கோயம்பேடு மார்க்கெட்டில்.. ஒரு முருங்கைக்காய் 40 ரூபாய்.. தக்காளி விலையை கேட்டால் தலையே சுற்றிவிடும்

சென்னை: பொதுவாக சபரிமலை சீசன் மற்றும் பழனி சீசன் என்று அழைக்கப்படும் கார்த்திகை மற்றும் மார்கழிமாதங்களில் பலர் அசைவம் சாப்பிட மாட்டார்கள். காய்கறிகள் தான் உணவாக சேர்ப்பார்கள். குறிப்பாக வீடுகளில் சாம்பார் தான் அதிகம் வைக்கப்படும். இந்த சூழலில் சாம்பாருக்கு அதிகம் பயன்படும், தக்காளி, சின்ன வெங்காயம், முருங்கைக்காய் என மூன்று கடுமையாக விலை ஏறி உள்ளது. கோயம்பேடு மார்க்கெட்டில் விலையை கேட்டால் தலையே சுற்றிவிடும்.

தமிழ்நாட்டை பொறுத்தவரை மிகப்பெரிய காய்கறி விற்பனை சந்தை என்றால்.. அது செனனை கோயம்பேடு காய்கறி சந்தை தான். தமிழ்நாட்டின் பெரும்பாலான மாவட்டங்களில் இருந்தும், ஆந்திரா, கர்நாடகா, தெலுங்கானா, மகாராஷ்டிரா உள்ளிட்ட பல்வேறு மாநிலங்களில் இருந்து தினமும் காய்கறிகள் வருகின்றன. அப்படி வரும் காய்கறிகள், சென்னையின் தினசரி தேவையை பூர்த்தி செய்கின்றன. ஒவ்வொரு காய்கறியும் இத்தனை டன் தேவை என்றுவிற்பனைக்காக கொண்டுவரப்படுகிறது. ஆனால் தேவை அதிகம் ஆகும் போதும், சப்ளை குறையும் போதும், டிமாண்ட் அதிகரித்து விற்பனை குறைந்துவிடுகிறது.

அந்தவகையில் வரத்து குறைவு காரணமாக சென்னை கோயம்பேடு காய்கறி மார்க்கெட்டில் கடந்த சில நாட்களாக குறிப்பிட்ட சில காய்கறி விலை தாறுமாறாக உயர்ந்து வருகிறது. முருங்கைக்காய் இம்மாதம் தொடக்கத்தில் ரூ.60 முதல் ரூ.80 வரை இருந்த நிலையில், 2-வது வாரத்துக்கு பிறகு ஒரு கிலோ ரூ.100-ஐ தாண்டியும், கடந்த வாரம் ரூ.200-ஐ கடந்தும் விற்பனையானது.

தொடர்ச்சியாக தேவை அதிகரிப்பு மற்றும் வரத்து குறைவு காரணமாக விலை அதிகரித்து கொண்டே வந்து, சென்னை கோயம்பேடு மார்க்கெட்டில் நேற்று ஒரு கிலோ ரூ.320 முதல் ரூ.350 வரை விற்பனையாகிறது. விலையை கேட்டாலே 'ஷாக்' அடிக்கும் அளவுக்கு அதிகரித்துள்ளது. வெளிமார்க்கெட் மற்றும் சில்லரை கடைகளில் ஒரே ஒரு முருங்கைக்காயின் விலை ரூ.40 என்கிறார்கள்.

முருங்கை விலை மட்டுமல்ல தக்காளியும், சாம்பார் வெங்காயமும் எகிறி வருகிறது. கடந்த வாரத்தில் ஒரு கிலோ ரூ.40 முதல் ரூ.60 வரை விற்கப்பட்ட தக்காளி, நேற்று கோயம்பேடு மார்க்கெட்டில் ரூ.60 முதல் ரூ.80 வரை விற்கப்பட்டது. சில்லரை கடைகளில் ரூ.70 முதல் ரூ.90 வரை விற்பனையாகிறது. அதேபோல் ஒரு கிலோ சாம்பார் வெங்காயம் நேற்று ரூ.60 முதல் ரூ.80 வரையிலும் விற்பனையாகிறது. வெளி மார்க்கெட் மற்றும் சில்லரை கடைகளில் இதன் விலை ரூ.70 முதல் ரூ.100 வரை விற்கப்படுகிறது.

English summary

The prices of tomatoes, sambar and onions have increased significantly. In Chennai's Koyambedu, drumsticks are being sold for Rs. 350 per kg. The price of a drumstick in retail shops is Rs. 40.