“எனக்கு ஓட்டு போட்டா போடு.. இல்லைனா போ.. தெம்பு இருக்கிறவர நின்னு கத்தி செத்துக்கூட போவேன்” - சீமான்

சென்னை: "நீ எனக்கு ஓட்டு போட்டால் போடு.. இல்லைனா போ, உடம்புல தெம்பு இருக்கிற வர இதே இடத்துல நின்னு கத்தி கத்தி செத்துக்கூட போவேன்" என நாதக தலைமை ஒருங்கிணைப்பாளர் சீமான் பெரம்பலூரில் பிரச்சாரம் செய்துள்ளார்.

தமிழக சட்டசபை தேர்தல் வரும் ஏப்ரல் 23 ஆம் தேதி நடைபெறுகிறது. மே 4ஆம் தேதி வாக்கு எண்ணிக்கை நடைபெற உள்ளது. இதனை முன்னிட்டு தமிழ்நாடு சட்டசபை தேர்தலுக்கான வேட்பு மனுத் தாக்கல் இன்று தொடங்கி ஏப்ரல் 6 ஆம் தேதி வரை நடைபெறுகிறது. தமிழ்நாட்டில் திமுக கூட்டணி, அதிமுக கூட்டணி, தவெக, நாம் தமிழர் கட்சி, சசிகலா - ராமதாஸ் அணி என 5 முனை போட்டி நிலவுகிறது.

இந்தநிலையில், நாதக தலைமை ஒருங்கிணைப்பாளர் சீமான் பெரம்பலூரில் பிரச்சாரம் மேற்கொண்டார். அப்போது பேசிய அவர், "எனக்கு முன்னாடி 2 இருந்துச்சி.. பதவியா? அல்லது மக்களுக்கான உதவியா? பணமா அல்லது இனமா? பதவியா? உதவியா? முச்சந்தியில் வந்து கத்துகிறேன். இந்தச் சத்தம் உன் காதில் விழுந்து மூளைக்குள் போய் உன்னை சிந்திக்க வைத்துவிட்டால் நான் பிறந்த பயனை அடைவேன்.

நீ எனக்கு ஓட்டு போட்டால் போடு இல்லைனா போ, உடம்புல தெம்பு இருக்கிற வர இதே இடத்துல நின்னு கத்தி கத்தி செத்துக்கூட போவேன். ஆனா சீட்டுக்கும் நோட்டுக்கும் யார்கிட்டயும் கை கட்ட மாட்டேன்; சரணடைந்து வாழ்வதற்கு சண்டையிட்டு சாவதே மேல். உயிரை இழக்கலாம். உரிமையை இழக்க கூடாது.

உயிரினும் மேலானது நமது உரிமை. மண்டியிட்டு வாழ்வதற்கு மாண்டுவிட்டு போகலாம். இதுதான் உங்கள் பிள்ளைகளின் நிலைப்பாடு. நான்கு பக்கமும் எதிரிகள் இருக்கிறார்கள். நடுவில் நாம் தமிழர் கட்சி இருக்கிறது என்பதை புரிந்துகொண்டு வாக்களிக்க வேண்டும்.

ஒவ்வொரு வணிக நிறுவனத்தின் பெயரையும் படித்துப் பாருங்கள். எழுத்து தமிழாக இருக்கும், ஆனால் உச்சரிப்பு ஆங்கிலமாக இருக்கும். எழுத்து ஆங்கிலமாக இருக்கும், ஆனால் உச்சரிப்பு தமிழாக இருக்கும். இதுதான் திராவிடர்கள் நீண்டகாலமாக பின்பற்றிவந்த இருமொழிக் கொள்கை.

இப்படியாக நம் முன்னோர்கள் அள்ளிப்பருகிய தமிழ் அழிந்துபோனது. எல்லா மொழியும் மனிதனால் பேசப்பட்டது. தமிழ் மொழிதான் இறைவனால் பேசப்பட்டது. சில மொழிகள் பிறந்து சிறக்கும், ஆனால் தமிழ் மொழி சிறந்தே பிறந்தது; அது இயற்கையின் மொழி, இறைவனின் மொழி" எனப் பேசினார்.

English summary

“Vote for me if you wish; otherwise, be on your way. As long as there is strength left in my body, I will stand right here, shouting at the top of my lungs—and I would even die doing so,” declared NTK Chief Coordinator Seeman while campaigning in Perambalur.