துணை முதல்வராகும் உதயநிதி.. செந்தில் பாலாஜி உள்பட 4 பேர் அமைச்சராக நாளை பதவியேற்பு! ஆளுநர் ஒப்புதல்
சென்னை: தமிழகத்தின் துணை முதல்வராக நாளை உதயநிதி ஸ்டாலின் பொறுப்பேற்க உள்ளார். அதேபோல் நாளை நடக்கும் அமைச்சரவை மாற்றத்தில் செந்தில் பாலாஜி, கோவி செழியன், ஆர் ராஜேந்திரன், ஆவடி நாசர் உள்ளிட்டவர்கள் புதிய அமைச்சர்களாக பொறுப்பேற்க உள்ளனர். இந்த பதவியேற்பு விழா என்பது நாளை மாலை 3.30 மணிக்கு ஆளுநர் மாளிகையில் நடைபெற உள்ளது.
தமிழக அமைச்சரவை நாளை மாற்றம் செய்யப்பட உள்ளது. இதுதொடர்பாக தமிழக அரசு சார்பில் ஆளுநர் ஆர்என் ரவியிடம் ஒப்புதல் கோரி கடிதம் எழுதப்பட்டது. இந்த கடிதத்துக்கு ஆளுநர் ஆர்என் ரவி இன்று இரவில் ஒப்புதல் வழங்கி உள்ளார்.
அதன்படி நாளை மாலை 3.30 மணிக்கு தமிழக அமைச்சரவை மாற்றம் செய்யப்பட உள்ளது. நாளை அமைச்சரை மாற்றத்தின்போது உதயநிதி ஸ்டாலின் துணை முதல்வராக பொறுப்பேற்க உள்ளார். அதேபோல் 4 பேர் புதிதாக அமைச்சரவையில் இணைய உள்ளனர்.
இதுதொடர்பாக ஆளுநர் மாளிகை வெளியிட்டுள்ள அறிவிப்பில், ‛‛தமிழக விளையாட்டுத்துறை மற்றும் இளைஞர் நலத்துறை அமைச்சர் உதயநிதி ஸ்டாலின் அந்த பொறுப்புடன் கூடுதல் இலாகாக்களுடன் துணை முதல்வராக உள்ளார். செந்தில் பாலாஜி, கோவி செழியன், ஆர் ராஜேந்திரன், ஆவடி நாசர் உள்ளிட்டவர்கள் அமைச்சர்களாக பொறுப்பேற்க உள்ளனர்'' என தெரிவிக்கப்பட்டுள்ளது.
இவர்கள் 4 பேரும் நாளை மாலை 3.30 மணிக்கு ஆளுநர் மாளிகையில் நடக்கும் பதவியேற்பு விழாவில் புதிய பொறுப்பை ஏற்க உள்ளனர். இவர்களுக்கு ஆளுநர் ஆர்என் ரவி பதவிப்பிரமாணம் மற்றும் ரகசிய காப்பு பிரமாணம் செய்து வைக்க உள்ளார். இவர்கள் 4 பேருக்கும் எந்த இலாகாக்கள் என்பது இன்னும் முடிவு செய்யப்படவில்லை. மேலும் செந்தில் பாலாஜி உள்பட 4 பேர் நாளை அமைச்சராக சேர்க்கப்படும் நிலையில் மனோ தங்கராஜ், செஞ்சி மஸ்தான், கே ராமச்சந்திரன் ஆகியோர் தமிழக அமைச்சரவையில் இருந்து நீக்கம் செய்யப்பட உள்ளனர் என்பது குறிப்பிடத்தக்கது.
மேலும் இந்த விழாவின்போது 6 அமைச்சர்களின் இலாக்கள் மாற்றம் செய்யப்பட உள்ளது. பொன்முடி, மெய்யநாதன், கயல்விழி செல்வராஜ், மதிவேந்தன் , ராஜகண்ணப்பன் ஆகியோரின் துறைகள் மாற்றம் செய்யப்பட்டுள்ளது. தங்கம் தென்னரசு நிதி மற்றும் மனிதவள மேம்பாட்டு துறை அமைச்சராக உள்ளார். இவர் நிதித்துறையுடன் சேர்த்து சுற்றுச்சூழல் மற்றும் மாசு கட்டுப்பாட்டுத்துறை பொறுப்பையும் ஏற்க உள்ளார் என்பது குறிப்பிடத்தக்கது.
Click it and Unblock the Notifications
Sign in with Google