மிரட்டிய ராஜ்மோகன்! விஷ்ணு ரெட்டி என்ன பெரிய அப்பாடக்கரா? கொந்தளித்த சாட்டை துரைமுருகன்..

Updated: Tuesday, September 8, 2026, 10:57 [IST]

Subscribe to Oneindia Tamil

சென்னை: தமிழ்நாடு அரசியலில் இப்போது ஒரே ஒரு பெயர் தான் திரும்பத் திரும்ப எதிரொலித்து வருகிறது. அது வேறு யாருமல்ல, முதலமைச்சர் விஜய்யின் ஆலோசகரும் அவரது நெருங்கிய நண்பருமான விஷ்ணு ரெட்டிதான்.

அரசு நிர்வாகத்தில் அவருக்கு அதிக செல்வாக்கு இருப்பதாக எதிர்க்கட்சித் தலைவர் உதயநிதி ஸ்டாலின் குற்றம்சாட்டினார்.

இதற்குப் பதிலடியாக, "அவரைப் பற்றி தேவையில்லாமல் பேசினால் சட்டம் தன் கடமையைச் செய்யும்" என்று செய்தித்துறை அமைச்சர் ராஜ்மோகன் எச்சரித்தார். IUML சட்டமன்ற உறுப்பினர் சொல்லாத ஒரு விஷயத்தை சொன்னதாக திமுகவினர் பரப்பி வருகிறார்கள்; அதே போல முதலமைச்சரின் ஆலோசகர் விஷ்ணு ரெட்டி குறித்தும் அவர்களது குடும்பத்தினர் குறித்தும் அவதூறு பரப்பி வருகிறார்கள்; உண்மைக்கு புறம்பான செய்திகளை வெளியிட்டால் சட்ட ரீதியாக நடவடிக்கை எடுக்கப்படும்.

திட்டமிட்டு நற்பெயருக்குக் களங்கம் விளைவிக்கும் வகையில் பொய்ப் பிரச்சாரம் செய்தால், சம்பந்தப்பட்ட செய்தி நிறுவனங்கள் மற்றும் நபர்கள் மீது சட்டரீதியாகக் கடுமையான நடவடிக்கை எடுக்கப்படும், என்று கடுமையாக எச்சரித்தார். இப்போது இந்த விவகாரத்தில் நாம் தமிழர் கட்சியின் முக்கியப் பேச்சாளரான சாட்டை துரைமுருகனும் களம் இறங்கி, காரசாரமான வார்த்தைகளால் அரசை விளாசித் தள்ளியுள்ளார்.

அம்மி பறக்கும்... சாட்டை துரைமுருகன் ஆவேசம்!

அமைச்சர் ராஜ்மோகனின் எச்சரிக்கை குறித்து செய்தியாளர்களிடம் பேசிய சாட்டை துரைமுருகன், வழக்கம்போல தனது காட்டமான பாணியில் தாக்கிப் பேசினார்.

"விஷ்ணு ரெட்டியைப் பற்றிப் பேசினால் கைது செய்வீர்கள் என்றால், அவர் என்ன அவ்வளவு பெரிய அப்பாடக்கரா? மக்கள் ஓட்டுப் போட்டு அவரை முதல்வராக்கினார்களா அல்லது அமைச்சராக்கினார்களா? மக்களால் தேர்ந்தெடுக்கப்படாத ஒருவரைப் பற்றி கேள்வி கேட்கக் கூடாது என்று சொல்வதற்கு நீங்கள் யார்? ஜனநாயகம் என்றால் மக்கள் கேள்வி கேட்கத்தான் செய்வார்கள். யாரை மிரட்டிப் பார்க்கிறீர்கள்? இப்போது சும்மா ஆரம்பம்தான். இனி அடிக்கிற அடியில் அம்மி பறக்கும்!" என்று மிகக் காட்டமாகக் கொந்தளித்தார்.

விஷ்ணு ரெட்டி யார், அவர் அரசுக்குள்ளே என்ன வேலை செய்கிறார் என்பதை மக்களுக்கு வெளிப்படையாகச் சொல்ல வேண்டிய பொறுப்பு அரசுக்கு இருக்கிறது என்றும், கேள்விகளை மிரட்டல்களால் அடக்க முடியாது என்றும் அவர் ஆவேசமாகப் பேசினார்.

உதயநிதி ஸ்டாலின் வீசிய முதல் குண்டு!

