சென்னை சென்ட்ரல் - ஆவடி இடையே.. திடீரென ரயில் சேவை பாதிப்பு.. பயணிகள் பரிதவிப்பு

சென்னை: சென்னை சென்ட்ரல் - ஆவடி இடையே திடீரென புறநகர் ரயில் சேவை பாதிக்கப்பட்டது. ஒரு மணி நேரத்திற்கும் மேலாக ரயில் சேவை இயங்காததால் பயணிகள் மிகவும் சிரமத்திற்குள்ளானார்கள்.

போக்குவரத்து நெரிசல் மிகுந்த சென்னை போன்ற பெருநகரங்களில் பயணிகள் அதிகம் நம்பியிருப்பது புறநகர் ரயில்களைத்தான். அதிலும் சென்னையில் சாலை வழியில் பயணம் செய்தால் அலுவலகத்திற்கோ.. எங்காவது போக வேண்டிய இடத்திற்கும் சரியான நேரத்தில் சென்று விட்டால் பெரும் சாதனையாகத்தான் நினைத்துக் கொள்ள வேண்டும். அந்த அளவுக்கு டிராபிக் இருக்கும்.

அதிலும் பீக் நேரங்களில் சொல்லவே வேண்டாம். எந்த சாலையில் பார்த்தாலும் பைக்குகளும் கார்களும் பேருந்துகளும் என சாலைகளில் சாரை சாரையாக அணி வகுத்து செல்வதை காண முடியும். கண்ணுக்கு எட்டிய தூரம் எங்கும் வாகனங்கள் தான் தெரியும். கடுமையான போக்குவரத்து நெரிசல் காரணமாக பெரும்பாலான பயணிகள் பஸ் பயணத்தை விட ரயில் பயணத்தையே விரும்புகிறார்கள்.

இதனால், சென்னையில் புறநகர் ரயிலிலும் பயணிகள் கூட்டம் அதிக அளவு இருக்கும். துல்லியமான நேரத்தில் இலக்கை சென்றடையும் என்பதால் பயணிகள் ரயில் பயணத்தை விரும்ப இதுவும் ஒரு காரணமாக பார்க்கப்படுகிறது. குறிப்பாக சென்னை கடற்கரையில் இருந்து தாம்பரம், செங்கல்பட்டு வழித்தடத்திலும் சென்னை சென்ட்ரல் - ஆவடி உள்ளிட்ட வழித்தடங்களிலும் பயணிகள் கூட்டம் அலைமோதும்.

இப்படி பீக் நேரங்களில் பரபரப்பாக காணப்படும் சென்னை சென்ட்ரல் - ஆவடி இடையேயான மின்சார ரயில் போக்குவரத்து, சிக்னல் கோளாறு காரணமாக பாதிக்கப்பட்டுள்ளது. ஒரு மணி நேரத்திற்கும் மேலாக சிக்னல் கோளாறு நீடிப்பதால் ரயில்கள் இயக்கப்படவில்லை. இதனால், ரயில் நிலையங்களில் பயணிகள் தவித்து வருகின்றனர். முக்கிய ரயில் நிலையங்களில் பயணிகள் கூட்டம் கட்டுக்கடங்காமல் உள்ளது. சிக்னல் கோளாறை சரி செய்யும் முயற்சியில் ரயில் ஊழியர்கள் ஈடுபட்டுள்ளனர். விரைவில் கோளாறு சீர் செய்யப்பட்டு ரயில் சேவை சீராகும் என எதிர்பார்க்கப்படுகிறது.

English summary

Suburban train service between Chennai Central and Avadi was suddenly affected. Passengers were inconvenienced as the service did not run for more than an hour.