அரசியல் சதுரங்கத்தில் சறுக்கிய விஜயதாரணி! ‘அமைச்சர்’ வாய்ப்பை கோட்டை விட்டாரா விளவங்கோடு சிங்கப்பெண்

சென்னை: முன்னாள் எம்எல்ஏ விஜயதாரணி இன்று தவெகவில் இணைந்த நிலையில் காங்கிரஸ் கட்சியிலேயே நீடித்திருந்தால் முதல்வர் விஜய் அமைச்சரவையில் இடம் பெற்றிருந்திருப்பார் என்றே அவரது நலம்விரும்பிகள் பரவலாக பேசுகிறார்கள்.

தமிழக அரசியலில் 'துணிச்சலான பெண்மணி' என்று பெயரெடுத்த விஜயதாரணியின் அரசியல் பயணம், தற்போது ஒரு சுவாரஸ்யமான திருப்பத்தை எட்டியுள்ளது. விளவங்கோடு தொகுதியில் ஹாட்ரிக் வெற்றி பெற்று, சட்டசபையில் காங்கிரஸின் குரலாக ஒலித்தவர், இன்று தவெக (தமிழக வெற்றி கழகம்) அலுவலகத்தில் அக்கட்சியின் துண்டை அணிந்து கொண்டு நிற்கிறார்.

இந்த மாற்றத்திற்கு பின்னால் இருக்கும் 'மிஸ் ஆன' வாய்ப்புகள் குறித்து ஒரு அலசல்...

டெல்லி ஆசை... திசை மாறிய பயணம்!

விளவங்கோடு தொகுதியில் மூன்று முறை எம்எல்ஏ-வாக இருந்த விஜயதாரணிக்கு, மாநில அரசியலை விட டெல்லி அரசியலில் ஒரு ரவுண்டு வர வேண்டும் என்பது நீண்ட நாள் ஆசை. கடந்த 2024 நாடாளுமன்றத் தேர்தலில் தனக்கு சீட் கிடைக்கும் என மலைபோல நம்பியிருந்தார். ஆனால், காங்கிரஸ் தலைமை அவருக்கு வாய்ப்பளிக்க மறுத்தது.

இதனால் கடும் அதிருப்தியடைந்த அவர், "கை" சின்னத்தை உதறிவிட்டு, எம்எல்ஏ பதவியையும் ராஜினாமா செய்துவிட்டு பாஜகவில் இணைந்தார். "தாமரை மலர்ந்தால் டெல்லி செல்லலாம்" என்பது அவரது கணக்காக இருந்தது.

பாஜகவில் காத்திருப்பும்... கசப்பான தோல்வியும்!

பாஜகவில் இணைந்த விஜயதாரணிக்கு அடுத்த இரண்டு ஆண்டுகள் எந்தப் பதவியும் வழங்கப்படவில்லை. கடந்த 2026 சட்டசபைத் தேர்தலில், மீண்டும் தனது கோட்டையான விளவங்கோடு தொகுதியிலேயே பாஜக சார்பில் களம் இறங்கினார். ஆனால், காலம் அவருக்கு சாதகமாக இல்லை. மூன்று முறை தன்னை வெற்றி பெறச் செய்த மக்கள், இந்த முறை அவருக்குத் தோல்வியைப் பரிசளித்தனர்.

தவெகவில் தஞ்சம்: விஜயதாரணியின் விளக்கம்

தோல்விக்கு பிறகு அமைதியாக இருந்த விஜயதாரணி, இன்று திடீரென விஜய் தலைமையிலான தமிழக வெற்றி கழகத்தில் இணைந்தார். செய்தியாளர்களிடம் பேசிய அவர், "பாஜகவில் எனக்கு மக்களுடன் இணைந்து பணியாற்ற போதிய வாய்ப்புகள் கிடைக்கவில்லை. தவெக தான் மக்களுக்கான உண்மையான கட்சியாக உருவெடுத்துள்ளது. அதனால்தான் இந்த முடிவு" என்றார்.

மேலும், "59 ஆண்டுகளுக்குப் பிறகு காங்கிரஸ் கட்சி தமிழக அமைச்சரவையில் இடம் பிடித்திருப்பது மகிழ்ச்சி அளிக்கிறது. தவெகவுடன் கூட்டணி அமைத்த காங்கிரஸின் முடிவு சரியானது" என அவர் குறிப்பிட்டதுதான் இப்போது அரசியல் வட்டாரத்தில் ஹாட் டாபிக்!

நலம் விரும்பிகளின் ஆதங்கம்: "அவசரப்பட்டு விட்டாரோ?"

விஜயதாரணியின் இந்த திடீர் பல்டி குறித்து அவரது ஆதரவாளர்கள் மற்றும் அரசியல் விமர்சகர்கள் சில சுவாரஸ்யமான கருத்துக்களை முன்வைக்கின்றனர்.

அமைச்சர் வாய்ப்பு: ஒருவேளை விஜயதாரணி பாஜகவுக்குத் தாவாமல் காங்கிரஸிலேயே நீடித்திருந்தால், 2026 தேர்தலில் விளவங்கோடு தொகுதியில் காங்கிரஸ் சார்பில் போட்டியிட்டு நிச்சயம் வெற்றி பெற்றிருப்பார்.

அதிகாரப் பகிர்வு: தற்போது தவெக - காங்கிரஸ் கூட்டணி ஆட்சியில் இருப்பதால், சீனியர் எம்எல்ஏ என்ற அடிப்படையில் விஜயதாரணிக்கு அமைச்சரவையில் முக்கிய இலாகா கிடைத்திருக்கும்.

இழந்த செல்வாக்கு: இன்று தவெக-வில் ஒரு சாதாரண உறுப்பினராக இணைந்திருக்கும் அவர், அன்று பொறுமை காத்திருந்தால் இன்று 'மாண்புமிகு அமைச்சராக' வலம் வந்திருப்பார்.

அரசியலில் 'டைமிங்' மிக முக்கியம். ஒரு தவறான முடிவு, பல ஆண்டுகால உழைப்பை பின்னுக்குத் தள்ளிவிடும் என்பதற்கு விஜயதாரணியின் அரசியல் பயணம் ஒரு சிறந்த உதாரணம். "நல்ல சான்ஸை மிஸ் பண்ணிட்டாரே விஜயதாரணி" என்பதே அவரது நலம் விரும்பிகளின் தற்போதைய மைண்ட் வாய்ஸ்!

தவெக-வில் விஜயதாரணியின் அடுத்த கட்ட நகர்வு எப்படி இருக்கும்? பொறுத்திருந்து பார்ப்போம்!