சட்டமன்றத்தில் நேற்று நடந்த விவாதங்களுக்குப் பிறகு, திமுக எம்.எல்.ஏ-க்கள் வெளிநடப்பு செய்தனர். அப்போது செய்தியாளர்களைச் சந்தித்த எதிர்க்கட்சித் தலைவர் உதயநிதி ஸ்டாலின், விஷ்ணு ரெட்டி மீது மிக முக்கியமான புகார்களை அடுக்கினார்.

"அரசு கட்டுப்பாட்டில் இருக்கும் கனிம வள குவாரிகள் அனைத்தையும் முதலமைச்சர் விஜய்யின் நண்பர் விஷ்ணு ரெட்டி, அவரது மைத்துனர் சுஜய் ரெட்டி மற்றும் அவர்களுடைய தொழில் கூட்டாளி அனில் ரெட்டி ஆகியோர் தங்கள் கட்டுப்பாட்டில் எடுத்துக்கொண்டுள்ளனர். அதிகாரப்பூர்வமாக எந்த அரசுப் பதவியிலும் இல்லாத இவர்களுக்கு இவ்வளவு அதிகாரம் எங்கிருந்து வந்தது? இதற்கான அத்தனை ஆதாரங்களும் எங்களிடம் இருக்கின்றன. அவற்றை ஒவ்வொன்றாக மக்களிடம் வெளியிடுவோம்" என்று உதயநிதி சவால் விடுத்தார்.

திமுகவின் இந்தக் குற்றச்சாட்டு அரசியல் வட்டாரத்தில் பெரும் அதிர்வலையை உண்டாக்கியது. அரசு நிர்வாகத்தை வழிநடத்துவது யார் என்ற கேள்வியை திமுக வெளிப்படையாகவே எழுப்பத் தொடங்கியது.

அவதூறு பரப்பினால் சிறை! - அமைச்சர் ராஜ்மோகன் எச்சரிக்கை

உதயநிதி ஸ்டாலினின் இந்தப் பேச்சுக்கு உடனடியாக ஆளும் தரப்பில் இருந்து பதில் வந்தது. செய்தி மற்றும் விளம்பரத்துறை அமைச்சர் ராஜ்மோகன் இதற்கு மிகக் கடுமையான எச்சரிக்கையை விடுத்தார்.

"முதல்வரின் ஆலோசகர் விஷ்ணு ரெட்டி மற்றும் அவரது குடும்பத்தினர் மீது எந்தவித ஆதாரமும் இல்லாமல் அபாண்டமான பழிகளைச் சுமத்துவதை சிலர் வாடிக்கையாக வைத்திருக்கிறார்கள். உண்மைக்குப் புறம்பான செய்திகளைப் பரப்புவதையும், சில ஊடகங்கள் அதைத் தவறாக வெளியிடுவதையும் பார்த்துக் கொண்டு சும்மா இருக்க முடியாது.

நற்பெயரைக் கெடுக்கும் வகையில் பொய்களைப் பரப்பும் நபர்கள் மீதும், அந்தச் செய்திகளைப் பகிரும் ஊடகங்கள் மீதும் சட்டப்படி கடுமையான நடவடிக்கை எடுக்கப்படும்" என்று ராஜ்மோகன் திட்டவட்டமாகத் தெரிவித்தார்.

மேலும் சூடுபிடிக்கும் களம்

திமுக குற்றச்சாட்டைத் தொடங்க, அமைச்சர் எச்சரிக்கை விடுக்க, இப்போது சாட்டை துரைமுருகனும் உள்ளே புகுந்து "அம்மி பறக்கும்" என்று எச்சரித்திருப்பது விவகாரத்தை அடுத்த கட்டத்துக்குக் கொண்டு சென்றுள்ளது.

அரசு நிர்வாகத்தில் வெளிநபர்களின் தலையீடு இருக்கிறதா என்ற விவாதம் ஒருபுறமும், கேள்விகளுக்குப் பதிலாக அரசு வழக்குப் போடுகிறதா என்ற விமர்சனம் மறுபுறமும் எழுந்துள்ளது. அடுத்தடுத்து ஆதாரங்களை வெளியிடப் போவதாக எதிர்க்கட்சிகள் கூறிவருவதால், விஷ்ணு ரெட்டி விவகாரம் வரும் நாட்களில் மேலும் அனல் பறக்கும் என்பதில் சந்தேகமில்லை.