்கும் அதிக மதிப்புள்ள வாகனங்களுக்கு 1.5 லட்சம் ரூபாயும் கட்டணமாக வசூலிக்கப்பட உள்ளது.
முன்கூட்டிய சீரிஸ் எண்களுக்கு இரட்டிப்பு கட்டணம்
தற்போது ஓடிக்கொண்டிருக்கும் சீரிஸைத் தாண்டி, எதிர்கால சீரிஸ் எண்கள் (Future Series) மற்றும் அரசுக்கு என ஒதுக்கப்பட்ட விஐபி எண்களைப் பெறுவதற்கு மாநில அரசின் சிறப்பு அனுமதி தேவைப்படுகிறது. இந்த பிரீமியம் எண்களுக்கான கட்டணங்களும் புதிய விதியின் கீழ் இரு மடங்காக உயர்த்தப்பட உள்ளன.
அதன்படி, நடப்பு சீரிஸ் மற்றும் அதற்கு அடுத்த 3 சீரிஸ்களில் எண்களைப் பெறுவதற்கான கட்டணம் இரண்டு மடங்காக உயரும். மேலும், 5 முதல் 8 வரையிலான எதிர்கால சீரிஸ் எண்களுக்கு 1.2 லட்சம் ரூபாயும், 9 மற்றும் 10 ஆவது சீரிஸ்களுக்கு 2 லட்சம் ரூபாயும், 11 மற்றும் 12 ஆவது எதிர்கால சீரிஸ் எண்களுக்கு 4 லட்சம் ரூபாயும் கட்டணமாக நிர்ணயிக்கப்பட உள்ளது.
ரூ.8 லட்சத்தில் புதிய பிரீமியம் பிரிவு
வாகன விரும்பிகளைக் கவரும் வகையில், அரசு முதன்முறையாக 13 மற்றும் 14 ஆவது எதிர்கால சீரிஸ் எண்களுக்கான புதிய பிரீமியம் பிரிவை அறிமுகப்படுத்தியுள்ளது. இந்த மிக அட்வான்ஸ் சீரிஸ் எண்களைப் பெற வேண்டும் என்றால், வாகன உரிமையாளர்கள் 8 லட்சம் ரூபாயை கட்டணமாகச் செலுத்த வேண்டியிருக்கும்.
இந்த வரைவு அறிவிப்பு வெளியிடப்பட்டதில் இருந்து 14 நாட்களுக்குள் பொதுமக்கள் தங்களின் கருத்துக்கள் மற்றும் ஆட்சேபனைகளை கூடுதல் தலைமைச் செயலாளர் அவர்களுக்கு அனுப்பலாம் என்றும், அதன் பின்னரே இந்த விதிகள் இறுதி செய்யப்பட்டு அதிகாரப்பூர்வமாக நடைமுறைக்கு வரும் என்றும் அந்த அறிவிப்பில் தெரிவிக்கப்பட்டுள்ளது.
Click it and Unblock the Notifications
Sign in with Google