பீன்ஸ் பிரச்சினை பண்ணுது.. பீட்ரூட் பிச்சுக்கிட்டு போகுது! காய் விலைய கேட்டாலே தலையே சுத்திருச்சு!

சென்னை: தமிழகத்தில் கடந்த சில நாட்களாகவே காய்கறிகளின் விலை அதிகரித்து காணப்படுகிறது. இந்த நிலையில் சென்னை கோயம்பேடு காய்கறி சந்தையில் காய்கறிகளின் உச்சத்தை தொட்டு வருகிறது. குறிப்பாக பீன்ஸ், பீட்ரூட், பெரிய வெங்காயம், முருங்கைக்காய் ஆகியவற்றின் விலை அதிக அளவு உயர்ந்து இருப்பது இல்லத்தரசிகளை கவலை கொள்ள செய்துள்ளது.

தமிழகத்தில் கடந்த சில வாரங்களாகவே நல்ல மழை பெய்து வருகிறது. இதன் காரணமாக அறுவடைக்கு தயாராக இருந்த காய்கறிகள் விளைச்சல் வெகுவாக பாதிக்கப்பட்டுள்ளது. பொதுவாக மழைக்காலங்களில் ஈரப்பதம் காரணமாக வெங்காயம் தக்காளி ஆகியவற்றின் விலை கணிசமாக அதிகரிக்கும்.

குறிப்பாக கார்த்திகை மற்றும் மார்கழி மாதங்களில் ஐயப்பன் விரதம், முருகனுக்கு மாலை அணிவது, மேல்மருவத்தூர் ஆதிபராசக்தி கோவிலுக்கு மாலை அணிவது என விரத காலங்கள் அதிகமாக உள்ளது. இதனால் இறைச்சி நுகர்வு குறைந்து மக்கள் காய்கறிகளை அதிகளவில் பயன்படுத்துவார்கள்..

இதனால் இந்த காலங்களில் இறைச்சி விலை வெகுவாக குறையும். அதே நேரத்தில் காய்கறிகளின் விலை அதிகரிப்பதும் வழக்கம் தான். கடந்த சில வாரங்களுக்கு முன்பு வரை 260 முதல் 250 ரூபாய் வரை விற்பனையான ஒரு கிலோ பிராய்லர் சிக்கன் தற்போது 200 ரூபாயாக குறைந்து இருக்கிறது. ஆட்டு இறைச்சி விலை 800 ரூபாயாகவும், மீன்களின் விலை 200 ரூபாய் முதல் 600 ரூபாய் வரையும் விற்பனையாகிறது. அதே நேரத்தில் காய்கறிகளின் விலை கணிசமாக அதிகரித்து இருக்கிறது.

ஏற்கனவே வரத்து குறைவு காரணமாக பெரிய வெங்காயம், சின்ன வெங்காயம், தக்காளி ஆகியவற்றின் விலை வெகுவாக அதிகரித்துள்ளது. தற்போது வரத்து குறைவோடு. பக்தர்கள் விரதம் கடைபிடிக்கும் காலம் என்பதால் சென்னை கோயம்பேடு காய்கறி சந்தையில் காய்கறிகளின் விலை கணிசமாக அதிகரித்து உள்ளது. குறிப்பாக பீன்ஸ், கத்தரிக்காய், கேரட், சின்ன வெங்காயம், முருங்கைக்காய் ஆகியவற்றின் விலை மிகக் கடுமையாக உயர்ந்திருக்கிறது.

இன்றைய நிலவரப்படி கோயம்பேடு மொத்த காய்கறி சந்தையில் ஒரு கிலோ பீன்ஸ் குறைந்தபட்சமாக 35 ரூபாய்க்கும் அதிகபட்சமாக 130 ரூபாய்க்கும் விற்பனையாகிறது. இதேபோல பீட்ரூட் ஒரு கிலோ 90 ரூபாய்க்கும், பெரிய வெங்காயம் 84 ரூபாய்க்கும் விற்பனையாகிறது. கடந்த வாரம் 100 ரூபாய் வரை விற்பனையான கத்திரிக்காய் தற்போது 60 ரூபாய்க்கு விற்பனையாகிறது.

மேலும் கேரட் 90 ரூபாய்க்கும், சின்ன வெங்காயம் 90 ரூபாய்க்கும், முருங்கைக்காய் ஒரு கிலோ 200, ரூபாய்க்கும் விற்பனையாகிறது. மேலும் முட்டைக்கோஸ் விலை 60 ரூபாய்க்கும், மிளகாய் ₹40க்கும், தக்காளி 45 ரூபாய்க்கு விற்பனையாகிறது. வரத்து குறைவு உள்ளிட்ட காரணங்களால் இஞ்சி 180 ரூபாய்க்கும், அதிகபட்சமாக பூண்டு 460 க்கும் விற்பனையாகிறது. சில வாரங்களாக உருளைக்கிழங்கு விலை ஏற்ற இறக்கத்துடன் இருந்த நிலையில் இந்த வாரம் 80 ரூபாய்க்கும் விற்பனையாவது குறிப்பிடத்தக்கது.

மேற்கண்ட விலைகள் அனைத்தும் கோயம்பேடு காய்கறி சந்தையில் மொத்த விற்பனை விலை என்பது குறிப்பிடத்தக்கது. இங்கு கிலோ கணக்கில் காய்கறிகளை மொத்த விலையில் வாங்கிச் செல்லும் வியாபாரிகள் சில்லறை விற்பனை விலையில் பத்து ரூபாய் முதல் 20 ரூபாய் வரை கூடுதலாக வைத்து விற்கின்றனர். இதன் காரணமாக பெரும்பாலான காய்கறிகளின் விலை ₹100 முதல் 150 ரூபாய் வரை விற்பனையாகியுள்ளது.

English summary

Vegetable prices in Tamil Nadu, especially in Chennai's Koyambedu market, have skyrocketed. The sharp rise in beans, beetroot, onion, and drumsticks prices leaves households worried