அதிதி தேவோ பவ! நம் வீட்டு விருந்தினரை! நம் வீட்டு வாசலிலேயே வைத்து வீழ்த்திய டிரம்ப்! மோடிக்கு செக்

டெல்லி: "அதிதி தேவோ பவ" (விருந்தினரே தெய்வம்) என்பது இந்தியப் பண்பாடு. ஆனால், நம் வீட்டு விசேஷத்திற்கு வந்துவிட்டுத் திரும்பிய விருந்தினரை, நம் வாசலிலேயே வைத்து எதிரி வீழ்த்தினால்... நாம் மௌனமாக இருப்பதா? - இந்த கேள்விதான் இப்போது டெல்லி முதல் தெஹ்ரான் வரை அதிர்வலைகளைக் கிளப்பியுள்ளது.

இந்திய மண்ணில் அணிவகுப்பு... இலங்கை மண்ணில் ரத்தக் கறை!

கடந்த பிப்ரவரி 19-ம் தேதி, விசாகப்பட்டினத்தில் நடந்த 'மிலன் 2026' (MILAN-2026) கடற்படை பயிற்சியில் ஈரானின் 'IRIS Dena' போர்க்கப்பல் கம்பீரமாகப் பங்கேற்றது. இந்தியக் கடற்படையின் அழைப்பை ஏற்று வந்த அந்தப் போர்க்கப்பலின் வீரர்கள், விசாகப்பட்டினத்தின் கடற்கரை சாலையில் ராணுவ மரியாதையுடன் அணிவகுத்துச் சென்றனர்.

பயிற்சிகளை முடித்துவிட்டு ஈரானுக்குத் திரும்பிக் கொண்டிருந்தபோதுதான், இலங்கையின் காலி (Galle) நகருக்கு அருகே 44 கடல் மைல் தொலைவில், அமெரிக்காவின் அணுசக்தி நீர்மூழ்கிக் கப்பல் ஏவிய 'டார்பிடோ' அந்தப் போர்க்கப்பலை சமாதி ஆக்கியுள்ளது.

டியாகோ கார்சியா: கடலுக்கு அடியில் ஒளிந்திருந்த எமன்!

இலங்கைக்குத் தென்மேற்கே சுமார் 1,600 கி.மீ தொலைவில் உள்ள டியாகோ கார்சியா (Diego Garcia) தீவு, அமெரிக்காவின் மிகப்பாரிய ராணுவத் தளம். அங்கிருந்து புறப்பட்டு வந்த அமெரிக்க நீர்மூழ்கிக் கப்பல்தான், ஈரானின் 'பிரைஸ் ஷிப்' (Prize Ship) என்று அழைக்கப்படும் தேனாவைத் தாக்கியுள்ளது.

148 வீரர்கள் மாயமாகியுள்ள இந்தத் தாக்குதல் குறித்துப் பேசிய அமெரிக்கப் பாதுகாப்புச் செயலர் பீட் ஹெக்செத், "ட்ரம்ப்பைக் கொல்லப் பார்த்தார்கள், இப்போது நாங்கள் சிரித்துக் கொண்டிருக்கிறோம்," எனப் பகிரங்கமாகத் தெரிவித்துள்ளார்.

இந்தியாவின் மௌனம்... பலவீனமா? தந்திரமா?

இந்தச் சம்பவத்தில் இந்தியாவை நோக்கி எழுப்பப்படும் கேள்விகள் மிக முக்கியமானவை:

விருந்தினருக்குப் பாதுகாப்பு எங்கே? இந்தியாவின் அழைப்பை ஏற்று வந்த ஒரு கப்பல், இந்தியாவின் 'இந்தியப் பெருங்கடல் பிராந்தியத்தில்' (IOR) வைத்துத் தாக்கப்படுவது, இந்தியாவின் ஆதிக்கத்திற்கு விடப்பட்ட சவாலாகத் தெரியவில்லையா?

இந்தியாவின் இறையாண்மை (Diplomacy) எங்கே போகிறது? ஏற்கனவே ஈரானின் உயர்மட்டத் தலைவர் கமேனி கொல்லப்பட்டபோது இந்தியா மௌனம் காத்தது. இப்போது நம் கடல் எல்லைக்கு மிக அருகில் நடந்த இந்தத் தாக்குதலுக்கும் கண்டனம் தெரிவிக்காமல் இருப்பது, ஈரான் உடனான நீண்டகால உறவை இந்தியா கைவிடுகிறதா என்கிற சந்தேகத்தை எழுப்புகிறது.

"நண்பனைப் பகைவன் அடிக்கும்போது வேடிக்கை பார்ப்பது, நாளை நமக்கும் அதே நிலை ஏற்படும் என்பதற்கான சமிக்ஞை," என்கிறார்கள் சர்வதேச அரசியல் நோக்கர்கள். இதுவே இந்திரா காந்தி காலம் என்றால் இப்படி நடந்திருக்காது. இந்திரா காந்தி இதற்கு குறைந்தது கண்டனமாவது தெரிவித்து இருப்பார்.

'இந்தியா 2.0' - மாறும் நிலைப்பாடு?

இந்தியா தன்னை ஒரு 'Net Security Provider' (பாதுகாப்பு வழங்கும் நாடு) என்று சொல்லிக் கொள்ளும் சூழலில், இத்தனை அருகில் நடந்த தாக்குதல் இந்தியாவின் பாதுகாப்பு வளையத்தில் உள்ள ஓட்டையைக் காட்டுகிறதா? அல்லது அமெரிக்காவுடனான நட்புக்காக ஈரான் உடனான உறவைப் பலி கொடுக்கிறோமா?

ஈரான் கப்பலை மூழ்கடித்தது வெறும் டார்பிடோ மட்டுமல்ல... அது இந்தியப் பெருங்கடலில் இந்தியாவின் பிம்பத்தையும் சேர்த்தே சிதைத்துள்ளதா என்பதை வரும் நாட்கள் உறுதிப்படுத்தும்!

English summary

Why India is not talking anything about the USA submarine attack on Iran Ship?