"டிரான்ஸ்பார்மர் கொள்முதல்.." ரூ.396 ஊழல் புகார்.. உண்மையில் நடந்தது என்ன? மின்வாரியம் பரபர விளக்கம்

சென்னை: தமிழ்நாடு மின்வாரியத்தில் சுமார் ரூ.400 கோடி மதிப்பில் ஊழல் நடந்துள்ளதாகப் புகார் எழுந்துள்ள நிலையில், இது குறித்து தமிழ்நாடு மின்வாரியம் விளக்கமளித்துள்ளது.

தமிழ்நாடு மின்வாரியத்தில் கடந்த இரண்டு ஆண்டுகளில் பல ஊழல் நடந்துள்ளதாக அறப்போர் இயக்கம் சார்பில் சமீபத்தில் லஞ்ச ஒழிப்புத்துறையில் புகார் அளிக்கப்பட்டிருந்தது. அதில் ரூ.397 கோடிக்கு ஊழல் நடந்ததாகக் குறிப்பிடப்பட்டிருந்தது.

இரண்டு ஆண்டுகளில் 45 ஆயிரம் டிஸ்ட்ரிபியூஷன் ட்ரான்ஸ்பார்மர் கொள்முதல் செய்ததில் ஊழல் நடந்தாக குற்றஞ்சாட்டினர். இதில் சுமார் 30 நிறுவனங்கள் ஒரு ரூபாய் கூட மாறாமல் ஒரே விலையைக் கோரியிருந்ததாகப் புகார் அளித்தனர்.

தமிழ்நாடு வாரியம்: இது தொடர்பான ஆவணங்களையும் அவர்கள் வெளியிட்டிருந்தனர். இது பெரும் பரபரப்பை ஏற்படுத்திய நிலையில், இது தொடர்பாக மின்வாரியம் இப்போது விளக்கம் ஒன்றை அளித்துள்ளது. அந்த விளக்கத்தில், "அனைத்து ஒப்பந்த புள்ளிதாரர்களும் ஒரே விலைப்புள்ளியைக் குறிப்பிட்டுள்ளதால், மின்மாற்றிகள் கொள்முதல் செய்ததில் முறைகேடுகள் நடைபெற்றதாகப் புகார் கூறப்பட்டுள்ளது.

தமிழ்நாட்டில் 30-க்கும் மேற்பட்ட நிறுவனங்கள் மின்மாற்றிகளை விற்பனை செய்து வருகின்றன. கடந்த 2011-ம் ஆண்டு முதல் மின்மாற்றிகள் கொள்முதல் செய்யப்பட்ட கோப்புகளைப் பரிசீலனை செய்ததில் பெரும்பாலான நிறுவனங்கள் ஒரே விலைப்புள்ளியைச் சமர்ப்பித்துள்ளது தெரியவருகிறது.

விலைப்புள்ளி: மின்மாற்றிகள் தயாரிக்கும் அனைத்து நிறுவனங்களும், சென்னையிலிருந்து நாகர்கோவில் வரை உள்ள 44 மின் பகிர்மான வட்டங்களுக்கு மின்மாற்றிகளை எடுத்துச் சென்று வழங்குவதால், அவை சரக்கு வாகன கட்டணம் செலுத்த வேண்டியுள்ளது. மேலும், சில நிறுவனங்கள் உள்ளூரிலேயே பல வருடங்களாக இயங்கி வருவதால், அவர்களுக்கு மற்ற நிறுவனங்களின் விலைப்புள்ளிகள் குறித்துத் தெரிய வாய்ப்புள்ளது.

ஒப்பந்த விலைப்புள்ளிகள் அனைத்தும் கணினி மூலமாகவே பெறப்படுகிறது. எனவே, ஒன்றுக்கும் மேற்பட்ட நிறுவனங்கள் ஒரே விலைப்புள்ளியைச் சமர்ப்பித்திருந்தாலும், தமிழ்நாடு ஒப்பந்தப்புள்ளி வெளிப்படைத்தன்மை சட்டத்தின்படி தமிழக மின்வாரியத்திற்குத் தேவையான மின்மாற்றிகளைத் தகுதி வாய்ந்த அனைத்து சிறு, குறு நிறுவனங்களுக்கும் பிரித்து வழங்கி கொள்முதல் ஆணை அளிக்கப்பட்டுள்ளது.

சரியான நடைமுறை இல்லை: மின்மாற்றி தயாரிக்கும் நிறுவனங்கள் ஒரே மாதிரி விலைப்புள்ளி கோருவது கடந்த இரு ஆண்டுகளில் நிகழும் நிகழ்வுகள் அல்ல. இந்த நடைமுறை, கடந்த 10 வருடங்களுக்கும் மேலாகவே பின்பற்றப்பட்டு வருகிறது. ஒப்பந்தப் புள்ளிகளைப் பரிசீலனை செய்யும் போது அன்றைய தேதியில் ஜெம் போர்டல் விவரக் குறியீடுகள் கொண்ட விலையை ஒப்பிட்டுத் தான் ஒப்பந்தப் புள்ளி வழங்கப்பட்டுள்ளது. அதை இன்றைய தேதியில் இருக்கும் ஜெம் போர்டல் விலையை எடுத்து ஒப்பீடு செய்துள்ளது சரியான நடைமுறை இல்லை.

தமிழ்நாடு அரசு மின்வாரியத்தால் கொள்முதல் செய்யப்படும் மின்மாற்றிகள் உத்தரவாத காலம் 5 ஆண்டுகள் ஆகும். கேரளா மாநிலத்தில் கொள்முதல் செய்யப்படும் மின்மாற்றிகளுக்கான உத்தரவாத காலம் 3 ஆண்டுகள் ஆகும். தமிழ்நாடு மின்சார வாரியம் கொள்முதல் செய்யும் மின்மாற்றிகளின் விவரக் குறியீடு முற்றிலும் தனித்துவம் வாய்ந்தது. ஆகவே கேரள மாநிலத்தில் கொள்முதல் செய்யும் மின்மாற்றிகளோடு ஒப்பீடு செய்ய இயலாது.

கொள்முதல்: கேரளா மாநிலத்தில் கொள்முதல் செய்யப்படும் மின்மாற்றிகளில் அலுமினியம் மின் சுருள் பயன்படுத்தப்படுகிறது. ஆனால், தமிழ்நாடு மின்சார வாரியம் கொள்முதல் செய்யும் மின்மாற்றிகளில் காப்பர் மின் சுருள் பயன்படுத்தப்படுகிறது. இதனால் கூடுதலாக ஒரு மின்மாற்றிக்கு ரூ. 1.66 லட்சம் (அலுமினிய மின் சுருளின் விலையைச் சேர்த்து) செலவாகிறது. எனவே, கேரளாவுடன் இதை ஒப்பிடுவது சரியாக இருக்காது.

நீண்ட கால பயனைக் கருத்தில்கொண்டு காப்பர் மின் சுருள், 5 வருட உத்தரவாதம், மின்சார வாரியம் நிர்ணயம் செய்யப்படும் விவரக் குறியீடுகளின் அடிப்படையிலேயே நிறுவனங்கள் மின்மாற்றிகளை உற்பத்தி செய்து வழங்குவதால், தமிழ்நாடு மின்சார வாரியம் கொள்முதல் செய்யும் மின்மாற்றிகளின் தரம் உயர்வாக இருக்கிறது" என்று அதில் கூறப்பட்டுள்ளது.

English summary

TNEB explanation about Transformer scam: TNEB latest on Transformer scam.