ரூ.10க்கு உதைப்பட்ட தக்காளிக்கு வந்த வாழ்வை பாருங்க! கோயம்பேட்டில் ஏழைகளின் ஆப்பிளின் விலை தெரியுமா?
சென்னை: சென்னை கோயம்பேடு சந்தையில் தக்காளியின் விலை கிலோ ரூ 40 ஆக உயர்ந்துள்ளதால் இல்லத்தரசிகள் கவலையில் ஆழ்ந்துள்ளனர்.
இதற்கு தமிழகத்தில் நிலவிய வெயிலும் தொடர் மழையும் காரணம் என சொல்லப்படுகிறது. தமிழகம் மற்றும் அதை சுற்றியுள்ள ஆந்திரா, கர்நாடகா மாநிலங்களில் கடந்த மார்ச் மாதம் முதலே வெயில் வாட்டியது.
இதையடுத்து மே மாதம் 4 ஆம் தேதி அக்னி நட்சத்திரம் எனப்படும் கத்தரி வெயில் தொடங்கியது. இந்த கத்தரி வெயில் சுட்டெரிக்கும் என அஞ்சிய நிலையில் தமிழகத்தின் பல்வேறு இடங்களில் கோடை மழை பலத்த காற்றுடன் கொட்டித் தீர்த்தது.
இப்படி வெயிலும், அதிக காற்றுடன் கனமழையும் பொதுவாக நுட்பமான காய்கறிகள், பழங்கள் சேதமாகிவிடும். அந்த வகையில் கோடை மழை, கோடை வெயிலால் தக்காளி மொத்த விலையில் உயர்ந்துள்ளது. திருவல்லிக்கேணி ஜாம்பஜார், சைதாப்பேட்டை, பெரம்பூர் போன்ற சில்லறை விற்பனைக் கடைகளில் கிலோ 55க்கு விற்கப்பட்டு வருகிறது.
கோயம்பேடு சந்தையில் மற்ற காய்கறிகளான பீன்ஸ் கிலோ 120 , அவரைக்காய் ரூ 70, பச்சை மிளகாய் ரூ 55, சாம்பார் வெங்காயம் ரூ 35, கேரட், நூல்கோல், முள்ளங்கி தலா ரூ 30, உருளைக்கிழங்கு ரூ 26, பீட்ரூட் 23 ரூ, பாகற்காய், வெண்டைக்காய், புடலங்காய் தலா ரூ 20, கத்தரிக்காய், கருணைக் கிழங்கு தலா ரூ 15, முட்டைக்கோஸ், முருங்கைக்காய் தலா ரூ 10 என விற்பனை செய்யப்படுகிறது.
கோயம்பேடு மார்க்கெட்டுக்கு தக்காளிகளை அனுப்பும் கர்நாடகா, ஆந்திரா மாநிலங்களில் உள்ள சிந்தாமணி, பலமனேரி உள்ளிட்ட பகுதிகள், தமிழகத்தின் பிற பகுதிகளில் இருந்தும் தக்காளி வாங்க வியாபாரிகள் குவிந்து வருகிறார்கள். இதனால் கோயம்பேடு சந்தைக்கு தக்காளி வரத்து குறைந்துவிட்டது. இதனால் விலை அதிகரித்துள்ளது.
ஜூன் மாதம் முழுவதும் தக்காளி விலை உயர்ந்தே இருக்க வாய்ப்புள்ளது. தமிழகத்தில் இன்றைய காய்கறிகளின் விலை:
பீன்ஸ் கிலோ ரூ 60 முதல் ரூ 220 வரை விற்பனையாகிறது. பீட் ரூட் கிலோ ரூ 20 முதல் ரூ 78 க்கு விற்பனை செய்யப்படுகிறது. கத்தரிக்காய் ரூ 15 முதல் 80 வரையும் முட்டைக் கோஸ் ரூ 12 முதல் ரூ 50 வரையும் கேரட் ரூபாய் 30 முதல் 90 வரையும் மிளகாய் ரூ 35 முதல் ரூ 120 வரையும், முருங்கைகாய் ரூ 10 முதல் ரூ 80 வரையும் இஞ்சி ரூ 100 முதல் 220 வரையும் , உருளைக்கிழங்கு ரூ 25 முதல் ரூ 85 வரையும், சின்ன வெங்காயம் கிலோ ரூ 30 முதல் 80 ரூபாய், தக்காளி ரூ 20 முதல் ரூ 55 வரையும் விற்பனை செய்யப்படுகிறது.
Click it and Unblock the Notifications
Sign in with Google